Qazaqstan halqınıñ 30 payızın balalar men jasöspirimder qwraydı.

«Finprom.kz» saytınıñ mälimetinşe, bügingi tañda Qazaqstanda 5,4  million balalar men jasöspirimder bar. Bwl ötken jılmen salıstırğanda 2,4 payızğa, bes jıl bwrınğı körsetkişpen salıstırğanda 17,3 payızğa joğarı.

8 oblısta balalar men jasöspirimder sanı jalpı halıqtıñ 30 payızın qwraydı. Respublika boyınşa eñ jas oblıstar köşin Türkistan jäne Mañğıstau oblıstarı bastap twr. Atalmış oblıstarda 15 jasqa tolmağan jasöspirimder jergilikti halıqtıñ 39,6 jäne 36,6 payzın qwraydı. Jasöspirimder sanınıñ artuı avtomattı türde twrğın üy mäselesine kelip tireledi. Täuelsizdik alğan 28 jıl işinde Qazaqstan halqı tolıqtay twrğın üymen qamtıldı dep aytu qiın. 2018 jıldıñ basındağı statistikalıq mälimetter boyınşa, qazaqstandıqtardıñ 25 payızı bir päterde bes nemese odanda köp adam bolıp twruğa mäjbür. Al bir päterde 4 adam bolıp twratındar sanı 19 payızdı qwrağan.

Jalpı, Qazaqstanda soñğı uaqıttarı üysiz-küysiz jürgen köp balalı analar men jastar probleması özekti bolıp twr. Jıl basınan beri elordadan bastap, Almatı, Şımkent siyaqtı megapolisterde köp balalı analar birneşe märte mitingke şığıp, bilikten baspana men järdemaqı mäselesin şeşudi talap etken. Negizinde bilik ökilderi biılğı jıldı jastar jılı dep jariyalağan. Biraq äzirge jastar mäselesin şeşuge baylanıstı naqtı qanday bağdarlamalardıñ qabıldanıp jatqandığı belgisiz. Jıl basında elordamızda twñğış prezident Nwrswltan Nazarbaevtıñ qatısuımen jastar jılınıñ aşılu saltanattı ötken. Oğan byudjetten 223 million teñge jwmsalıp, şara memlekettik telearnalardan tikeley efirde körsetilgen.

"The Qazaq Times"