2026 jılğı 26 mausım. Almatı oblısınıñ sotında belgili agro-sarapşı, azamattıq belsendi,  Almasbek Sadırbay men özge de ayıptaluşılarğa qatıstı kezekti sot otırısı ötti. The Qazaq Times aqparattıq agenttiginiñ tilşisi retinde zalda otırıp, biz bügin qwqıqtıq nonsens pen memlekettik ayıptauşı taraptıñ sotqa wsınğa materialdarınıñ kemşilikteri men qatelikterine tağı da kuä boldıq. Esteriñige sala ketsek bwl aşıq sot otırısın jäbirlenuşi taraptardıñ ötinişimen sud'ya Nwrswltan Qoyşıbaev beyne jäne dıbıs jazuğa şekteu qoyğan. Biz tek sot otırsınan maqala jazuğa mäjbürmiz.

Sot procesi bastalğalı beri qorğauşılar tarapınan ayıptau aktisiniñ şikiligi men tergeudiñ zañsızdıqtarı jii aytılıp keledi. Qorğau tarabı bügingi otırısta prokuraturanıñ käsibi deñgeyine ülken kümän keltirdi.

«Ayıptau aktisin sizge kim berdi?» nemese Jetisudan kelgen «Jäbirlenuşi-kuänıñ» şatasuı

Sot otırısınıñ birinşi böliminde Jetisu oblısı Auıl şaruaşılığı basqarması Mal şaruaşılığı böliminiñ basşısı Mwrat Tileubaevtan jauap alu bastaldı. Ol sotqa 2025 jıldıñ säuir ayında Almatı oblısınıñ arnayı prokuraturasına şaqırtu alıp, körsetilgen uaqıtta jauap bergenin ayttı.

Alayda advokat Anar Qwsayınovanıñ swraqtarına kelgende, kuänıñ qattı «qinalğanı» bayqaldı. Mwrat Tileubaev jauap beru barısında aldındağı qağazdan köz almay, soğan qarap söyley bastadı.

Almasbek Sadırbaydıñ advokatı Anar Qwsayınova

Advokat Anar Qwsayınovanıñ reakciyası:

«Qwrmetti sot, men sizdiñ nazarıñızdı audarğım keledi. Jäbirlenuşi taraptıñ ökili aldındağı qağazğa qarap, sonı oqıp otır. Biz onıñ ne oqıp otırğanın anıqtauğa qwqılımız».

Sottıñ eskertuinen keyin, Tileubaev öziniñ aldında ayıptau aktisi jatqanın ayttı. Advokattıñ «Bwl processualdıq qwjattı sizge kim berdi?» degen swrağına ol: «Basqarma zañgeri Arnay Azamat berdi» dep jauap berdi.

Bwl sot zalında ülken dau tudırdı. Qılmıstıq is jürgizu kodeksi boyınşa, tergeu organı ayıptau aktisin jäbirlenuşi tarapqa nemese kuälarğa aldın ala üyrenip, «dayın scenariymen» jauap bersin dep ülestirmeui tiis. Bwl tergeu amaldarınıñ ädiletsiz äri birjaqtı ötkenin däleldeytin bastı faktordıñ biri.

Prokurordıñ 30 sekundta «aynuı»: Jäbirlenuşi me, älde kuäger me?

Bwdan keyingi negizgi zañdıq kolliziya Tileubaevtıñ sottağı resmi märtebesine qatıstı örbidi. Mwrat Tileubaev özin tergeu kezinde «jäbirlenuşi taraptıñ ökili» retinde swralğanın ayttı. Alayda, onıñ esimi ayıptau aktisindegi jäbirlenuşiler tiziminde joq bolıp şıqtı.

