Körneki suret. Foto: https://zo4gw3d1rz

28 şildede Almatı oblısı Baqtıbay auılınıñ twrğındarı joldı jöndeu sapasına köñilderi tolmaytının aytıp, narazılıq akciyasın wyımdastırdı. Narazı twrğındar respublikalıq tas joldı japqan.

Auıl twrğındarı avtojoldıñ üylerdiñ tura qasında salınğanına narazılıq bildirgen. Twrğındardıñ aytuınşa, trassa mañındağı üylerdi su basuı mümkin nemese jol apatı bolsa, qanday da bir jük köligi üylerge soğıluı ıqtimal. Ondağan adam qatısqan akciya kezinde jergilikti bilik ökilderi halıqpen kezdesip, policeyler kölik qozğalısın qalpına keltirgen.

Osığan baylanıstı Almatı oblıstıq policiya departamenti: «Oqiğa ornına jetken tärtip saqşıları rwqsat etilmegen akciyanıñ qatısuşılarına zañğa qayşı äreket etuge bolmaytının tüsindirip, adamdardı joldan ığıstırıp, kölik qozğalısın qalpına keltirdi. Auıl twrğındarımen jergilikti atqaruşı organdardıñ ökilderi de kezdesip, halıqtıñ arız-şağımın tıñdap, qazir eldi mekenniñ problemaların şeşumen aynalısıp jatır», – dep mälimdedi. Vedomstvonıñ habarlauınşa, rwqsat etilmegen akciyanıñ wyımdastıruşıları men belsendi qatısuşılar äkimşilik jauapkerşilikke tartıladı.

Ayta keteyik, biıl narazılıq akciyaları jii orın alıp, biraz adam jauapkerşilikke tartılğan. Säuirde marafonğa bannermen şıqqan eki azamat 15 täulik qamauğa alınğan. Sol akciyanı tüsirgeni üşin üş adamğa 20 AEK köleminde ayıppwl salındı. Al 14 şildede e «Şañıraq isi» boyınşa sottalğan aqın Aron Atabektiñ qızı Aydana Aydarhan Almatıdağı Abay eskertkişiniñ aldında äkesiniñ sureti salınğan plakatpen poetikalıq akciya ötkizip, äkesiniñ öleñderin oqıp, onı bosatudı talap etken bolatın. Keyinnen Aydana Aydarhandı policiya äketip, 2 sağattan soñ bosatqan. Medeu audandıq prokurorı onı alğaş ret bwl iste bolğandığı üşin «keşiretindigin», biraq kelesi jolı äkimşilikten rwqsat swrauı kerektigin eskertti.

"The Qazaq Times"