Qazaqstandağı "sayasi twtqındardı bosatu" talabın el azamattarı men älemdik wyımdar da talap etude. Körneki kollaj. Foto: aşıq derekközderden

9 qırküyek Jenevadağı BWW jäne bügin Freedom House halıqaralıq qwqıq qorğau wyımı Qazaqstan biligin sayasi twtqındardı bosatuğa şaqırdı.

BWW Adam qwqıqtarı jönindegi keñesiniñ 42-sessiyanıñ aşıluında  wyımnıñ adam qwqıqtarı jönindegi joğarğı komissarı Mişel' Baçelet «Qazaqstandağı adam qwqığı jağdayı» turalı bayandamasında biıl naurızınan beri  ötip jatqan «narazılıq akciyaları kezinde 4 mıñnan astam adam wstalğanın» mälimdedi.

Azattıq taratqan habarğa säykes, komissar Baçelet «sayasi twtqın sanalatın azamattardı qamauda wstau men oppoziciyanıñ beybit jinaluın şekteu şınayı jäne aşıq dialogqa kedergi keltiredi» dep aytqan. Sonımen qatar, ol Qazaqstan biligin «Wlttıq qoğamdıq senim keñesine azamattıq qoğam ökilderin qosuğa», «özgeşe oylaytındardı qudalauğa qoldanılatın zañdardı özgertuge» şaqırğan.

Al Freedom House halıqaralıq qwqıq qorğau wyımı astanadan «Qazatomönerkäsip» kompaniyasınıñ bwrınğı basşısı, temir torda otırğanına 10 jıldan asqan 56 jastağı Mwhtar Jäkişevti dereu bosatuın talap etti. Qwqıq qorğauşılar tarapınan «Jazıqsız sayasi astarmen isti boldı» dep bağalanğan Jäkişev isine qatıstı osığan deyin 2015 jılı BWW adam qwqığı komiteti dereu bosatuın swrap, eskertu jasağan edi.

Wyımnıñ Euraziya bağdarlamaları boyınşa direktorı Mark Berendttiñ aytuınşa, Qazaqstan azamattıq jäne sayasi qwqıqtar boyınşa halıqaralıq paktige qol qoyğan el retinde isti ädil äri aşıq qarauı tiis, äytpegende «Qazaqstan biligi adam qwqığın qorğau jäne zañ üstemdigin qamtamasız etu boyınşa halıqaralıq mindetin bwzadı».

Wyım talabı retinde «Qazaqstan biligi Mwhtar Jäkişevti türmeden dereu bosatıp, sol arqılı halıqaralıq zañdardı saqtaytının jäne sıylaytının däleldeui tiis» dedi Mark Berendt.

14 jıl jazağa kesilgen Mwhtar Jäkişev türmede üşinşi top mügedegi bolıp qaldı, şildeniñ 24-i  Semey qalalıq №2 sotı onıñ türme därigerleriniñ rastauımen densaulıq jağdayına baylanıstı merziminen bwrın şarttı bostandıqqa şığaru turalı ötinişin qanağattandırudan bas tartqan. Apellyaciyalıq şağım boyınşa bügin de Semeyde kezekti sot otırısı ötude.

Sayasi özgerister jiilegen twsta halıqtıñ sayasatqa nazarı auıp, bilikke naqtı qwqıqtıq talaptar qoya bastadı. Özge mäselelerden bölek bir «sayasi twtqındardı bosatu» taqırıbı boyınşa üş aydıñ özinde eldiñ är aymağında 40-qa tarta piket-miting, narazılıqtar bolıp ötti.

"The Qazaq Times"