Memlekettik aytıptauşı Älimjan Sanabaev

Qorğauşı tarap bwl mäseleni kötergende, memlekettik ayıptauşı zalda twrıp: «Bwl jerde eki jäbirlenuşi ökili bar. Tileubaev bölim basşısı retinde şaqırılğan» dedi. Biraq qorğauşılar qwjattı alğa tartıp, qıspaqqa alğanda, prokuror nebäri 30 sekundtıñ işinde sözinen aynıp, Mwrat Tileubaevtıñ bwl sotqa «kuä» retinde şaqırıluı mümkin ekenin aytıp alğaşqı sözinen aynıp qaldı.

Ayıptaluşı Almasbek Sadırbaydıñ zaldağı aşulı mälimdemesi:

«Bwl — prokuraturanıñ nağız masqarası! Memlekettik ayıptauşı pogon tağıp alıp, 30 sekundtıñ işinde öz nwsqasın özgertip otır. Sot zalında bizdi aldap, adastırumen aynalısuda. Mağan meniñ Almatı oblısım üşin, prokuratura jüyesi üşin wyat!»

İstegi ülken zañ bwzuşılıq: «Kuänıñ» zalda otıruı

Advokat Anar Qwsayınova prokurordıñ bwl qateliginiñ artında öte ülken zañ bwzuşılıq twrğanın mälimdedi. Eger Mwrat Tileubaev «kuä» bolsa, ol qılmıstıq procestik kodekistiñ talaptarı boyınşa, özinen jauap alğanğa deyin sot zalında otırmauı, özge jäbirlenuşiler men kuälardıñ tüsiniktemelerin tıñdamauı tiis edi.

Alayda, Tileubaev sot bastalğalı beri onlayn-çatta da, zalda da bolıp, bükil procesti baqılap kelgen. Qorğauşı tarap bwnı «ayıptau nwsqasın aldın ala dayındap, tergeudiñ soyılın soğu üşin jasalğan ayla» dep bağaladı. Olar Mwrat Tileubaevtıñ körsetilgen statusınıñ tüsiniksizdigine baylanıstı onıñ jauaptarın isten tolıqtay alıp tastaudı jäne bwl isti wyımdastırğan Almatı oblısınıñ prokurorı Älimjan Sanabakevqa qatıstı jeke qaulı şığarudı talap etti.

Sot advokattardıñ bwl uäjin orındı dep tanıdı. Sud'ya Mwrat Tileubaevtan: «Öziñizdiñ kim retinde jauap berip jatqanıñızdı bilmeysiz be?» dep swrağanda, Tileubaev: «Wzaq uaqıt ötip ketkendikten wmıtıp qaldım», — degen jal taptı.

Tüske deyingi otırıstıñ nätijesi:

Mwrat Tileubaevtan jauap alu toqtatılıp, ol sot zalınan şığarıldı. Odan bwdan bılay bwl is boyınşa jauap alınbaytın boladı. Memlekettik ayıptauşı Älimjan Sanabaevqa istegi öreskel qatelikteri üşin eskertu jasaldı. Prokurorğa qatıstı jeke qaulı şığaru mälimeti sottıñ soñğı ükimi kezinde keñesu bölmesinde bağalanatın boldı. Sekretar'ğa sottıñ onlayn-çattarın tazartıp, iske qatısı joq nemese märtebesi anıqtalmağan twlğalardı şığaru tapsırıldı. Jetisu oblısı auıl şaruaşılığı basqarmasınıñ zañgeri Arnay Azamattan jäbirlenuşi retinde jauap alu belgilendi.

Arı qaray üzilis. jariyalanıp sot procesi tüsten keyin, sağat 14:30-da qayta jalğasatın boldı.

PS. Bügingi otırıs Almasbek Sadırbaydıñ isindegi ayıptau tarapınıñ dälelderiniñ jetkiliksizdigin tağı bir märte körsetti. Memleket atınan ayıp tağıp otırğan prokurordıñ öz jäbirlenuşileri men kuäların tanımay, şatasuı ayıptaluşı Almasbek Sadırbaydıkñ «bwl is qoldan qwrastırılğanınıñ» belgisi degenin rastağanday.

Biz bwl sot otırıstarın twraqtı baqılaymız.