بىرنەشە مارتە پارا الدى دەگەن كۇدىكپەن ۇستالعان قوستاناي قالالىق پوليتسيا باسقارماسى كوشى-قون قىزمەتى ءبولىمىنىڭ باستىعى ك.بايجانوۆقا قاتىستى سوتقا دەيىنگى تەرگەۋ اياقتالىپ، سوت ۇكىم وقىدى.

قوستاناي وبلىستىق سىبايلاس جەمقورلىققا قارسى كۇرەس قىزمەتىنىڭ مالىمدەۋىنشە، كۇدىكتى ك.بايجانوۆ شەتەلدىك ە.مانۋكيان، ي.گرەبەنيۋك، ا.ەگيازاريان، م.زاكويان جانە ح.ماحمادوۆا ەسىمدى ازاماتتاردان جالپى قامقورلىعى ءۇشىن 3 ملن 10 مىڭ تەڭگە سوماسىندا تۇراقتى تۇردە پارا العان.

ۆەدومستۆو تاراتقان حابارعا سايكەس، «ك.بايجانوۆقا گ.كراۆچۋك جاردەم بەرگەن. ول شەتەل ازاماتتارىن ەلدە تۇرۋعا ىقتيارحاتتى كەدەرگىسىز تىركەپ، راسىمدەگەنى ءۇشىن دەگەن كۇدىككە ءىلىندى. بيىلعى  قازاننىڭ 29-ى وتكەن قوستاناي قالالىق №2 سوتىنىڭ ۇكىمىمەن بايجانوۆقا 6 جىلعا باس بوستاندىعىنان ايىرۋ جازاسى تاعايىندالدى. سونداي-اق، ول ءومىر بويىنا مەملەكەتتىك قىزمەتتەن شەتتەتىلىپ، وسىعان دەيىنگى اتاقتارىنان ايىرىلعان». اتالعان ۇكىممەن كراۆچۋك تە 4 جىلعا باس بوستاندىعىنان ايىرىلدى، ال پارا بەرۋشىلەر – مانۋكيان، گرەبەنيۋك، ەگيازاريان، زاكويان جانە ماحمادوۆتارعا بەرگەن پارانىڭ ون ەسەلەنگەن سوماسى مولشەرىندە ايىپپۇل سالىندى.

قازاقستاندا سىبايلاس جەمقورلىق قىلمىسى باسەڭدەمەي، كەرىسىنشە ءورشىپ تۇر. سىبايلاس جەمقورلىققا قارسى ءىس-قيمىل اگەنتتىگىنىڭ وبلىستىق دەپارتامەنتىنىڭ دەرەگى ويىنشا، ءبىر عانا اقتوبە وبلىسىنىڭ وزىندە بيىلعى 9 ايدا جەمقورلىققا قاتىستى باسى ءبۇتىن 99 ءىس تىركەلىپ، تەرگەۋ ءجۇرىپ جاتىر. ونىڭ 50%-ى اۋىر ساناتقا جاتادى دەسەدى: قارجى جىمقىرۋ، مەملەكەت قارجىسىن تالان-تاراجعا سالۋ دەرەگى بويىنشا 30 ءىس، قىلمىستىق وكىلەتتىلىگىن اسىرا پايدالانۋدا 38 ءىس، پارا الۋدا 24 قىلمىستىق ءىس بار.

ەستەرىڭىزدە بولسا، وتكەن اپتانىڭ سەنبىسى، 17 قازان ەلورداداعى الماتى اۋدانىنىڭ اكىم ورىنباسارى مەن جاڭاوزەندىك سۋديا پارا العانى ءۇشىن 3 جىلعا باس بوستاندىعىنان ايىرىلىپ، قىلمىستىق ىسكە قاتىسى بار وزگە دە ايىپتالۋشىلارعا جازا تاعايىندالعان بولاتىن. سونىمەن قاتار، قازاننىڭ 23-ءى دە تۇركىستان وبلىسى جەتىساي اۋدانى قىزىلقۇم سەلولىق وكرۋگىنىڭ اكىمى مەن شىمكەنت قالاسىنىڭ ءال-فارابي اۋدانى اكىمدىگى كاسىپكەرلىك ءبولىمىنىڭ باسشىسى پارا الدى دەگەن كۇدىكپەن قىلمىس ۇستىندە ۇستالعان ەدى.

كۇنبە-كۇن ورشىگەن جەمقورلىقتىڭ «سالدارىمەن كۇرەس» قاشانعى جالعاسپاق؟ سىبايلاس جەمقورلىقتى قابىلداۋ يندەكسى بويىنشا 124-ءشى ورىنعا جايعاسقان قازاقستاندا قازىنا ۇرىلارىنىڭ ۇلكەنى شالقىپ، ۇساعى وڭاي تۇتىلىپ ءجۇر.

«ايران ىشكەنى قۇتىلىپ، شەلەك جالاعانى تۇتىلا قوياتىن» سىبايلاس جەمقورلىقپەن كۇرەس ساياساتىنىڭ كۋرس-باعدارىن وزگەرتۋگە اقجاعالىلاردىڭ باتىلى بارا قويار ما ەكەن؟

"The Qazaq Times"