Qazaqstannıñ elektrondı ükimetin GovTech cifrlıq modeline köşirude Aqorda men «Estitin Ükimet» basşıları vakcinaciya monopoliyası täjiribesiniñ izimen Mäskeuge jügindi. Biraq İT qauımdastıq pen qoğamnıñ bir böligi bwl şeşimge narazı. Sol jaqtı joğarıdan tömen qaray: QR jäne RF prezidentteri Q.Toqaev pen V.Putin. Oñ jaqta joğarıdan tömen qaray: Sber kompaniyalar tobınıñ basşısı G.Gref jäne Qazaqstan Ükimetiniñ basşısı A.Mamin. Foto: aşıq derekköz

3 qırküyekte Qazaqstan ükimeti men reseylik «Sber» kompaniyası taraptarı qol qoyğan E-Gov portalın GovTech cifrlıq modeline köşiru turalı memorandumnıñ tolıq mätini jariyalandı. Ondağı aqparat boyınşa, Qazaqstan reseylik «Sberbanktiñ» IT-platformasın 500 mln dollarğa satıp aladı. Bwl qarjını «Sber» Qazaqstan ükimetine qarızğa bermek.

Qazaqstannıñ normativtik-qwqıqtıq akti-qwjattarı jariyalanatın «Ädilet» portalındağı qwjatta otandıq «Wlttıq aqparattıq tehnologiyalar» AQ men reseylik «Sberbank» JAQ arasında qarız jöninde kelisim jasaudı qarastıradı. Qwjatta 500 mln AQŞ dollarına para-par qarajat reseylik rubl' küyinde Resey jağına qajetti qwjattardıñ barlığı uaqıtında berilgen jağdayda 2022 jıldıñ birinşi toqsanınıñ soñına deyin beriledi dep körsetilgen.

E-gov-qa balama GovTech jüyesi «Sberdiñ» Platform V platformasına negizdelip jasaladı. Sonday-aq memorandum 31 qazanğa deyin koncorcium qwrudı da qarastıradı. Qwjatta ERG kompaniyalar tobına enşiles BTS Digital JŞS strategiyalıq äriptes retinde körsetilgen.

Memorandum Cifrlıq damu, innovaciya jäne aeroğarış önerkäsibi ministri Bağdat Musinniñ egov Reseyge berilmeydi degen twjırımına kümän keltiredi dep jazdı QazTAG agenttigi.

«Atalğan memorandum ayasında QR ükimeti: ... GovTech platformasın «elektrondı ükimet» aqparattıq-kommunikaciyalıq platformasınıñ negizgi böligi retinde bekitedi» delingen ükimet maqwldağan qwjatta.

Memorandum mätinimen tanısqan ekonomist Oljas Qwdaybergenov Facebook jelisindegi paraqşasında jobağa kümän köp dep jazdı.

«500 mln dollar qarız, onıñ üstine platforma jasauğa, onıñ üstine Sberdiñ özinen aludıñ qajeti joq. Mwnday dünieler jasalsa, kelissöz jasay alatınday öz aqşamızğa jasaluı kerek. Äytpese nesie aluşınıñ saudalasuğa şaması kelmey qaladı. ...Mwnday konstrukciyada joba ärbir parametr boyınşa kümändi bolıp şığadı!» dep jazdı sarapşı.

Qırküyek ayınıñ basında Qazaqstan-Resey basşılarınıñ qatısuımen «Estitin ükimet» reseylik Sber kompaniyalar tobımen Qazaqstannıñ cifrlıq ükimetine arnalğan platforma qwru jöninde memorandumğa qol qoyğannan keyin qoğamda narazılıq köñil-küy artqan. Dese de qazirgi ükimet qwramı türli ädispen «amanattau» qadamınıñ dwrıstığın jetkizuge tırısıp, rayınan qaytpay otır. İT mamandardıñ bir tobı «jabıq kabinet jağdayında qabıldanğan şeşimdi» sınadı, olar platforma dayındauğa ümitkerlerdiñ aşıq täsilmen tañdalmauına narazı.

Eki apta bwrın cifrlıq damu ministri Bağdat Musin Sber platforması el üşin «eñ qolaylı jüye» jäne «WQK talaptarına säykes keled» dep mälimdegen. Onıñ aytuınşa, jobağa şaşamen jartı milliard dollar jwmsaladı.

The Qazaq Times