Azamattıq belsendi Sanavar Zakirova Joğarğı sottan prem'er-ministr Asqar Maminniñ reseylik Sber kompaniyalar tobınıñ basşısımen Qazaqstannıñ aqparattıq jüyesin reseylik platformağa köşiru turalı memorandumdı zañsız dep tanudı swrap, äkimşilik şağım tüsirdi. Şağımdı astanadağı qalalıq mamandandırılğan audanaralıq äkimşilik sotı qabıldağan.

Bügin, 13 qırküyekte belsendi Facebook paraqşasında şağımı men jazbasın jariyaladı.

«Prem'er-ministr Asqar Mamin men Sber kompaniyalar tobınıñ jetekşisi German Gref qol qoyğan QR cifrlıq transformaciyası boyınşa jobalardı jüzege asıru salasında äriptestik turalı memorandum Qazaqstan Konstituciyasına qayşı jäne Qazaqstan azamattarına qauip töndiredi dep sanaymın» delingen şağımda.

«Azamattardıñ jeke mälimetimen baylanıstı kez kelgen dünie Qazaqstannan tıs şıqpauı tiis. Özge memlekettiñ jeke deregimdi öñdeuine qarsımın» degen wstanımdağı belsendige QT redakciyasınıñ tilşisi habarlasıp kördi.

– Sber akciyasınıñ 51%-ına Resey biligi ielik etedi. Elektrondı Ükimettiñ 400 platformasın alıp böten eldiñ qolına wstatu öte qauipti... Mwnı Reseyden basqa eşkim jasay almaydı degenge senbeymin, 400 platformanı äzirlegen  qazaqstandıq mamandar birıñğay ortaq platforma jasay almauı mümkin emes. Bıltır banktiñ twtınuşılarınıñ derekteri köleñkeli narıqta satılğanı jöninde aqparat tarağandıqtan, olardıñ basşılığı qanday kepildik berse de senuge bolmaydı. Eger şetel aralasatın bolsa nelikten tek Reseyge tapsırıldı, nege damığan batıs elderi men AQŞ deñgeyinde aşıq konkurs jürgizilmedi?.. – dedi ol.

Onıñ pikirinşe, Mamin Ükimetiniñ tap osı şeşimi – täuelsiz Qazaqstannıñ cifrlıq suverenitetine ülken qater töndiredi. Zakirova reseylik iri kompaniyanıñ platformanı dayındap bergennen keyin de «tehqoldau barısında Qazaqstanğa qatıstı barlıq aqparatqa qol jetkizui ıqtimal» dep küdiktenedi.

«Jartı milliard dollar degen öte köp qarajat, onıñ besten bir böliginiñ özi jetkilikti. Narazılığımızdı tıñdamaytın Ükimetke zañdı qadammen äreket etuge şeşim qabıldadım. Referendum ötkizuin talap etemin. Sottan nätije bolmasa, qarsılıq jalğasa beredi, naqtı qadamdardı josparlaymın», – deydi.

Qırküyek ayınıñ basında Qazaqstan-Resey basşılarınıñ qatısuımen «Estitin ükimet» (Qazaqstan) reseylik Sber kompaniyalar tobımen Qazaqstannıñ cifrlıq ükimetine arnalğan platforma qwru jöninde memorandumğa qol qoyğannan keyin qoğamda narazılıq köñil-küy artqan. Dese de qazirgi ükimet qwramı türli ädispen «amanattau» qadamınıñ dwrıstığın jetkizuge tırısıp, rayınan qaytpay otır. İT mamandardıñ bir tobı «jabıq kabinet jağdayında qabıldanğan şeşimdi» sınadı, olar platforma dayındauğa ümitkerlerdiñ aşıq täsilmen tañdalmauına narazı.

Ötken aptada cifrlıq damu, innovaciya jäne aeroğarış önerkäsibi ministri Bağdat Musin Sber platforması el üşin «eñ qolaylı jüye» jäne «WQK talaptarına säykes keled» dep mälimdegen.Onıñ aytuınşa, jobağa şaşamen 500 mln dollar jwmsaluı mümkin.

The Qazaq Times