ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ. فوتو: اشىق دەرەككوز

ەل ازاماتتارى مەن شەتەلدىك كادرلار اراسىنداعى الالاۋعا، ەڭبەكاقى ايىرماشىلىعىنا اقىرى مينيستر مويىن بۇردى.

ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ اتىراۋ وبلىسىنداعى مۇناي جانە گاز وڭدەۋ زاۋىتىنا ساپارى كەزىندە جىلدار بويى قوعامنىڭ باسى اشىق ماسەلەلەرىنىڭ ءبىرى قازاقستاندىقتار مەن شەتەلدىك مامانداردىڭ جالاقىلارىنداعى ايىرماشىلىق تۋرالى مالىمدەمە جاسادى. بيلىك تاراپىنان العاشعى مويىنداۋ سياقتى كورىندى.

زاۋىت ۇجىمىمەن كەزدەسۋدە نۇرىمبەتوۆ ءوزى باسقاراتىن ۆەدومستۆو باس پروكۋراتۋرامەن بىرلەسىپ، شەتەلدىك جۇمىس كۇشىن تارتقان ەلدەگى 50 شاقتى كاسىپورىنعا تەكسەرىس جۇرگىزگەنىن ايتتى.

– وسى جىلدىڭ 8 قازانىندا 49 كاسىپورىندا تەكسەرىس اياقتالدى، 791 ەڭبەك جانە كوشى-قون زاڭناماسىن بۇزۋ دەرەگى انىقتالدى. ونىڭ ىشىندە جالاقى جانە سىياقى تولەمدەرىندەگى سايكەسسىزدىك تە بار – 24 كاسىپورىندا 476 دەرەك. مىسالى، اتىراۋ وبلىسىندا "نەفتەسترويسەرۆيس لتد" جشس جەرگىلىكتى ينجەنەرگە ءبىر ساعاتتىق تاريفتىك مولشەرلەمەنى 568 تەڭگە، ال وسىعان ۇقساس قىزمەتتەگى شەتەلدىك جۇمىسشى ءۇشىن 6500 تەڭگە ەتىپ بەلگىلەگەن. مۇنداي تاجىريبەگە جول بەرىلمەيدى، – دەدى مينيستر.

ونىڭ سوزىنشە، 2019 جىلعا شەتەلدىك ماماندارعا 48,7 مىڭ (جۇمىس كۇشىنە 0,54%) ورىن كۆوتا رەتىندە بولىنگەن. 2019 جىلعى 1 قىركۇيەكتەگى جاعداي بويىنشا  2425 كومپانياعا جەرگىلىكتى ورگاندار  18 مىڭ 533 شەتەلدىك كادرعا رۇقسات بەرگەن جانە مەرزىمى ۇزارتىلعان.

نۇرىمبەتوۆ جۇمىس بەرۋشىلەر قازاقستان ازاماتتارى مەن شەتەلدىك جۇمىسشىلارعا بىردەي ەڭبەك جاعدايىن جاساپ، بىردەي جالاقى تولەۋى كەرەك دەيدى.

ەڭبەك، الەۋمەتتىك قورعاۋ جانە كوشى-قون كوميتەتىنىڭ مالىمەتىنە قاراعاندا، بيىل اتىراۋ وبلىسىندا 364 جۇمىس بەرۋشى 9 مىڭنان استام شەتەلدىك ازاماتتى جۇمىسقا تارتقان، ولاردىڭ 63-ءى (0,7%) ءبىرىنشى ساناتقا (باسشىلار مەن ولاردىڭ ورىنباسارلارى), ەكىنشىسى (مەنەدجەرلەرگە) قۇرىلىمدىق بولىنىستەر) – 1 475 (16,5%), ءۇشىنشى (ماماندار) ءۇشىن – 5 332 (59%), ءتورتىنشى (بىلىكتى جۇمىسكەرلەر ءۇشىن – 1 146 (13%), ماۋسىمدىق جۇمىسكەرلەر – 910 (10.11%) ىشكى كورپوراتيۆتىك اۋدارىم بولىگى رەتىندە اۋدارىلعان – 78 (1%).

«سونداي-اق، رەسپۋبليكا بويىنشا تەكسەرۋ بارىسىندا شەتەلدىك قىزمەتكەرلەردىڭ بەرىلگەن رۇقساتقا نەمەسە جاسالعان ەڭبەك شارتىنا سايكەس كەلمەيتىن ماماندىق بويىنشا جۇمىس اتقارۋىنىڭ 183 فاكتىسى انىقتالدى. جۇرگىزىلگەن جۇمىس ناتيجەلەرى بويىنشا 447 رۇقسات كەرى قايتارىلدى. انىقتالعان ءتارتىپ بۇزۋشىلىق فاكتىلەرى بويىنشا جۇمىس بەرۋشىلەرگە 50 ۇيعارىم بەرىلىپ، 33,7 ملن تەڭگەدەن استام سوماعا 83 اكىمشىلىك ايىپپۇل سالىندى»، –دەپ تولىقتىردى ءبىرجان نۇرىمبەتوۆ.

جاۋاپتى ورگاندار مەن كاسىپورىنداردىڭ الالاۋشىلىعى ءالى دە تۇپكىلىكتى شەشىمىن تابا قويعان جوق. سوڭعى كەزدەرى جيىلەگەن جۇمىسشى ازاماتتاردىڭ باس كوتەرۋلەرى ورىن الماعان جاعدايدا ۇزاق ۋاقىت قوردالانعان سەڭ قوزعالماس تا ەدى.

"The Qazaq Times"