AQŞ-tıñ Qazaqstandağı elşisi Uil'yam Mozer. Foto: aşıq derekköz

AQŞ-tıñ Qazaqstandağı elşisi Uil'yam Mozer Uaşingtonnıñ Qazaqstan biligin adam qwqığın jaqsartuğa qajetti şaralar jürgizuge  tabandı türde şaqıratının mälimdedi.  

Ötken aptada AQŞ elşisi Azattıqqa bergen swqbatında «biz siyaqtı jas elge amerikalıq qalpaqtı kiyuge kelmeydi» degen Nazarbaevtıñ prezidenttigi men postprezidenttik kezeñderindegi Qazaqstandı adam qwqıqtarın qorğau kepildiginiñ üdesinen şığa almay kele jatqanın sınğa aldı.

Täuelsizdik jıldarı Qazaqstanda demokratiyalıq qwndılıqtar äli de tolıq ayaqtanıp ülgermegendikten, bilik pen bwqara arasında örkenietti-gumandı sipattağı önimdi dialog ornay qoyğan joq. «Dağdarıs kezeñinde jüyeni şayqaltpay, qayta nığaytu  üşin bizge qoğamdı damıtatın, jwrttıñ aytqanına qwlaq türetin mıqtı köşbasşılar men mıqtı partiya kerek... Bireuler kelip, bireuler ketip jatsa ne bolatın aynalamızdan, postsovettik keñistikten körip otırmız» dep alañdaytın eks-prezident Nazarbaev jüyege narazılıq küşeygen twsta 30 jıl basşılıqtağı resmi qızmetin tämamdap, 19 naurız «wmıtılmas mälimdeme» jasağan bolatın.

Äytse de ol, sarapşılardıñ sözinşe, auzı dualı «Qauipsizdik keñesiniñ törağası» bolu arqılı beyresmi türde basşılıq etude. «Keybireuler ayğaylap aytıp jürgen Europadağı demokratiyağa kelu üşin uaqıt kerek. Aldımen – ekonomika». El astanası öz atımen atalatın Nazarbaevtıñ bwl sözi wzaq jıldar boyı el sayasatınıñ bastı kursı bolğanı belgili.

Täuelsiz sarapşılar biılğı sayasi-äleumettik mäselelerge qatıstı bwrın-soñdı tirkelmegen qarqındı ırğaqtağı tolqular men şeruler bilikti tığırıqqa tirep, liberaldıq qadamdarğa mäjbürlegenin aytadı. Sayasi üderisterge belsene aralasqan jastardıñ kreativtiligin Toqaev ta erekşe atap ötken bolatın.

El astanasında AQŞ-tıñ Qazaqstandağı elşisi Uil'yam Mozer swqbat berdi. 11 qazan 2019 jıl. Foto: Erjan Ämirhan / Azattıq

Amerikalıq diplomat, TMD elderiniñ jay-japsarına qanıq, biraz jıldar Moldova, Ukraina, Oñtüstik Aziya elderinde eñbek etken, 2019 jılı 2 qañtardan beri AQŞ-tıñ Qazaqstandağı elşisi poliglot Uil'yam Mozer el biligin Halıqaralıq adam qwqıqtarı kelisimderi men Konstituciyada körsetilgendey twlğağa gumandı principtermen qarauğa şaqıradı.

– Biz adam qwqığı turalı ükimetpen [Qazaqstannıñ] üzdiksiz söylesip kelemiz. Bwl – eki jaqtıñ kün tärtibinde twrğan eñ mañızdı mäselelerdiñ biri. Älginde aytqanımday, prezident Toqaev ükimetimen jwmıs isteymiz jäne Qazaqstandı adam qwqığı jayın jaqsartuğa qajetti reformalar jürgizuge tabandı türde şaqıra beremiz, – dedi Mozer.

Batıs baqılauşıları «Toqaev biıl mausımdağı kezekten tıs prezident saylauına qatısıp, resmi mälimet boyınşa 70 payız dauıs alğan kezdegi qarsılıq akciyaları jappay wstauğa wlastı» dep sınaydı. Sonday-aq, qırküyektiñ 9-ı Jenevadağı BWW Adam qwqıqtarı jönindegi keñesiniñ 42-sessiyanıñ aşıluında  wyımnıñ adam qwqıqtarı jönindegi joğarğı komissarı Mişel' Baçelet «Qazaqstandağı adam qwqığı jağdayı» turalı bayandamasında biıl naurızınan beri  ötip jatqan «narazılıq akciyaları kezinde 4 mıñnan astam adam wstalğanın» mälimdegen bolatın. Küz basında el işindegi «Qıtay ekspansiyasına» qarsı ötken narazılıqtarda közge tüsken 20 şaqtı belsendi eki aptadan soñ, 16-18 qırküyek aralığında jappay wstalıp, köbi 15 täulikke deyin sottalıp edi.

"The Qazaq Times"