BWW Adam qwqıqtarı jönindegi keñesiniñ 48-şi sessiyasında. Foto: iravaban.net

Beysenbi, 14 qazanda BWW Bas assambleyasında Adam qwqıqtarı jönindegi keñesiniñ qwramına aldağı eki jıl müşelik etetin 18 eldiñ tizimi bekitildi. Olardıñ arasında adam haqı naşar qorğalatın, köbinde saqtala bermeytin Qazaqstan da bar.

Azamattıq qoğam men oppoziciya türli qısımğa tap bolatın Qazaqstan 2013-2015 jıldarı müşe bolğan Adam qwqıqtarı jönindegi keñeske 2022-2024 jıldarı da qayta kirmek. N'yu-Yorktegi BWW Bas Assambleyasınıñ 76-ınşı äri keñestiñ 48-sessiyası barısında qabıldanğan şeşim jöninde Qazaqstannıñ Sırtqı ister ministrliginiñ baspasöz qızmeti habarladı.

«Keñeste Qazaqstan jwmısınıñ basım bağıttarı retinde genderlik teñdikti ilgeriletu jäne äyelderdiñ qwqıqtarı men mümkindikterin keñeytu, ölim jazasın jappay joyu, tözbeuşiliktiñ barlıq türlerine qarsı küres, din men senim bostandığı, inklyuzivti jäne jalpığa birdey bilim berudi qamtamasız etu, sonday-aq COVID-19 pandemiyası kezinde adam qwqıqtarın qwrmetteu belgilendi», – delingen SİM habarlamasında.

Vedomstvo eldiñ düniejüzilik wyımnıñ bas qwqıq qorğau organına saylanuı – Qazaqstannıñ «Adam qwqıqtarı men bostandıqtarın qorğau salasındağı halıqaralıq normalar men standarttardı ilgeriletu procesine belsendi jäne jauaptı qatısuşı retindegi rölin moyındau bolıp tabıladı» dep sanaydı.

Tärtip boyınşa, qaysıbir kandidat-memleket keñeske kiru üşin keminde 97 dauıs ielenu kerek. Basılımdar jariyalağan aqparatqa qarağanda, Qazaqstan kandidaturasın Bas assambleyanıñ 184 delegaciyası qoldağan. Keñes qwramına Qazaqstannan basqa Argentina, AQŞ, Finlyandiya, Ündistan, Litva, Lyuksemburg, Malayziya siyaqtı elder engen.

Qazaqstan BWW Adam qwqıqtarı jöninde keñesine adam qwqığına baylanıstı jii sınalıp jatqan twsta müşe bolıp otır. Azattıq radiosınıñ jazuınşa, birneşe kün bwrın halıqaralıq Human Rights Watch wyımı kandidattar arasında keñeske müşe boluğa layıqtısı az ekenin aytıp, Qazaqstandağı jağdaydı da sınağan.

«Qazaqstan ükimeti adam qwqığı mäselesin kün tärtibine engizip, köñil bölip kele jatqanın aytqanmen elde söz bostandığı, beybit jinalu qwqığı şekteledi, täuelsiz käsipodaq qwru mümkindigi de az» delingen wyım mälimdemesinde.

Qazaqstandıq qwqıq qorğauşılar keñesi halıqaralıq standartqa säykes, «sayasi twtqın» dep tanığan birneşe azamat keyingi kezde bosatılğanımen, biraq bilik ondağan azamattıq belsendigi is qozğap, sottauın jalğastırıp jatır. Osı aptada sarapşılar tarapınan «sayasi qudalau kampaniyasınıñ apogeyi» dep tanılğan is boyınşa 13 belsendige ükim şıqtı. Jüyedegi kemşilikterdi aşıq sınaytın azamattardıñ köbine «ekstremizm» babına baylanıstı türli ayıp tağılıp, isti boladı. Azamattıq qoğam ökilderi jeke közqarası üşin sottau – halıqtı ürkitip-qorqıtu, köpke jasalğan doq mänindegi signal deydi. Erkin ömirdegi qwqıqtan bölek abaqtıda da azaptau faktileri jii mälim bolıp jatadı. Biıl qısta qordalanğan, ädil şeşimin tappadı delingen köptegen jağday boyınşa Europarlament te Aqorda sayasatın sınağan. Tipti elde adam qwqığına qatısı bar şeneunikterge sankciya salu mäselesi birneşe ret köterildi.

BWW ayasında ükimetaralıq deñgeyde jwmıs isteytin Adam qwqıqtarı jönindegi keñeste 47 memleket bar. Keñes qwzıretine adam qwqığı salasına qatıstı barlıq mäseleni talqılau kiredi.

The Qazaq Times