Birneşe märte para aldı degen küdikpen wstalğan Qostanay qalalıq policiya basqarması köşi-qon qızmeti böliminiñ bastığı K.Bayjanovqa qatıstı sotqa deyingi tergeu ayaqtalıp, sot ükim oqıdı.

Qostanay oblıstıq sıbaylas jemqorlıqqa qarsı küres qızmetiniñ mälimdeuinşe, küdikti K.Bayjanov şeteldik E.Manukyan, I.Grebenyuk, A.Egiazaryan, M.Zakoyan jäne H.Mahmadova esimdi azamattardan jalpı qamqorlığı üşin 3 mln 10 mıñ teñge somasında twraqtı türde para alğan.

Vedomstvo taratqan habarğa säykes, «K.Bayjanovqa G.Kravçuk järdem bergen. Ol şetel azamattarın elde twruğa ıqtiyarhattı kedergisiz tirkep, räsimdegeni üşin degen küdikke ilindi. Biılğı  qazannıñ 29-ı ötken Qostanay qalalıq №2 sotınıñ ükimimen Bayjanovqa 6 jılğa bas bostandığınan ayıru jazası tağayındaldı. Sonday-aq, ol ömir boyına memlekettik qızmetten şettetilip, osığan deyingi ataqtarınan ayırılğan». Atalğan ükimmen Kravçuk te 4 jılğa bas bostandığınan ayırıldı, al para beruşiler – Manukyan, Grebenyuk, Egiazaryan, Zakoyan jäne Mahmadovtarğa bergen paranıñ on eselengen soması mölşerinde ayıppwl salındı.

Qazaqstanda sıbaylas jemqorlıq qılmısı bäseñdemey, kerisinşe örşip twr. Sıbaylas jemqorlıqqa qarsı is-qimıl agenttiginiñ oblıstıq departamentiniñ deregi oyınşa, bir ğana Aqtöbe oblısınıñ özinde biılğı 9 ayda jemqorlıqqa qatıstı bası bütin 99 is tirkelip, tergeu jürip jatır. Onıñ 50%-ı auır sanatqa jatadı desedi: qarjı jımqıru, memleket qarjısın talan-tarajğa salu deregi boyınşa 30 is, qılmıstıq ökilettiligin asıra paydalanuda 38 is, para aluda 24 qılmıstıq is bar.

Esteriñizde bolsa, ötken aptanıñ senbisi, 17 qazan elordadağı Almatı audanınıñ äkim orınbasarı men jañaözendik sud'ya para alğanı üşin 3 jılğa bas bostandığınan ayırılıp, qılmıstıq iske qatısı bar özge de ayıptaluşılarğa jaza tağayındalğan bolatın. Sonımen qatar, qazannıñ 23-i de Türkistan oblısı Jetisay audanı Qızılqwm selolıq okruginiñ äkimi men Şımkent qalasınıñ äl-Farabi audanı äkimdigi käsipkerlik böliminiñ basşısı para aldı degen küdikpen qılmıs üstinde wstalğan edi.

Künbe-kün örşigen jemqorlıqtıñ «saldarımen küres» qaşanğı jalğaspaq? Sıbaylas jemqorlıqtı qabıldau indeksi boyınşa 124-şi orınğa jayğasqan Qazaqstanda qazına wrılarınıñ ülkeni şalqıp, wsağı oñay twtılıp jür.

«Ayran işkeni qwtılıp, şelek jalağanı twtıla qoyatın» sıbaylas jemqorlıqpen küres sayasatınıñ kurs-bağdarın özgertuge aqjağalılardıñ batılı bara qoyar ma eken?

"The Qazaq Times"