ەڭبەك جانە حالىقتى الەۋمەتتىك قورعاۋ ءمينيسترى قىزمەتىنە كىرىسكەن ءبىرجان نۇرىمبەتوۆ. فوتو: اشىق دەرەككوزدەردەن

ەل پرەزيدەنتى قاسىم-جومارت توقاەۆتىڭ جاڭا جارلىعى بويىنشا 51 جاستاعى ءبىرجان نۇرىمبەتوۆ ەڭبەك جانە حالىقتى الەۋمەتتىك قورعاۋ ءمينيسترى بولىپ تاعايىندالدى. 

جارلىقپەن جاڭارعان كرەسلو يەلەرىنىڭ جولى

جاقسىلىققا جارىماي-اق قويعان جۇرتتى الەۋمەتتىك ومىرىمەن ەڭبەگىن قورعاۋعا «تالپىنعان» ورگاننىڭ باسشىسى جاڭا جارلىقپەن جاڭارىپ ۇلگەردى.

ءبىلىم مينيسترلىگىنەن (تاۋەلسىزدىك جىلدارى 16 مينيستر اۋىستىرعان – اۆت.)  كەيىنگى باسشىلىعىنا بايلانىستى ەڭ ءجيى جارلىق شىعارىلاتىن ۆەدومستۆانىڭ سوڭعى ەكى جىلدا باسىنان بۇلت ارىلماي-اق قويدى. ولاي دەۋىمىزگە سەبەپ جوق تا ەمەس. 2018 جىلى 9 اقپان سول كەزدەگى پرەزيدەنت ن.نازارباەۆ الەۋمەتتىك مەديتسينالىق ساقتاندىرۋدىڭ جۇزەگە اسىرىلۋىنا قاتىستى سىناپ، «مەن وسىنى بەس جىل بويى ايتىپ كەلەمىن. ناقتى تاپسىرمالار دا بەردىم. الايدا ول ازاماتتارمەن ەشكىم تىعىز اينالىسىپ جاتقان جوق. مينيستر دۇيسەنوۆاعا (ەڭبەك جانە حالىقتى الەۋمەتتىك قورعاۋ ءمينيسترى - اۆت.) دا تالاي رەت ايتتىم. نە بولدى؟ تامارا، ال ايتشى؟ الدە شارشادىڭ با مىنا جۇمىستان؟»، – دەگەن ەدى. سول كۇنى-اق  2017 جىلدىڭ 25 قاڭتارىنان بەرگى ەڭبەك جانە حالىقتى الەۋمەتتىك قورعاۋ ءمينيسترى تامارا بوسىمبەكقىزى قىزمەتىنەن الىنىپ، ورنىنا ءمادينا ەراسىلقىزى تاعايىندالعان.

ءبىر جىلداي مينيستر قىزمەتىندە بولعان تامارا دۇيسەنوۆا. فوتو: اشىق دەرەككوز

بيىل قىس اۋاسىندا ەل استاناسىندا اتا-اناسى تۇنگى اۋىسىم بويىنشا جۇمىسقا كەتكەن وتباسىنىڭ بەس بىردەي پەرزەنتى ءورت ىشىندە قالىپ قويىپ كوز جۇمعان اۋىر تراگەديا ورىن العان بولاتىن. قازاقستاندىق «انالاردى ميلليونەرگە» بالاعان ءمادينا ابىلقاسىموۆا مەن ونىڭ ورىنباسارى سۆەتلانا جاقىپوۆانىڭ نەلىكتەن اتا-انالار تۇندە جۇمىس ىستەۋگە ءماجبۇر دەگەن ساۋالعا «بۇل ولاردىڭ تاڭداۋى» جۇرە بەرگەن جاۋابى قوعامدى اشىندىرىپ،  نارازىلىعىن تۋدىرعان ەدى. كوپبالالى ايەلدەردىڭ الەۋمەتتىك ساياساتقا كوڭىلى تولمايتىندىعى تۋرالى، الەۋمەتتىك ءالجۋاز توپتارعا مەملەكەتتىك قولداۋدىڭ السىزدىگىنە نارازى انالار بىرنەشە قارسىلىق شارالارىن ۇيىمداستىردى. وسىدان كەيىن نازارباەۆ «ەلدىڭ ماسەلەسىن شەشە المادى» دەگەن ۋاجبەن ۇكىمەتتى تاراتقانى ەسىمىزدە. 25 اقپان ساعىنتاەۆتىڭ ۇكىمەتى تارادى دەگەن اتى بولماسا، ويىنشىلارى جاي ستاتۋستارىن وزگەرتىپ «قايتا قۇرىلعانداي» بولعان جاڭا مينيسترلەر كابينەتىنە بەردىبەك ساپارباەۆ قايتا (2007-2009 ج.ج. وسى قىزمەتتە بولعان – اۆت.) ەڭبەك ءمينيسترى بولىپ كەلدى.

