QONAEV. «The Qazaq Times»  Qonaev qalalıq sotında Almatı jäne Jetisu oblıstarındağı auıl şaruaşılığı öndiristik kooperativterine  berilgen subsidiyalarğa qatıstı atışulı qılmıstıq isti talqılaudıñ tüsten keyingi otırısı kezekti janjalmen bastaldı. Sot procesi tek ekonomikalıq ayıptaular töñireginde emes, adam qwqıqtarınıñ öreskel bwzıluı men joğarı twrğan sot organdarınıñ qısım jasau äreketteri ayasında örbip jatır.

«Qorğauımdağı azamattı dälizde süyrep, jerge jıqqan»: Advokat mälimdemesi

Sot zalında törağalıq etuşi sud'ya şığıp ketkennen keyin, üzilis kezinde qorğauşı tarapqa belgili bolğan soraqı derekter jariya etildi. Ayıptaluşı Almasbek Sadırbaevtıñ advokatı Anar Qwsayınova sot otırısı bastalğan boyda resmi mälimdeme jasap, Qılmıstıq kodekstiñ 362-babı yağni «Bilikti nemese lauazımdıq ökilettikterdi asıra paydalanu» boyınşa is qozğaudı talap etti.

Advokattıñ aytuınşa:

19 mausım küni sot ayaqtalğannan keyin, Qonaev qalalıq sotınıñ eki qızmetkeri (boljam boyınşa sot pristavtarı) küzet (konvoy) qızmetiniñ qwzıretine aralasıp, ayıptaluşı Almasbek Sadırbaevqa küş qoldanğan. Onı sot dälizinde jerge qwlatıp, sırtqa qoltığınan süyrep şığarğan.

25 mausım küni keşke däl osınday jağday qaytalanğan. Bwl jolı qalalıq sot qızmetkerlerine Almatı oblıstıq sotınan kelgen tağı eki pristav qosılıp, ayıptaluşığa agressivti türde küş körsetken. Ayıptaluşınıñ kömek swrap, «102» qızmetin şaqırudı talap etken dauısı äleumettik jelilerde tarağan.

Anar Qwsayınova, advokat:

«Sot pristavtarınıñ mindetine ayıptaluşılardı sot ğimaratınan küştep alıp şığu kirmeydi. Ol üşin arnayı policiya konvoyı bar. Meniñ joqtığımdı paydalanıp, qorğauımdağı azamatqa qol köteru  bwl zañsızdıq. Men sot ğimaratındağı beynekameralardıñ jazbasın alu üşin advokattıq swranıs joldaymın jäne bwl isti Joğarğı sot äkimşiligine deyin jetkizemin».

Ayıptaluşınıñ özi de memlekettik ayıptauşı Sanavaevtıñ bwl zañsızdıqtardı köre twra, zalınan qaşıp şığıp ketkenin, özin qorğaudan bas tartqanın aytıp, narazılıq bildirdi: «Mağan mwnday zañsızdıqqa köz jwmatın, öz antına adal emes prokurordan qorqınıştı», — dedi ol.

Oblıstıq sottıñ «tıñşısı» zalda ne istep jür?

Sottağı tağı bir ülken dau Almatı oblıstıq sotınıñ baspasöz qızmetiniñ ökili men özge de lauazımdı twlğalarınıñ sot zalında memlekettik ayıptauşı men hatşınıñ qasında, jwmıs uaqıtında azamattıq kiimmen otıruı.

Qorğauşı tarap bwl zañdılıqtı tikeley bwzu jäne tömengi satıdağı sud'yağa joğarı twrğan sot tarapınan jasalıp jatqan jasırın psihologiyalıq qısım dep bağaladı. QR Konstituciyasına säykes, sot töreligin jüzege asıru kezinde sud'yalarğa qanday da bir ıqpal etuge tıyım salınğan. Qorğauşı Qwsayınova oblıstıq sottıñ bwl qızmetkeriniñ jwmıs uaqıtında ne sebepti zalda otırğanın swradı. Sud'ya bwl mäseleni nazarğa alatının ayttı.

Subsidiya dauı: Ayıptau aktisindegi somalar «köpirşik» pe?

Procestiñ ekinşi böliminde Jetisu oblısı auıl şaruaşılığı basqarmasınıñ ökili, resmi bas mamanı äri zañgeri Arnay Azamat jauap berdi. Onıñ jauaptarı istegi qarjılıq şığındardıñ negizsiz ekenin jäne tergeu organdarınıñ esep ayırısuda öreskel qatelikter jibergenin körsetti.

Advokat Anar Qwsayınovanıñ zañdı twrğıda jürgizgen swraq-jauabınan keyin, Jetisu oblısınıñ atına jazılğan milliondağan şığındardıñ is jüzinde bwl aymaqqa eş qatısı joq ekeni däleldendi.

Nelikten somalar säykes kelmeydi?

2022 jılğa deyin bwl aymaq Almatı oblısınıñ qwramında bolğan, al Jetisu oblısınıñ auıl şaruaşılığı basqarması tek 2023 jıldıñ mamır ayınan bastap qana resmi jwmıs istey bastağan. Alayda, ayıptau aktisinde 2021-2022 jıldardağı eski tölemderdiñ barlığın qazirgi Jetisu oblısına «ziyan» retinde jauıp qoyğan.

Advokat pen basqarma ökiliniñ ayğaqtarı negizinde  300 mln teñge kölemindegi aqşa Jetisu oblısımen qatısı joq bolıp şıqtı. Bwl san aldağı sot otırısında tağıda ösui mümkin.

Basqarma ökili Azamat Maratwlı sot aldında tergeu kezinde eşqanday azamattıq şağım tüsirmegenderin jäne aldağı uaqıtta talap arız bergen kezde bwl cifrlardı qayta qaraytındarın ayttı. Sonımen qatar, basqarma ökiliniñ tergeu amaldarına qanşa ret kelgeni jäne qwjattarmen qaşan tanısqanı turalı tüsiniktemelerinde qayşılıqtar tuındap, advokat onı «jalğan ayğaq beru» dep ayıptadı. Sud'ya jäbirlenuşi ökiline eskertu jasap, barlıq issapar qwjattarın sotqa ötkizudi mindettedi.

Sot procesi ayaqtalğan soñ, şığın köleminiñ azayuına qatıstı Almasbek Sadırbaevtan pikir swradıq.

Ol: «Bwl tergeudiñ qateligi. Tapaday tal tüste 300 million teñgege qate jibergen. İstiñ de, tergeudiñ de şalalığı osınday nätijege alıp kelip otır», – dep mälimdedi.

PS. Qonaevtağı bwl process memlekettik organdar men tergeuşilerdiñ ayıptau aktisin dayındauda qanşalıqtı nemqwraylılıq tanıtqanın körsetti. Milliardtağan «jasandı uşerbter» sot zalında advokattardıñ naqtı zañdıq swraqtarınan keyin bir-birlep qwlap jatır. Eñ soraqısı zañ üstemdigin ornatuı tiis sot ğimaratınıñ işinde ayıptaluşılarğa fizikalıq küş körsetilui eldegi sot jüyesiniñ transparenttiligine ülken köleñke tüsiredi.

«The Qazaq Times» sot barısın jiti baqılauda wstaydı.

The Qazaq Times