Eñbek jäne halıqtı äleumettik qorğau ministri Birjan Nwrımbetov. Foto: aşıq derekköz

El azamattarı men şeteldik kadrlar arasındağı alalauğa, eñbekaqı ayırmaşılığına aqırı ministr moyın bwrdı.

Eñbek jäne halıqtı äleumettik qorğau ministri Birjan Nwrımbetov Atırau oblısındağı mwnay jäne gaz öñdeu zauıtına saparı kezinde jıldar boyı qoğamnıñ bası aşıq mäseleleriniñ biri qazaqstandıqtar men şeteldik mamandardıñ jalaqılarındağı ayırmaşılıq turalı mälimdeme jasadı. Bilik tarapınan alğaşğı moyındau siyaqtı körindi.

Zauıt wjımımen kezdesude Nwrımbetov özi basqaratın vedomstvo bas prokuraturamen birlesip, şeteldik jwmıs küşin tartqan eldegi 50 şaqtı käsiporınğa tekseris jürgizgenin ayttı.

– Osı jıldıñ 8 qazanında 49 käsiporında tekseris ayaqtaldı, 791 eñbek jäne köşi-qon zañnamasın bwzu deregi anıqtaldı. Onıñ işinde jalaqı jäne sıyaqı tölemderindegi säykessizdik te bar – 24 käsiporında 476 derek. Mısalı, Atırau oblısında "Neftestroyservis LTD" JŞS jergilikti injenerge bir sağattıq tariftik mölşerlemeni 568 teñge, al osığan wqsas qızmettegi şeteldik jwmısşı üşin 6500 teñge etip belgilegen. Mwnday täjiribege jol berilmeydi, – dedi ministr.

Onıñ sözinşe, 2019 jılğa şeteldik mamandarğa 48,7 mıñ (jwmıs küşine 0,54%) orın kvota retinde bölingen. 2019 jılğı 1 qırküyektegi jağday boyınşa  2425 kompaniyağa jergilikti organdar  18 mıñ 533 şeteldik kadrğa rwqsat bergen jäne merzimi wzartılğan.

Nwrımbetov jwmıs beruşiler Qazaqstan azamattarı men şeteldik jwmısşılarğa birdey eñbek jağdayın jasap, birdey jalaqı töleui kerek deydi.

Eñbek, äleumettik qorğau jäne köşi-qon komitetiniñ mälimetine qarağanda, biıl Atırau oblısında 364 jwmıs beruşi 9 mıñnan astam şeteldik azamattı jwmısqa tartqan, olardıñ 63-i (0,7%) birinşi sanatqa (basşılar men olardıñ orınbasarları), ekinşisi (menedjerlerge) qwrılımdıq bölinister) – 1 475 (16,5%), üşinşi (mamandar) üşin – 5 332 (59%), törtinşi (bilikti jwmıskerler üşin – 1 146 (13%), mausımdıq jwmıskerler – 910 (10.11%) İşki korporativtik audarım böligi retinde audarılğan – 78 (1%).

«Sonday-aq, respublika boyınşa tekseru barısında şeteldik qızmetkerlerdiñ berilgen rwqsatqa nemese jasalğan eñbek şartına säykes kelmeytin mamandıq boyınşa jwmıs atqaruınıñ 183 faktisi anıqtaldı. Jürgizilgen jwmıs nätijeleri boyınşa 447 rwqsat keri qaytarıldı. Anıqtalğan tärtip bwzuşılıq faktileri boyınşa jwmıs beruşilerge 50 wyğarım berilip, 33,7 mln teñgeden astam somağa 83 äkimşilik ayıppwl salındı», –dep tolıqtırdı Birjan Nwrımbetov.

Jauaptı organdar men käsiporındardıñ alalauşılığı äli de tüpkilikti şeşimin taba qoyğan joq. Soñğı kezderi jiilegen jwmısşı azamattardıñ bas köteruleri orın almağan jağdayda wzaq uaqıt qordalanğan señ qozğalmas ta edi.

"The Qazaq Times"