9.01.2018-25.02.2019 ج.ج. ارالىعىندا مينيستر لاۋازىمىن اتقارعان، قوعام سىنىنا ۇشىراعان ءمادينا ابىلقاسىموۆا. فوتو: اشىق دەرەككوز

كوپ ۇزاماي قىسقى «نۇر وتان» سەزىندە «كومەككە اسا مۇقتاج جانە كوپ بالالى وتباسىلار بيىلعى 1 ساۋىردەن قالماي الەۋمەتتىك كومەك الۋى قاجەت» دەگەن ەكس-پرەزيدەنت ن.نازارباەۆتىڭ تاپسىرماسى بەرىلدى. مەملەكەتتىك قۇرىلىمدا 40 جالدان استام تاجىريبەسى بار، بەلگىلى شەنەۋنىك بەردىبەك ماشبەكۇلىنىڭ جەتى ايلىق لاۋازىمى تۇسىندا ااك (اتاۋلى الەۋمەتتىك كومەك) ۇلەستىرۋ ءىسى جۇرگىزىلگەن بولاتىن. سوعان قاراماستان ساعىم ۋادەمەن ساعىمىزدى سىندىردى دەگەن انالاردىڭ قۇزىرلى مەكەمەلەرگە قاراتا ايتىلعان نارازىلىق اكتسيالارى قالىپتى جاعدايعا اينالدى. اقوردا الدىندا، ۇكىمەت ۇيىندە، ودان وزگە ايماقتارداعى اكىمدىكتەردە ونداعان جيىندار تىكەلەي ەفيرلەردەن بەرىلدى. ساپارباەۆ اتالمىش شارالاردا ديالوگقا تۇسۋگە تىرىسىپ، ماسەلە تەك زاڭ شەڭبەرىندە عانا شەشىلەتىنىن ايتقان ەدى. مينيسترلىك تاراپىنان جىبەرىلگەن زەردەلەۋ تەتىكتەرىنىڭ كەمشىلىگىنەن ۆەدومستۆو جاريالاعانداي 21 مىڭ وتباسى ااك الۋ ءۇشىن تابىسىن جاسىرعان. ەڭ باستىسى شىنعان انالار قاتارى ازايا قويعان جوق، بالالى ايەلدەر مەكتەپكە دايىندىق  ماسەلە تۋدىرىپ وتىرعانىن ايتادى.

42 جىلدىق تاجىريبەسى بار بەلگىلى شەنەۋنىك ب.ساپارباەۆ استانالىق انالار نارازىلىعىندا. فوتو: Azattyq.org

انە-مىنە دەگەنشە، قىزىلىڭىر تاياندى دەگەندەي، كەشە 2017 جىلدان بەرى 4-ءشى ەڭبەك جانە حالىقتى الەۋمەتتىك قورعاۋ ءمينيسترى تاعايىندالدى. جاڭا ەڭبەك ءمينيسترىن ۇكىمەت باسشىسى اسقار ءماميننىڭ ءوزى قولىن قىسىپ تۇرىپ، الەۋمەتتىك سالادا 20 جىلدىق جۇمىس تاجىريبەسى بارىن ايتىپ، ءبىرجان نۇرىمبەتوۆتى تانىستىردى.

