Aqordada ötken "Köktem şuağı" attı merekelik kezdesuden. Foto: akorda.kz

Memleket basşısı qoğamımızdıñ damuındağı äyelderdiñ bağa jetpes rölin atap ötip, elimizdegi näzik jandar ökilderin kele jatqan Halıqaralıq 8 naurız merekesimen qwttıqtadı dep habarlaydı Aqordanıñ resmi saytında.

– Büginde Qazaqstan äyelderi elimizdiñ damuına ayrıqşa üles qosıp otır. Adamzattıñ näzik jandı ökilderi el ekonomikasınıñ türli salasında, sonımen qatar memlekettik qızmette, ğılımda, jeke bizneste, bilim beru men densaulıq saqtau salasında eñbek etude. Elimizde memlekettik qızmetşilerdiñ 55 payızın äyelder qwrap otır, – dedi Qazaqstan Prezidenti.

Aqordada ötken "Köktem şuağı" attı merekelik kezdesuden. Foto: akorda.kz

Elbası memleket jürgizip jatqan demografiyalıq sayasattıñ aspektilerine toqtalıp, ana men balağa qoldau körsetu jäne olardı qorğau mäselelerine nazar audardı.

– Biıl meniñ tapsırmammen 2030 jılğa deyingi otbasılıq jäne genderlik sayasat twjırımdaması iske asırıla bastaydı. Şilde ayında bala tuuğa baylanıstı tölenetin järdemaqı kölemi 20 payızğa ösedi. Jıl sayın ana men balağa qarastırılğan qarjılıq qoldau şığındarı 160 milliard teñge bolıp otır. Oğan qosa ata-analarğa 120 milliard teñge Memlekettik äleumettik saqtandıru qorı esebinen tölenip keledi. Soñğı on jılda biz ana ölimin 3,7 esege, bala ölimin bir jarım esege deyin tömendetuge qol jetkizdik, – dedi Memleket basşısı.

Aqordada ötken "Köktem şuağı" attı merekelik kezdesuden. Foto: akorda.kz

Bwdan bölek, Nwrswltan Nazarbaev elimizdegi genderlik sayasattı nığaytuğa bağıttalğan birqatar mindetti ayqındap berdi. Onıñ işinde otbası institutın nığaytu bastı mindettiñ biri bolıp sanaladı.

Bwl orayda Elbası Qazaqstanda erli-zayıptılardıñ jauapkerşilik arqalauğa dayın bolmauınıñ saldarınan nekege twrğan  ärbir üşinşi jwptıñ ajırasıp jatqanı jöninde mälimet keltirdi.

– Qazir elimizde ata-ananıñ tek bireuiniñ ğana asırauındağı tolıq emes jartı million otbası bar. Bwl mäseleni şeşu jöninde şaralar qabıldau qajet, – dedi Qazaqstan Prezidenti.

Sonımen birge, Memleket basşısı balalarğa qatıstı kez-kelgen zorlıq-zombılıqtı joyıp, öskeleñ wrpaq tärbiesin arnaulı üyirmeler men mekemelerde patriottıq sezimdi küşeytu arqılı qamtamasız etu qajettigine nazar audardı.

Aqordada ötken "Köktem şuağı" attı merekelik kezdesuden. Foto: akorda.kz

– Tört jılda bir ret olimpiada jeñimpazdarı jetekşilik etetin  Bükilqazaqstandıq balalar olimpiadasın ötkizu mümkindigin qarastıruğa boladı. Tağı bir mäsele – äyelderdiñ ortaşa kiris deñgeyi erkektermen salıstırğanda äli künge deyin üşten bir mölşerge tömen. Mwnday jağdaydıñ orın aluınıñ bastı sebebiniñ biri – Ükimet bekitken Äyelder eñbegin qoldanuğa tıyım salınğan jwmıstar tizimi, – dedi Nwrswltan Nazarbaev.

Elbası genderlik sayasattıñ basımdığı bar bir bağıtı retinde analar men balalar üşin qolaylı orta qalıptastıru, sonday-aq anağa degen sıylastıq mädenietin jandandıru qajettigin aytıp ötti.

– Bälkim, balalar üşin jalpıwlttıq aşıq esik künderin ötkizip otıru kerek bolar. Qwrmetti hanımdar, sizderdiñ qoldaularıñızben biz barlıq josparımızdı iske asıra alamız dep ümittenemin, – dedi Qazaqstan Prezidenti.

Memleket basşısı qazirgi sayasi jañğıru üderisi barısında äyelderdiñ zor röl atqaratınına senim bildirdi.

Kezdesuge qatısuşılar özderiniñ käsibi jäne kündelikti ömirindegi jetistikteri jöninde äñgimeledi.

Aqordada ötken "Köktem şuağı" attı merekelik kezdesuden. Foto: akorda.kz

Memleket basşısı is-şara soñında köp balalı ana O.Mwqaşevanı «Altın alqa» belgisimen marapattap, kezdesuge qatısuşılar üşin «Aqorda» rezidenciyası işinde ekskursiya jürgizdi.

Kezdesuge Memlekettik hatşı, Prezident janındağı Äyelder isteri jäne otbasılıq-demografiyalıq sayasat jönindegi wlttıq komissiya törayımı G.Äbdiqalıqova, Prezident Äkimşiliginiñ basşısı Ä.Jaqsıbekov, Parlament Mäjilisiniñ deputatı, Bala qwqıqtarı jönindegi uäkil Z.Balieva, Wlttıq ekonomika vice-ministri M.Äbilqasımova, mikrobiolog-ğalım Ä.Ernazarova, biatlonnan «Almatı-2017» universiadasınıñ jeñimpazı A.Şevçenko, auıldıq orta mektep direktorı I.Sedova, «Jas Atameken» jas käsipkerler klubınıñ prezidenti Z.Kökjanova, aqın T.Qabılşa, T.Jürgenov atındağı Qazaq Wlttıq öner akademiyasınıñ magistrantı M.Galickaya, «Teñizşevroyl» jauapkerşiligi şekteuli seriktestigi Adam resurstarı basqarmasınıñ bas menedjeri Ş.Altıbaeva, audandıq auruhananıñ bas därigeri Q.Razieva, «Astana-Balet» teatrınıñ jetekşi balerinası M.Bukanova, köp balalı ana O.Mwqaşeva, qobızdan halıqaralıq bayqaulardıñ jeñimpazı A.Täjibaeva, kämeletke tolmağandar isi jönindegi mamandandırılğan audanaralıq sot törağası N.Razzaq, Abay atındağı Qazaq memlekettik akademiyalıq opera jäne balet teatrınıñ änşisi O.Davıdenko, Qazaqstan Respublikası Qarulı Küşteriniñ Paraşyutpen sekiruge dayındau ortalığınıñ ağa mamanı R.Ramazanova, ärtis S.Baqaeva, jurnalist V.Mirlanqızı qatıstı.

«The Qazaq Times»