الماتى وبلىسىنىڭ تۇرعىندارى تاس جولدى جاۋىپ تاستادى

28 شىلدەدە الماتى وبلىسى باقتىباي اۋىلىنىڭ تۇرعىندارى جولدى جوندەۋ ساپاسىنا كوڭىلدەرى تولمايتىنىن ايتىپ، نارازىلىق اكتسياسىن ۇيىمداستىردى. نارازى تۇرعىندار رەسپۋبليكالىق تاس جولدى جاپقان.

اۋىل تۇرعىندارى اۆتوجولدىڭ ۇيلەردىڭ تۋرا قاسىندا سالىنعانىنا نارازىلىق بىلدىرگەن. تۇرعىنداردىڭ ايتۋىنشا، تراسسا ماڭىنداعى ۇيلەردى سۋ باسۋى مۇمكىن نەمەسە جول اپاتى بولسا، قانداي دا ءبىر جۇك كولىگى ۇيلەرگە سوعىلۋى ىقتيمال. ونداعان ادام قاتىسقان اكتسيا كەزىندە جەرگىلىكتى بيلىك وكىلدەرى حالىقپەن كەزدەسىپ، پوليتسەيلەر كولىك قوزعالىسىن قالپىنا كەلتىرگەن.

وسىعان بايلانىستى الماتى وبلىستىق پوليتسيا دەپارتامەنتى: «وقيعا ورنىنا جەتكەن ءتارتىپ ساقشىلارى رۇقسات ەتىلمەگەن اكتسيانىڭ قاتىسۋشىلارىنا زاڭعا قايشى ارەكەت ەتۋگە بولمايتىنىن ءتۇسىندىرىپ، ادامداردى جولدان ىعىستىرىپ، كولىك قوزعالىسىن قالپىنا كەلتىردى. اۋىل تۇرعىندارىمەن جەرگىلىكتى اتقارۋشى ورگانداردىڭ وكىلدەرى دە كەزدەسىپ، حالىقتىڭ ارىز-شاعىمىن تىڭداپ، قازىر ەلدى مەكەننىڭ پروبلەمالارىن شەشۋمەن اينالىسىپ جاتىر»، – دەپ مالىمدەدى. ۆەدومستۆونىڭ حابارلاۋىنشا، رۇقسات ەتىلمەگەن اكتسيانىڭ ۇيىمداستىرۋشىلارى مەن بەلسەندى قاتىسۋشىلار اكىمشىلىك جاۋاپكەرشىلىككە تارتىلادى.

ايتا كەتەيىك، بيىل نارازىلىق اكتسيالارى ءجيى ورىن الىپ، ءبىراز ادام جاۋاپكەرشىلىككە تارتىلعان. ساۋىردە مارافونعا باننەرمەن شىققان ەكى ازامات 15 تاۋلىك قاماۋعا الىنعان. سول اكتسيانى تۇسىرگەنى ءۇشىن ءۇش ادامعا 20 اەك كولەمىندە ايىپپۇل سالىندى. ال 14 شىلدەدە ە «شاڭىراق ءىسى» بويىنشا سوتتالعان اقىن ارون اتابەكتىڭ قىزى ايدانا ايدارحان الماتىداعى اباي ەسكەرتكىشىنىڭ الدىندا اكەسىنىڭ سۋرەتى سالىنعان پلاكاتپەن پوەتيكالىق اكتسيا وتكىزىپ، اكەسىنىڭ ولەڭدەرىن وقىپ، ونى بوساتۋدى تالاپ ەتكەن بولاتىن. كەيىننەن ايدانا ايدارحاندى پوليتسيا اكەتىپ، 2 ساعاتتان سوڭ بوساتقان. مەدەۋ اۋداندىق پروكۋرورى ونى العاش رەت بۇل ىستە بولعاندىعى ءۇشىن «كەشىرەتىندىگىن»، بىراق كەلەسى جولى اكىمشىلىكتەن رۇقسات سۇراۋى كەرەكتىگىن ەسكەرتتى.

"The Qazaq Times"