Körneki suret. Foto: aşıq derekköz

Qazaqstanda üştiktiñ auıs-tüyisi üş künge sozıldı. Äkim – ministrler – orınbasar triadası arasında örbigen kadrlıq tağayındau jürisi «reformaşıl» «Estitin biliktiñ» eski dästürinen jañılmağanın körsetti.

Mañğıstau oblısındağı quañşılıq jwtqa aynalğan şaqta şarualar tarapınan mäselege der kezinde äreket etpedi dep köp sınalğan öñir äkimi Serik Twrımov lauazımınan bosatılğan boyda Parlament Senatınan orın aldı. Aymaqtağı jartı ğasırda bolmağan auır ahualdı Tötenşe jağday retinde jariyalauğa layıqsız körgen jergilikti atqaruşı bilik basşısı qoğam sınına qaramastan prezident Toqaev jarlığımen senat deputatı atandı.

57 jastağı Serikbay Twrımov 2019 jıldıñ mausımınan 2021 jıldıñ qırküyegine deyin Mañğıstau oblısın basqardı. Käsibi boyınşa injener-qwrılısşı.

Al onıñ eki jıl otırğan qızmetine, yağni Mañğıstau oblısı äkimi şenine eks-energetika ministri Nwrlan Noğaev tağayındaldı. Qazaqstandağı kadrlıq auıs-tüyistiñ jazılmağan zañına säykes, basşınıñ ornın orınbasarı basadı, sonday-aq basşı joğarı jaqtıñ pärmen küşimen «şegirtke şeneunik» keypinde özine beytanıs kez kelgen salağa auısa beredi. Noğaev basqarğan vedomstvoğa küni keşege deyin ekologiya ministri bolğan Mağzwm Mırzağaliev bardı. Ekologiya, geologiya jäne tabiği resurstar ministri retinde ädettegidey osığan deyingi vice-ministr 48 jastağı Serikqali Brekeşov keldi.

Brekeşov 2020 jıldıñ naurız ayınan beri ekologiya, geologiya jäne tabiği resurstar vice-ministri bolğan. Onıñ aldında «QazTransGaz» kompaniyasında türli qızmet atqarğan. Mwnay-gaz kenişterin igeru salasında mamandanğan.

Azamattıq qoğam men täuelsiz sayasi sarapşılar qazaqstandıq dästür boyınşa qosılğıştardıñ ornın auıstırğanımen, qosındı mänin özgertpeytin mwnday kadrlıq tağayındau ädisi nätijesiz ekenin jii sınaydı. Dese de ministrlek kabineti men aymaq basşıların tağayındau tek bilik şıñında şeşiledi, halıq talabı men pikiri eskerilmeytin zañdılıq bwrınğışa özgerissiz qalıp otır.

The Qazaq Times