Qırğız käsipker belsendini üyiniñ janında atıp ketken. Foto: Kalıynur Kalmurzanıñ fotosı.

Reseydiñ Ekaterinburg qalasında sol eldegi qırğız diasporasınıñ bwrınğı lideri sanalatın, ıqpaldı käsipker Qamşıbek Karimovtı (Kamçıbek Karimov) belgisiz bireuler atıp ketti. Bwl turalı Qırğızstan men reseylik basılımdar jazuda.

Oqiğa keşe, 2 mausım 15:00 şamasında bolğan. Kuägerlerdiñ aytuınşa, Volkswagen Touareg köligin mingen belgisiz eki adam Karimovtı Kalinin köşesindegi öz üyiniñ janında atıp ketken.

Qazir tergeu komiteti men qwqıq qorğauşılar tergeu jwmıstarın bastap ketken. Mälimetterge qarağanda, şabuılğa wşırağan kezde Karimovtıñ janında sömke salınğan joğarı somadağı aqşa bolğan. Biraq, qastandıq jasauşılar sömke tolı aqşanı sol küyinde qaldırğan.

«Biz onıñ sömke tolı mol aqşanı alıp qalay jalğız jürgenin tüsinbedik. Ol köliginen tüsip üyine qaray jüre bergende qaraqşılar qol salğan. Sol kezde onıñ janında eşkim bolmağan», – deydi qırğız käsipkeriniñ kömekşisi Qwrmet Qwrmanbaev (Urmat Kurmanbaev).

Özine şabuıl jasalğan kezde Karimov özin qorğap qarsılıq körsetken. Kuägerlerdiñ aytuınşa, qol saluşılar eki-üş märte oq atıp, artınşa kölikterine otırıp iz suıtqan.

Qamşıbek Karimov Oş qalasınıñ Qara-su audanında tuğan. Reseyde jeke käsipkerlikpen aynalısqan. Köp jıldar boyı Ekaterinburgtegi qırğız wyımdarına jetekşilik etken. Jerlesteri onıñ migranttarğa kömek qolın sozıp, qoğamdıq jwmıstarğa belsendi aralasqan azamat ekenin aytadı. Atalğan qaladağı jäne Reseydegi köptegen JOO-dağı qırğız studentteri de onıñ jomarttığın köbirek äñgime etedi. 54 jastağı Karimovtıñ artında 3 balası men jarı qalğan.

“The Qazaq Times”