ارىستاعى جاعداي: اپاتتىڭ اۋىرتپالىعىن قارا حالىق ءوزى كوتەرۋدە

ارىستاعى اپاتتى جاعدايدىڭ زارداپتارىن جانە ماڭىنداعى قالالار-اۋىلدار مەن ەل-جۇرتتىڭ حال-احۋالىن ءبىلىپ، كوزبەن كورىپ قايتۋ ءۇشىن ءتىلشىمىز اسان اناربايۇلى تۇركىستان وبلىسىنا اتتانعان بولاتىن. ارىپتەسىمىز شىمكەنت قالاسىنا جەتە سالا ونداعى ارىس تۇرعىندارىنا كومەك كورسەتۋگە ارنالعان ورتالىقتارىنان العاشقى اقپاراتتارىن دا جولداپ ۇلگەردى. ءتىلشىمىزدىڭ جولداعان مالىمەتتەرىنە سۇيەنە وتىرىپ، سايتىمىز الداعى ۋاقىتتا ارىس تۋرالى اقپارات بەرىپ وتىرۋعا تىرىسادى. 

№33 مەكتەپتەگى پانالاۋشىلاردىڭ جاعدايى

شىمكەنت قالاسىنداعى №33 مەكتەپتە قۇرىلعان №6 "ارىستىقتارعا ارنالعان بەكەتتە" بولىپ قايتتىق. بەكەتتىڭ باس ۇيلەستىرۋشىسى، مەكتەپ كومەندانتى مەدەۋوۆا كلارا ەلەمەسقىزىنىڭ مالىمدەۋىنشە، كەشە (25 ماۋسىم) كەشكە تاياۋ ارىس تۇرعىندارىنان 1350-دەي ازامات بولعان، بىراق ولاردىڭ كوپشىلىگى تۋىستارىنىڭ ۇيلەرىنە تاراسقان.

كلارا ەلەمەسقىزى قازىر اتالعان بەكەتتە 150-گە جۋىق بالالار مەن ەرلى-زايىپتىلاردىڭ بار ەكەنىن جانە ولارعا ەرىكتىلەر ۇزدىكسىز قول ۇشىن سوزىپ جاتقانىن باياندادى. مەكتەپ سپورت زالىندا جايىلعان توسەك كوپ، قويما جاناشىر جاندار الىپ كەلگەن ازىق-تۇلىك، گيگيەنالىق زاتتار، بەت ورامالدار مەن بۋما-بۋما بۇلدىرشىندەردىڭ پامپەرستەرىنە تولى. كىرەبەرىس دالىزدەگى تىزبەكتەلگەن پارتالاردىڭ ۇستىندە جەمىس-جيدەكتەر مەن نان ونىمدەرىنىڭ ءتۇر-ءتۇرى پاكەتتەرگە سالىنعان. كومەندانت حانىم مۇندا جەكە دارا اتا-اناسى يا جاقىندارىنان كوز جازىپ قالعانداردىڭ جوقتىعىن ايتتى. سونداي-اق مەكتەپتىڭ تەحپەرسونالدارى مەن دارىگەرلەر، سوتسيولوگ-پسيحولوگ ماماندارى دا كەزەكشىلىك رەجيمدە جۇمىس ىستەپ جاتقانىن جەتكىزدى.

سپورت زالداعى اپاتتى ايماقتى تاستاپ شىققان ارىس تۇرعىندارىمەن جەكەلەي تىلدەستىك. بەكەتتى پانالاۋشى زەينەتكەر وسەرباەۆا نۇرساعيلا جارىلىس بولعان بويدا كوزىنە وتا جاساعانىنا اي تولماعان جولداسىمەن جولعا شىققانىن، كوشە بويىنان قارت اجەيدى دە ەرتە كەتكەندەرىن ايتادى. الايدا، كەيىپكەرىمىز باسپانالارىنىڭ اۋ-جايىنان، بۇلىنگەن-بۇلىنبەگەنىنەن حابارسىز ەكەنىن جەتكىزدى.

شىمكەنتتەگى №33 مەكتەپتە قۇرىلعان ارىس تۇرعىندارىنا كومەك كورسەتۋ ورتالىعى. فوتو: QT

ءبىز اتالعان ورتالىقتان شىعاردا، قينالعاندارعا قول ءۇشىن سوزعان مەيىرىمدى جانداردىڭ اۋلادا ويناپ جۇرگەن بالالاردى تاڭعى اسقا شاقىرىپ جاتقانىن ەستىدىك. كومەندانت كلارا حانىم قايتا-قايتا "قيىن شاقتا دەمەۋ بولىپ، جاردەمدەسكەن ەلگە-حالىققا ريزاشىلىعىمىزدى بىلدىرەمىن" دەگەن ءسوزىن قايتالاي بەرەدى. ونىڭ ايتۋىنشا گۋمانيتارلىق كومەك تۇگەل ەل تاراپىنان كەلىپ جاتىر. "بيلىك-اكىمشىلىكتەن شە؟" دەگەن ساۋالىمىزعا: "حالىققا راقمەت، اكەلگەنىن ۇلەستىرىپ، الدارىنا جايىپ وتىرمىز", – دەپ جاۋاپ بەردى.
بەكەت قاقپاسىنان شىعا بەرە تاعى ءبىر تاتەمىز كەلىپ: ء"سىز ۆولونتەرسىز بە؟ مەنىڭ كيىم-كەشەك دۇكەنىم بار ەدى. ءبىرشاما كيىم-كويلەك بەرەيىن دەپ ەدىم، قايدا الىپ بارايىن، كىم قابىلدايدى؟", – دەپ سۇراپ جاتتى. ءبىز وعان كومەك كورسەتۋ ورتالىعىنىڭ ەرىكتىلەرىن نۇسقادىق.

“The Qazaq Times”