Bügin, 7 qazanda astanadağı apellyaciya sotı «Astana LRT jobasındağı aqşa jımqıru isi» boyınşa şıqqan ükimniñ küşin joyıp, prokuraturağa qaytardı. Bwl turalı qazaqstandıq BAQ ökilderi habarladı.

Elordanıñ qılmıstıq ister jönindegi sot alqasınıñ şeşimin mälimdegen sud'ya Abay Kökjalov qılmıstıq istegi «eleuli zañsızdıqtardı joyu üşin jäne qılmıstıq-procestik normalardıñ bwzıluına jol bermes üşin» isti prokurorğa keri jiberdi. Degenmen sottaluşılar isti qayta qarau barısında qamaudan şığarılmaydı.

Asa iri jobanıñ qwrılısı barısında 5,8 mlrd teñge qarjını jımqıru isi boyınşa sot procesi 2020 jılğı 29 qazanda bastalğan. Birneşe ay bwrın, 28 mamırda astana sotı atalğan is boyınşa ayıptalğan jeti küdiktige ükim şığarğan. Eñ auır jaza – 10 jıl türme jazası. Olarğa «wyımdasqan top qwru jäne oğan jetekşilik etu» jäne «özine senip tapsırılğan mülikti iemdenu jäne jwmsau» baptarı boyınşa ayıptar tağılğan edi. Sottalğandar tağılğan ayıptardı moyındamağan.

Halıq pen sarapşılar arasında «Qazaqstandağı jemqorlıqtıñ iri somvolı» atalıp ketken is boyınşa sot procesi bıltır küzde qarala bastağan edi. Biıl säuir ayında is ayaqtaluğa jaqın qalğanda birqatar jayttardı anıqtau üşin qayta sozıldı.

Osığan deyin isti tergegen jemqorlıqpen küres is-qimıl agenttigi «aqşa jımqıru shemasın astana äkiminiñ bwrınğı orınbasarı Qanat Swltanbekov, «Astana LRT» kompaniyasınıñ bwrınğı basşısı Talğat Ardan wyımdastırğan» dep mälimdegen edi. Olarğa halıqaralıq izdeu jariyalanğan.

Tergeu organdarınıñ mälimetinşe, şeneunikter käsipkerlermen birge joba qwnın ädeyi qımbattatıp, jalğan käsiporındardıñ kömegimen milliard teñge jımqıruğa tırısqan.

Qazaqstandağı alğaşqı jeñil rel'sti transport jüyesi astananıñ sol jağalauınan äuejay jäne temir jol vokzalına deyin jolauşılar tasımaldauı tiis bolğan. Qwrılıs resmi türde 2017 jılı mamır ayında bastalğan. Elordada jwrt jaqsı biletin «saqaldı bağandar» sol kezde payda bolğan. Jobağa salınğan aqşanı alğan «Astana banki» 2018 jılı licenziyasınan ayırıldı. Saldarınan kölik jüyesi qwrılısına bölingen şamamen 258 mln dollar bwğattalğan.

Toqaev 2019 jılı küzde jobanı aşıq sınap, «daulı joba» dep atağan. Alayda astana biligi keyinirek LRT qwrılısın jalğastıra beretinin habarladı. Jañarğan jospar boyınşa, stanciyalar men jerastı jayau jürginşiler ötkeli qısqaradı. Qazir äkim Altay Kölginov jobanıñ boyına qan jürgizetin investiciya-qarız izdeumen aynalısıp jatqanın aytadı.

Aqparat qwraldarınıñ biri QazTAG-tıñ jazuınşa, «Astana LRT» JŞS atauı jemqorlıq dauınan keyin City Transportation Systems (CTS) bolıp özgergen.

The Qazaq Times