جاڭا جارلىقتىڭ كەيىپكەرى، ەسكى كرەسلونىڭ جاڭا يەسى ءبىرجان بيدايبەكۇلى 51 جاستا، ناعىز ەل اعاسى رەتىندە بىلەك سىبانا ەڭبەك ورنەگىن كورسەتەتىن شاقتا ەكەن. ماتەماتيك-پراكتيك، قارجىگەر ماماندىعى بويىنشا جوعارى ءبىلىمى بار نۇرىمبەتوۆ 1997 جىلدان بەرى اتالمىش مينيسترلىككە قاراستى قۇرىلىمداردا ءارتۇرلى قىزمەت اتقارعان.

سۋ جاڭا ەڭبەك ءمينيسترى ءبىرجان نۇرىمبەتوۆ. فوتو: اشىق دەرەككوز

اتقا قونعان ازاماتتتارعا اق جولدان اينىماي، التى الاشتىڭ العىسىنا بولەنۋىن تىلەك ەتەمىز. تىلەۋلەس بولا تۇرا، كرەسلو كيەسىن ەسكە سالامىز.

مينيسترلىك مىندەتتەمەلەرى

1996 جىلى ەڭبەك مينيسترلىگى مەن حالىقتى الەۋمەتتىك قورعاۋ مينيسترلىگى تاراتىلىپ، قايتا بىرىكتىرىلۋ نەگىزىندە قۇرىلعان ەڭبەك جانە حالىقتى الەۋمەتتىك قورعاۋ مينيسترلىگىنە جۇكتەلگەن پارىز-مىندەتتەمەلەر رەتى تومەندەگىدەي:

  • ەڭبەك، جۇمىسپەن قامتۋ، حالىقتى الەۋمەتتىك قورعاۋ جانە ەڭبەك رەسۋرستارىن ءتيىمدى پايدالانۋ سالاسىنداعى مەملەكەتتىك ساياساتتىڭ نەگىزگى باعىتتارىن ازىرلەۋ جانە ولاردى جۇزەگە اسىرۋ;
  • جۇمىسسىزدىق دەڭگەيىن ازايتۋ جانە كەدەيلىك اۋقىمىن قىسقارتۋ جونىندەگى مەملەكەتتىك ساياساتتى جۇزەگە اسىرۋعا قاتىسۋ;
  • الەۋمەتتىك ارىپتەستىك سالاسىندا مەملەكەتتىك ساياساتتى جۇزەگە اسىرۋ;
  • جيناقتاۋشى زەينەتاقى سالاسىندا مەملەكەتتىك ساياساتتى جۇزەگە اسىرۋ;
  • ەڭبەك، ەڭبەك قورعاۋ، جۇمىسپەن قامتۋ، زەينەتاقىمەن قامسىزداندىرۋ جانە الەۋمەتتىك قورعاۋ تۋرالى زاڭنامانىڭ ساقتالۋىنا مەملەكەتگىك باقىلاۋدى قامتاماسىز ەتۋ;
  • زاڭنامامەن جۇكتەلگەن وزگە دە مىندەتتەردى جۇزەگە اسىرۋ.

ءححى عاسىرداعى قازاقستاندىق ەڭبەك مينيسترلەرى

2001 جىلى 22 قاراشادان – گۇلجان جانپەيىسقىزى قاراعۇسوۆا

2006 جىلى 18 قاڭتاردان – گۇلجان جانپەيىسقىزى قاراعۇسوۆا

2007 جىل 27 تامىزدان– بەردىبەك ماشبەكۇلى ساپارباەۆ

2009 جىل تامىزدان – گۇلشارا ابدىقالىقوۆا

2012 جىل 26 قىركۇيەكتەن –  سەرىك ساقبالدىۇلى ابدەنوۆ

2017 جىل 25 قاڭتاردان – تامارا بوسىمبەكقىزى دۇيسەنوۆا

2018 جىل 9 اقپاننان – ابىلقاسىموۆا ءمادينا ەراسىلقىزى

2019 جىل 25 اقپاننان – بەردىبەك ماشبەكۇلى ساپارباەۆ

2019 جىلعى 20 تامىزدان – ءبىرجان بيدايبەكۇلى نۇرىمبەتوۆ

"The Qazaq Times"