Şımkenttegi №33 mektepte qwrılğan Arıs twrğındarına kömek körsetu ortalığı. Foto: QT

Arıstağı apattı jağdaydıñ zardaptarın jäne mañındağı qalalar-auıldar men el-jwrttıñ hal-ahualın bilip, közben körip qaytu üşin tilşimiz Asan Anarbaywlı Türkistan oblısına attanğan bolatın. Äriptesimiz Şımkent qalasına jete sala ondağı Arıs twrğındarına kömek körsetuge arnalğan ortalıqtarınan alğaşqı aqparattarın da joldap ülgerdi. Tilşimizdiñ joldağan mälimetterine süyene otırıp, saytımız aldağı uaqıtta Arıs turalı aqparat berip otıruğa tırısadı. 

№33 mekteptegi panalauşılardıñ jağdayı

Şımkent qalasındağı №33 mektepte qwrılğan №6 "Arıstıqtarğa arnalğan bekette" bolıp qayttıq. Bekettiñ bas üylestiruşisi, mektep komendantı Medeuova Klara Elemesqızınıñ mälimdeuinşe, keşe (25 mausım) keşke tayau Arıs twrğındarınan 1350-dey azamat bolğan, biraq olardıñ köpşiligi tuıstarınıñ üylerine tarasqan.

Klara Elemesqızı qazir atalğan bekette 150-ge juıq balalar men erli-zayıptılardıñ bar ekenin jäne olarğa eriktiler üzdiksiz qol wşın sozıp jatqanın bayandadı. Mektep sport zalında jayılğan tösek köp, qoyma janaşır jandar alıp kelgen azıq-tülik, gigienalıq zattar, bet oramaldar men buma-buma büldirşinderdiñ pampersterine tolı. Kireberis dälizdegi tizbektelgen partalardıñ üstinde jemis-jidekter men nan önimderiniñ tür-türi paketterge salınğan. Komendant hanım mwnda jeke dara ata-anası ya jaqındarınan köz jazıp qalğandardıñ joqtığın ayttı. Sonday-aq mekteptiñ tehpersonaldarı men därigerler, sociolog-psiholog mamandarı da kezekşilik rejimde jwmıs istep jatqanın jetkizdi.

Sport zaldağı apattı aymaqtı tastap şıqqan Arıs twrğındarımen jekeley tildestik. Beketti panalauşı zeynetker Öserbaeva Nwrsağila jarılıs bolğan boyda közine ota jasağanına ay tolmağan joldasımen jolğa şıqqanın, köşe boyınan qart äjeydi de erte ketkenderin aytadı. Alayda, keyipkerimiz baspanalarınıñ au-jayınan, bülingen-bülinbegeninen habarsız ekenin jetkizdi.

Şımkenttegi №33 mektepte qwrılğan Arıs twrğındarına kömek körsetu ortalığı. Foto: QT

Biz atalğan ortalıqtan şığarda, qinalğandarğa qol üşin sozğan meyirimdi jandardıñ aulada oynap jürgen balalardı tañğı asqa şaqırıp jatqanın estidik. Komendant Klara hanım qayta-qayta "qiın şaqta demeu bolıp, järdemdesken elge-halıqqa rizaşılığımızdı bildiremin" degen sözin qaytalay beredi. Onıñ aytuınşa gumanitarlıq kömek tügel el tarapınan kelip jatır. "Bilik-äkimşilikten şe?" degen saualımızğa: "Halıqqa raqmet, äkelgenin ülestirip, aldarına jayıp otırmız", – dep jauap berdi.
Beket qaqpasınan şığa bere tağı bir tätemiz kelip: "Siz volontersiz be? Meniñ kiim-keşek dükenim bar edi. Birşama kiim-köylek bereyin dep edim, qayda alıp barayın, kim qabıldaydı?", – dep swrap jattı. Biz oğan kömek körsetu ortalığınıñ eriktilerin nwsqadıq.

“The Qazaq Times”