اسپاننان تۇسكەن ادام لوندون تۇرعىندارىنىڭ ۇرەيىن ۇشىردى

لوندوننىڭ ۋاقىتىمەن جەكسەنبى كۇنى ساعات 15:00 شاماسىندا كلەپحەم اۋدانىندا تۇراتىن ءبىر تۇرعىننىڭ اۋلاسىنا اسپاننان ادام قۇلاپ تۇسكەن.  سول ساتتە لوندوندىق تۇرعىن ءوز اۋلاسىندا كۇنگە قىزدىرىنىپ وتىرىپتى. اسپاننان قۇلاعان ادام ءۇي يەسىنىڭ جانىنا 1 مەتر شاماسىندا جاقىن كەلىپ تۇسەدى. "گۇرس" ەتكەن دىبىستان كەيىن كورشىلەرى دە جان تۇرشىگەرلىك جاعدايداعى ادام مۇردەسىن كورگەن. ۇرەيى ۇشقان تۇرعىندار پوليتسياعا حابار بەرگەن. 

لوندون پوليتسياسى  كيين حيتروۋ اۋەجايىنا قونعان جانە اۋەگە كوتەرىلگەن ۇشاقتاردىڭ بەينە تاسپالارىن تەكسەرىپ كورگەن. ناتيجەسىندە، Kenya Airways كومپانياسىنىڭ ۇشاعى قونۋعا باعىت العان كەزدە ۇشاقتىڭ استىنعى جاعىنان ءبىر ادامنىڭ قۇلاپ كەتكەنىن انىقتاعان. قونۋعا دايىندالعان ۇشاقتىڭ دوڭگەلەك كورپۋسى اشىلعان كەزدە وعان جاسىرىنعان ادامنىڭ جەرگە قۇلاپ كەتكەنى بەينە تاسپاعا جازىلعان. لوندون پوليتسياسى بۇل ادامدى بيلەت الماي، ۇشاققا جاسىرىنىپ شىققان بولۋى مۇمكىن دەپ قارايدى. ۇشاقتىڭ دوڭگەلەكتەرى ورنالاساتىن كورپۋسىنان تاماق تا تابىلعان. قاتەرلى ساپارعا شىققان بۇل ادام دوڭگەلەك كورپۋسى اشىلۋدان بۇرىن جان ۇزگەن بولۋى دا مۇمكىن دەگەن بولجام دا بار.

نايروبيدەن ۇشقان ۇشاق لوندونعا 9 ساعاتتا جەتەدى. بيلەت الماعان جولاۋشىلاردىڭ بۇنداي تاۋەكەلگە بارۋ ارەكەتتەرى بۇعان دەيىن دە بىرنەشە رەت بولعان ەكەن. اۋە كومپانياسىنىڭ ماماندارى بۇنداي قاۋىپتى ارەكەتكە بارعان ادام امان-ەسەن جەتكەن كۇندە دە دەنساۋلىعىنا ۇلكەن زاقىم كەلەتىنىن ايتادى. جوعارى قىسىم، وتتەگىنىڭ جەتىسپەۋى، تومەن تەمپەراتۋرا جانە ادام جۇيكەسىنە زاقىم كەلتىرەتىن شۋىل – بۇنىڭ ءبارى دە ادام دەنساۋلىعىنا اۋىر زارداپ كەلتىرەتىنىن ايتادى.

“The Qazaq Times”