ن.نازارباەۆ ايەلدەر مەرەكەسىنە وراي اقوردادا «كوكتەم شۋاعى» اتتى كەزدەسۋ وتكىزدى

مەملەكەت باسشىسى قوعامىمىزدىڭ دامۋىنداعى ايەلدەردىڭ باعا جەتپەس ءرولىن اتاپ ءوتىپ، ەلىمىزدەگى نازىك جاندار وكىلدەرىن كەلە جاتقان حالىقارالىق 8 ناۋرىز مەرەكەسىمەن قۇتتىقتادى دەپ حابارلايدى اقوردانىڭ رەسمي سايتىندا.

– بۇگىندە قازاقستان ايەلدەرى ەلىمىزدىڭ دامۋىنا ايرىقشا ۇلەس قوسىپ وتىر. ادامزاتتىڭ نازىك جاندى وكىلدەرى ەل ەكونوميكاسىنىڭ ءتۇرلى سالاسىندا، سونىمەن قاتار مەملەكەتتىك قىزمەتتە، عىلىمدا، جەكە بيزنەستە، ءبىلىم بەرۋ مەن دەنساۋلىق ساقتاۋ سالاسىندا ەڭبەك ەتۋدە. ەلىمىزدە مەملەكەتتىك قىزمەتشىلەردىڭ 55 پايىزىن ايەلدەر قۇراپ وتىر، – دەدى قازاقستان پرەزيدەنتى.

اقوردادا وتكەن "كوكتەم شۋاعى" اتتى مەرەكەلىك كەزدەسۋدەن. فوتو: akorda.kz

ەلباسى مەملەكەت جۇرگىزىپ جاتقان دەموگرافيالىق ساياساتتىڭ اسپەكتىلەرىنە توقتالىپ، انا مەن بالاعا قولداۋ كورسەتۋ جانە ولاردى قورعاۋ ماسەلەلەرىنە نازار اۋداردى.

– بيىل مەنىڭ تاپسىرماممەن 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى ىسكە اسىرىلا باستايدى. شىلدە ايىندا بالا تۋعا بايلانىستى تولەنەتىن جاردەماقى كولەمى 20 پايىزعا وسەدى. جىل سايىن انا مەن بالاعا قاراستىرىلعان قارجىلىق قولداۋ شىعىندارى 160 ميلليارد تەڭگە بولىپ وتىر. وعان قوسا اتا-انالارعا 120 ميلليارد تەڭگە مەملەكەتتىك الەۋمەتتىك ساقتاندىرۋ قورى ەسەبىنەن تولەنىپ كەلەدى. سوڭعى ون جىلدا ءبىز انا ءولىمىن 3,7 ەسەگە، بالا ءولىمىن ءبىر جارىم ەسەگە دەيىن تومەندەتۋگە قول جەتكىزدىك، – دەدى مەملەكەت باسشىسى.

اقوردادا وتكەن "كوكتەم شۋاعى" اتتى مەرەكەلىك كەزدەسۋدەن. فوتو: akorda.kz

بۇدان بولەك، نۇرسۇلتان نازارباەۆ ەلىمىزدەگى گەندەرلىك ساياساتتى نىعايتۋعا باعىتتالعان بىرقاتار مىندەتتى ايقىنداپ بەردى. ونىڭ ىشىندە وتباسى ينستيتۋتىن نىعايتۋ باستى مىندەتتىڭ ءبىرى بولىپ سانالادى.

بۇل ورايدا ەلباسى قازاقستاندا ەرلى-زايىپتىلاردىڭ جاۋاپكەرشىلىك ارقالاۋعا دايىن بولماۋىنىڭ سالدارىنان نەكەگە تۇرعان  ءاربىر ءۇشىنشى جۇپتىڭ اجىراسىپ جاتقانى جونىندە مالىمەت كەلتىردى.

– قازىر ەلىمىزدە اتا-انانىڭ تەك بىرەۋىنىڭ عانا اسىراۋىنداعى تولىق ەمەس جارتى ميلليون وتباسى بار. بۇل ماسەلەنى شەشۋ جونىندە شارالار قابىلداۋ قاجەت، – دەدى قازاقستان پرەزيدەنتى.

سونىمەن بىرگە، مەملەكەت باسشىسى بالالارعا قاتىستى كەز-كەلگەن زورلىق-زومبىلىقتى جويىپ، وسكەلەڭ ۇرپاق تاربيەسىن ارناۋلى ۇيىرمەلەر مەن مەكەمەلەردە پاتريوتتىق سەزىمدى كۇشەيتۋ ارقىلى قامتاماسىز ەتۋ قاجەتتىگىنە نازار اۋداردى.

