Keniyalıq wşaq. Foto:: PUBLIC DOMAIN

Londonnıñ uaqıtımen jeksenbi küni sağat 15:00 şamasında Klephem audanında twratın bir twrğınnıñ aulasına aspannan adam qwlap tüsken.  Sol sätte londondıq twrğın öz aulasında künge qızdırınıp otırıptı. Aspannan qwlağan adam üy iesiniñ janına 1 metr şamasında jaqın kelip tüsedi. "Gürs" etken dıbıstan keyin körşileri de jan türşigerlik jağdaydağı adam mürdesin körgen. Üreyi wşqan twrğındar policiyağa habar bergen. 

London policiyası  Kiyin Hitrou äuejayına qonğan jäne äuege köterilgen wşaqtardıñ beyne taspaların tekserip körgen. Nätijesinde, Kenya Airways kompaniyasınıñ wşağı qonuğa bağıt alğan kezde wşaqtıñ astınğı jağınan bir adamnıñ qwlap ketkenin anıqtağan. Qonuğa dayındalğan wşaqtıñ döñgelek korpusı aşılğan kezde oğan jasırınğan adamnıñ jerge qwlap ketkeni beyne taspağa jazılğan. London policiyası bwl adamdı bilet almay, wşaqqa jasırınıp şıqqan boluı mümkin dep qaraydı. Wşaqtıñ döñgelekteri ornalasatın korpusınan tamaq ta tabılğan. Qaterli saparğa şıqqan bwl adam döñgelek korpusı aşıludan bwrın jan üzgen boluı da mümkin degen boljam da bar.

Nayrobiden wşqan wşaq Londonğa 9 sağatta jetedi. Bilet almağan jolauşılardıñ bwnday täuekelge baru äreketteri bwğan deyin de birneşe ret bolğan eken. Äue kompaniyasınıñ mamandarı bwnday qauipti äreketke barğan adam aman-esen jetken künde de densaulığına ülken zaqım keletinin aytadı. Joğarı qısım, otteginiñ jetispeui, tömen temperatura jäne adam jüykesine zaqım keltiretin şuıl – bwnıñ bäri de adam densaulığına auır zardap keltiretinin aytadı.

“The Qazaq Times”