رەسەيدىڭ ەكاتەرينبۋرگ قالاسىندا سول ەلدەگى قىرعىز دياسپوراسىنىڭ بۇرىنعى ليدەرى سانالاتىن، ىقپالدى كاسىپكەر قامشىبەك كاريموۆتى (كامچىبەك كاريموۆ) بەلگىسىز بىرەۋلەر اتىپ كەتتى. بۇل تۋرالى قىرعىزستان مەن رەسەيلىك باسىلىمدار جازۋدا.

وقيعا كەشە، 2 ماۋسىم 15:00 شاماسىندا بولعان. كۋاگەرلەردىڭ ايتۋىنشا، Volkswagen Touareg كولىگىن مىنگەن بەلگىسىز ەكى ادام كاريموۆتى كالينين كوشەسىندەگى ءوز ءۇيىنىڭ جانىندا اتىپ كەتكەن.

قازىر تەرگەۋ كوميتەتى مەن قۇقىق قورعاۋشىلار تەرگەۋ جۇمىستارىن باستاپ كەتكەن. مالىمەتتەرگە قاراعاندا، شابۋىلعا ۇشىراعان كەزدە كاريموۆتىڭ جانىندا سومكە سالىنعان جوعارى سوماداعى اقشا بولعان. بىراق، قاستاندىق جاساۋشىلار سومكە تولى اقشانى سول كۇيىندە قالدىرعان.

«ءبىز ونىڭ سومكە تولى مول اقشانى الىپ قالاي جالعىز جۇرگەنىن تۇسىنبەدىك. ول كولىگىنەن ءتۇسىپ ۇيىنە قاراي جۇرە بەرگەندە قاراقشىلار قول سالعان. سول كەزدە ونىڭ جانىندا ەشكىم بولماعان»، – دەيدى قىرعىز كاسىپكەرىنىڭ كومەكشىسى قۇرمەت قۇرمانباەۆ (ۋرمات كۋرمانباەۆ).

وزىنە شابۋىل جاسالعان كەزدە كاريموۆ ءوزىن قورعاپ قارسىلىق كورسەتكەن. كۋاگەرلەردىڭ ايتۋىنشا، قول سالۋشىلار ەكى-ءۇش مارتە وق اتىپ، ارتىنشا كولىكتەرىنە وتىرىپ ءىز سۋىتقان.

قامشىبەك كاريموۆ وش قالاسىنىڭ قارا-سۋ اۋدانىندا تۋعان. رەسەيدە جەكە كاسىپكەرلىكپەن اينالىسقان. كوپ جىلدار بويى ەكاتەرينبۋرگتەگى قىرعىز ۇيىمدارىنا جەتەكشىلىك ەتكەن. جەرلەستەرى ونىڭ ميگرانتتارعا كومەك قولىن سوزىپ، قوعامدىق جۇمىستارعا بەلسەندى ارالاسقان ازامات ەكەنىن ايتادى. اتالعان قالاداعى جانە رەسەيدەگى كوپتەگەن جوو-داعى قىرعىز ستۋدەنتتەرى دە ونىڭ جومارتتىعىن كوبىرەك اڭگىمە ەتەدى. 54 جاستاعى كاريموۆتىڭ ارتىندا 3 بالاسى مەن جارى قالعان.

“The Qazaq Times”