اقوردادا وتكەن "كوكتەم شۋاعى" اتتى مەرەكەلىك كەزدەسۋدەن. فوتو: akorda.kz

– ءتورت جىلدا ءبىر رەت وليمپيادا جەڭىمپازدارى جەتەكشىلىك ەتەتىن  بۇكىلقازاقستاندىق بالالار وليمپياداسىن وتكىزۋ مۇمكىندىگىن قاراستىرۋعا بولادى. تاعى ءبىر ماسەلە – ايەلدەردىڭ ورتاشا كىرىس دەڭگەيى ەركەكتەرمەن سالىستىرعاندا ءالى كۇنگە دەيىن ۇشتەن ءبىر مولشەرگە تومەن. مۇنداي جاعدايدىڭ ورىن الۋىنىڭ باستى سەبەبىنىڭ ءبىرى – ۇكىمەت بەكىتكەن ايەلدەر ەڭبەگىن قولدانۋعا تىيىم سالىنعان جۇمىستار ءتىزىمى، – دەدى نۇرسۇلتان نازارباەۆ.

ەلباسى گەندەرلىك ساياساتتىڭ باسىمدىعى بار ءبىر باعىتى رەتىندە انالار مەن بالالار ءۇشىن قولايلى ورتا قالىپتاستىرۋ، سونداي-اق اناعا دەگەن سىيلاستىق مادەنيەتىن جانداندىرۋ قاجەتتىگىن ايتىپ ءوتتى.

– بالكىم، بالالار ءۇشىن جالپىۇلتتىق اشىق ەسىك كۇندەرىن وتكىزىپ وتىرۋ كەرەك بولار. قۇرمەتتى حانىمدار، سىزدەردىڭ قولداۋلارىڭىزبەن ءبىز بارلىق جوسپارىمىزدى ىسكە اسىرا الامىز دەپ ۇمىتتەنەمىن، – دەدى قازاقستان پرەزيدەنتى.

مەملەكەت باسشىسى قازىرگى ساياسي جاڭعىرۋ ۇدەرىسى بارىسىندا ايەلدەردىڭ زور ءرول اتقاراتىنىنا سەنىم ءبىلدىردى.

كەزدەسۋگە قاتىسۋشىلار وزدەرىنىڭ كاسىبي جانە كۇندەلىكتى ومىرىندەگى جەتىستىكتەرى جونىندە اڭگىمەلەدى.

اقوردادا وتكەن "كوكتەم شۋاعى" اتتى مەرەكەلىك كەزدەسۋدەن. فوتو: akorda.kz

مەملەكەت باسشىسى ءىس-شارا سوڭىندا كوپ بالالى انا و.مۇقاشەۆانى «التىن القا» بەلگىسىمەن ماراپاتتاپ، كەزدەسۋگە قاتىسۋشىلار ءۇشىن «اقوردا» رەزيدەنتسياسى ىشىندە ەكسكۋرسيا جۇرگىزدى.

كەزدەسۋگە مەملەكەتتىك حاتشى، پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمى گ.ابدىقالىقوۆا، پرەزيدەنت اكىمشىلىگىنىڭ باسشىسى ءا.جاقسىبەكوۆ، پارلامەنت ءماجىلىسىنىڭ دەپۋتاتى، بالا قۇقىقتارى جونىندەگى ۋاكىل ز.باليەۆا، ۇلتتىق ەكونوميكا ۆيتسە-ءمينيسترى م.ابىلقاسىموۆا، ميكروبيولوگ-عالىم ءا.ەرنازاروۆا، بياتلوننان «الماتى-2017» ۋنيۆەرسياداسىنىڭ جەڭىمپازى ا.شەۆچەنكو، اۋىلدىق ورتا مەكتەپ ديرەكتورى ي.سەدوۆا، «جاس اتامەكەن» جاس كاسىپكەرلەر كلۋبىنىڭ پرەزيدەنتى ز.كوكجانوۆا، اقىن ت.قابىلشا، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ماگيسترانتى م.گاليتسكايا، «تەڭىزشەۆرويل» جاۋاپكەرشىلىگى شەكتەۋلى سەرىكتەستىگى ادام رەسۋرستارى باسقارماسىنىڭ باس مەنەدجەرى ش.التىباەۆا، اۋداندىق اۋرۋحانانىڭ باس دارىگەرى ق.رازيەۆا، «استانا-بالەت» تەاترىنىڭ جەتەكشى بالەريناسى م.بۋكانوۆا، كوپ بالالى انا و.مۇقاشەۆا، قوبىزدان حالىقارالىق بايقاۋلاردىڭ جەڭىمپازى ا.تاجىباەۆا، كامەلەتكە تولماعاندار ءىسى جونىندەگى مامانداندىرىلعان اۋدانارالىق سوت توراعاسى ن.راززاق، اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ءانشىسى و.داۆىدەنكو، قازاقستان رەسپۋبليكاسى قارۋلى كۇشتەرىنىڭ پاراشيۋتپەن سەكىرۋگە دايىنداۋ ورتالىعىنىڭ اعا مامانى ر.رامازانوۆا، ءارتىس س.باقاەۆا، جۋرناليست ۆ.ميرلانقىزى قاتىستى.

«The Qazaq Times»