Eñbek jäne Halıqtı äleumettik qorğau ministri qızmetine kirisken Birjan Nwrımbetov. Foto: aşıq derekközderden

El prezidenti Qasım-Jomart Toqaevtıñ jaña jarlığı boyınşa 51 jastağı Birjan Nwrımbetov Eñbek jäne Halıqtı äleumettik qorğau ministri bolıp tağayındaldı. 

Jarlıqpen jañarğan kreslo ieleriniñ jolı

Jaqsılıqqa jarımay-aq qoyğan jwrttı äleumettik ömirimen eñbegin qorğauğa «talpınğan» organnıñ basşısı jaña jarlıqpen jañarıp ülgerdi.

Bilim ministrliginen (Täuelsizdik jıldarı 16 ministr auıstırğan – avt.)  keyingi basşılığına baylanıstı eñ jii jarlıq şığarılatın vedomstvanıñ soñğı eki jılda basınan bwlt arılmay-aq qoydı. Olay deuimizge sebep joq ta emes. 2018 jılı 9 aqpan sol kezdegi prezident N.Nazarbaev äleumettik medicinalıq saqtandırudıñ jüzege asırıluına qatıstı sınap, «Men osını bes jıl boyı aytıp kelemin. Naqtı tapsırmalar da berdim. Alayda ol azamattarmen eşkim tığız aynalısıp jatqan joq. Ministr Düysenovağa (Eñbek jäne halıqtı äleumettik qorğau ministri - avt.) da talay ret ayttım. Ne boldı? Tamara, al aytşı? Älde şarşadıñ ba mına jwmıstan?», – degen edi. Sol küni-aq  2017 jıldıñ 25 qañtarınan bergi Eñbek jäne halıqtı äleumettik qorğau ministri Tamara Bosımbekqızı qızmetinen alınıp, ornına Mädina Erasılqızı tağayındalğan.

Bir jılday ministr qızmetinde bolğan Tamara Düysenova. Foto: aşıq derekköz

Biıl qıs auasında el astanasında ata-anası tüngi auısım boyınşa jwmısqa ketken otbasınıñ bes birdey perzenti ört işinde qalıp qoyıp köz jwmğan auır tragediya orın alğan bolatın. Qazaqstandıq «analardı millionerge» balağan Mädina Äbilqasımova men onıñ orınbasarı Svetlana Jaqıpovanıñ nelikten ata-analar tünde jwmıs isteuge mäjbür degen saualğa «Bwl olardıñ tañdauı» jüre bergen jauabı qoğamdı aşındırıp,  narazılığın tudırğan edi. Köpbalalı äyelderdiñ äleumettik sayasatqa köñili tolmaytındığı turalı, äleumettik äljuaz toptarğa memlekettik qoldaudıñ älsizdigine narazı analar birneşe qarsılıq şaraların wyımdastırdı. Osıdan keyin Nazarbaev «eldiñ mäselesin şeşe almadı» degen uäjben ükimetti taratqanı esimizde. 25 aqpan Sağıntaevtıñ ükimeti taradı degen atı bolmasa, oyınşıları jay statustarın özgertip «qayta qwrılğanday» bolğan jaña ministrler kabinetine Berdibek Saparbaev qayta (2007-2009 j.j. osı qızmette bolğan – avt.) Eñbek ministri bolıp keldi.

9.01.2018-25.02.2019 j.j. aralığında ministr lauazımın atqarğan, qoğam sınına wşırağan Mädina Äbilqasımova. Foto: aşıq derekköz

