AÖSŞK Sırtqı ister ministrleriniñ VI otırısı. Foto: CICA Secretariat Facebook paraqşasınan

Toqaev Nazarbaevtı Aziya elderiniñ basın qosatın CICA (qazaqşa AESŞK) wyımnıñ Danalar keñesiniñ törağası qızmetine wsındı.

Qazaqstannıñ eks-prezidenti Nwrswltan Nazarbaev Aziyadağı özara is-qimıl jäne senim şaraları jönindegi keñestiñ (AÖSŞK) Danalar keñesin basqaruı mümkin. Onıñ kandidaturasın qazirgi prezident Toqaev astanada ötip jatqan AÖSŞK Sırtqı ister ministrleriniñ VI otırısında wsındı.

AÖSŞK jañğırtudı jalğastıru maqsatında Qazaqstan bıltır qolğa alğan törağalığın 2024 jılğa deyin wzartu turalı wsınıs jasadı.

Danalar keñesi özara qarım-qatınastağı senimdi nığaytudıñ türli şaraların iske asıruğa bağıttalğan wsınım äzirleu üşin qwrılğan.

AÖSŞK – öñirdegi mäselelerdi talqılauğa jäne şınayı ıntımaqtastıqtı damıtuğa arnalğan Jalpıaziyalıq dialog alañı. Özara is-qimıldıñ bes negizgi bağıtı retinde ekonomikalıq, äskeri-sayasi, gumanitarlıq jäne ekologiyalıq ölşem, sonday-aq jaña sın-qaterler salası ayqındalğan.

Osığan deyin Nazarbaev Aziyadağı özara is-qimıl jäne senim şaraları jönindegi keñestiñ negizin qalauşı. Ol bwl ideyanı 1992 jılğı qazanda BWW Bas Assambleyasınıñ 47-sessiyasında wsınğan edi. AÖSŞK birinşi sammiti 2002 jılı ötti. Qazir bwl wyımğa BAÄ, Resey, Şrilanka, V'etnam, Türkiya, Izaril', Koreya Respublikası qatarlı 26 memleket müşe. 5 qazan AÖSŞK küni retinde bekitilgen.

Bwdan aldıñğı Duşanbede (Täjikstan) ötken V sammitte «AÖSŞK-tiñ qauipsiz jäne örkendegen aymağınıñ jalpı körinisi» deklaraciyası qabıldanğan. Qwjatta wyımnıñ negizin qalauşı retinde Nazarbaevtıñ erekşe röli men qosqan ülesi atalıp, qwrmet körsetilgen edi. Endi «Danalar keñesiniñ» basşısı atanbaq.

The Qazaq Times