Azamattıq belsendi Maks Boqaev abaqtıdan şıqqan kezi. Foto: Informburo.kz

18 aqpanda Atırau qalasınıñ №2 sotı belsendi Maks Boqaevqa üş jılğa äkimşilik qadağalau ornatu boyınşa tört şekteu qoydı. 2016 jılğı jer mitingilerinen keyin 5 jılğa sottalıp, 4 aqpanda qamaudan şıqqan Boqaevtı qadağalaudı Atırau qalası policiya departamenti wsınğan. Bwl turalı Azattıq radiosı habarladı.

Bwl – Boqaevqa qoyılğan ekinşi äkimşilik şekteu. Bwğan deyin Atıraudağı sot Atırau oblıstıq qılmıstıq atqaru jüyesi departamentiniñ ötinişi boyınşa Boqaevqa üş jıl äkimşilik qadağalau tağayındağan. Belsendi bwl şekteuge apellyaciyalıq şağım tüsirgenimen, Atırau oblıstıq sotı qanağattandırmadı.

Atırau qalası policiya departamenti sottan Boqaevqa jeti şekteu qoyudı swrağan edi. Olar “Bas bostandığınan ayıru orındarınan bosatılğan adamdardı äkimşilik qadağalau turalı” zañğa süyenip, arızdanğan. Sud'ya Däurenbek Daumov departamenttiñ tört wsınısın qanağattandırdı.

Sot şeşimine say. Boqaevqa üş jılğa mınanday şekteuler qoyıldı:

  • Äkimşilik baqılau jürgizetin policiya basşılığınıñ jazbaşa rwqsatınsız jeke ne şarualarımen Atırau qalasınan şığuğa tıyım salındı;
  • Jwmıs künderi tüngi onnan tañğı altığa deyin jäne mereke men demalıs künderi jwmısqa qatıstı mindettemesinen bölek twrğılıqtı jerinen şığuına tıyım salındı;
  • Köşelerde, alañdarda, baqtar men skverlerde, köñil köteretin nısandarda jäne basqa da qoğamdıq orındarda qoğamdıq mañızı bar mäselelerdi talqılau men pikir bildiruge tıyım salındı;

Äkimşilik baqılau merzimi işinde policiya organdarı bekitken uaqıtta tirkelu üşin Atırau qalalıq policiya basqarmasına ayına bir ret belgilenui tiis.

Sot “ata-anası ne zañdı ökiliniñ rwqsatınsız jasöspirimdermen aralasuına, olarmen telefon ne basqa täsilmen habarlasuına bolmaydı” jäne “işimdik işuge, esirtki, psihotrop zattardı qoldanuğa tıyım salu” degen eki şekteudi qoldamadı.

Bwğan qosa, sot policiyanıñ “Boqaev ayına policiyağa üş ret kelip belgilenui tiis” degen wsınısına “ayına bir ret kelip tirkelse jetkilikti” dep taptı. Sot şeşimi küşine engen joq, qos taraptıñ apellyaciyalıq şağım tüsiruge qwqığı bar. Al Qılmıstıq kodekstiñ 431-babında äkimşilik qadağalaudı bwzğandarğa bir jıl bas bostandığınan ayıru ya şekteu jazası qarastırılğan.

Boqaev sotta jazanı ötep şıqqanın, bwl şekteulerdiñ negizsiz ekenin ayttı. Belsendi Azattıqqa advokatı Janar Sündetqalievamen aqıldasıp, appelyaciyalıq şağım tüsiretinin, aldağı uaqıtta BWW Adam qwqığı komitetine de şağımdanatının jetkizdi.

“The Qazaq Times”