Köp wzamay qısqı «Nwr Otan» s'ezinde «Kömekke asa mwqtaj jäne köp balalı otbasılar biılğı 1 säuirden qalmay äleumettik kömek aluı qajet» degen eks-prezident N.Nazarbaevtıñ tapsırması berildi. Memlekettik qwrılımda 40 jaldan astam täjiribesi bar, belgili şeneunik Berdibek Maşbekwlınıñ jeti aylıq lauazımı twsında AÄK (ataulı äleumettik kömek) ülestiru isi jürgizilgen bolatın. Soğan qaramastan sağım uädemen sağımızdı sındırdı degen analardıñ qwzırlı mekemelerge qarata aytılğan narazılıq akciyaları qalıptı jağdayğa aynaldı. Aqorda aldında, Ükimet üyinde, odan özge aymaqtardağı äkimdikterde ondağan jiındar tikeley efirlerden berildi. Saparbaev atalmış şaralarda dialogqa tüsuge tırısıp, mäsele tek zañ şeñberinde ğana şeşiletinin aytqan edi. Ministrlik tarapınan jiberilgen zerdeleu tetikteriniñ kemşiliginen vedomstvo jariyalağanday 21 mıñ otbası AÄK alu üşin tabısın jasırğan. Eñ bastısı şınğan analar qatarı azaya qoyğan joq, balalı äyelder mektepke dayındıq  mäsele tudırıp otırğanın aytadı.

42 jıldıq täjiribesi bar belgili şeneunik B.Saparbaev astanalıq analar narazılığında. Foto: Azattyq.org

Äne-mine degenşe, qızıliñir tayandı degendey, keşe 2017 jıldan beri 4-şi Eñbek jäne Halıqtı äleumettik qorğau ministri tağayındaldı. Jaña eñbek ministrin ükimet basşısı Asqar Maminniñ özi qolın qısıp twrıp, äleumettik salada 20 jıldıq jwmıs täjiribesi barın aytıp, Birjan Nwrımbetovtı tanıstırdı.

Jaña jarlıqtıñ keyipkeri, eski kreslonıñ jaña iesi Birjan Bidaybekwlı 51 jasta, nağız el ağası retinde bilek sıbana eñbek örnegin körsetetin şaqta eken. Matematik-praktik, qarjıger mamandığı boyınşa joğarı bilimi bar Nwrımbetov 1997 jıldan beri atalmış ministrlikke qarastı qwrılımdarda ärtürli qızmet atqarğan.

Su jaña Eñbek ministri Birjan Nwrımbetov. Foto: aşıq derekköz

Atqa qonğan azamatttarğa aq joldan aynımay, altı alaştıñ alğısına bölenuin tilek etemiz. Tileules bola twra, kreslo kiesin eske salamız.

Ministrlik mindettemeleri

1996 jılı Eñbek ministrligi men Halıqtı äleumettik qorğau ministrligi taratılıp, qayta biriktirilu negizinde qwrılğan Eñbek jäne Halıqtı äleumettik qorğau ministrligine jüktelgen parız-mindettemeler reti tömendegidey:

  • eñbek, jwmıspen qamtu, halıqtı äleumettik qorğau jäne eñbek resurstarın tiimdi paydalanu salasındağı memlekettik sayasattıñ negizgi bağıttarın äzirleu jäne olardı jüzege asıru;
  • jwmıssızdıq deñgeyin azaytu jäne kedeylik auqımın qısqartu jönindegi memlekettik sayasattı jüzege asıruğa qatısu;
  • äleumettik äriptestik salasında memlekettik sayasattı jüzege asıru;
  • jinaqtauşı zeynetaqı salasında memlekettik sayasattı jüzege asıru;
  • eñbek, eñbek qorğau, jwmıspen qamtu, zeynetaqımen qamsızdandıru jäne äleumettik qorğau turalı zañnamanıñ saqtaluına memleketgik baqılaudı qamtamasız etu;
  • zañnamamen jüktelgen özge de mindetterdi jüzege asıru.

HHİ ğasırdağı qazaqstandıq eñbek ministrleri

2001 jılı 22 qaraşadan – Güljan Janpeyisqızı Qarağwsova

2006 jılı 18 qañtardan – Güljan Janpeyisqızı Qarağwsova

2007 jıl 27 tamızdan– Berdibek Maşbekwlı Saparbaev

2009 jıl tamızdan – Gülşara Äbdiqalıqova

2012 jıl 26 qırküyekten –  Serik Saqbaldıwlı Äbdenov

2017 jıl 25 qañtardan – Tamara Bosımbekqızı Düysenova

2018 jıl 9 aqpannan – Äbilqasımova Mädina Erasılqızı

2019 jıl 25 aqpannan – Berdibek Maşbekwlı Saparbaev

2019 jılğı 20 tamızdan – Birjan Bidaybekwlı Nwrımbetov

"The Qazaq Times"