قازاقستان حالقىنىڭ 30 پايىزىن بالالار مەن جاسوسپىرىمدەر قۇرايدى.

«Finprom.kz» سايتىنىڭ مالىمەتىنشە، بۇگىنگى تاڭدا قازاقستاندا 5,4  ميلليون بالالار مەن جاسوسپىرىمدەر بار. بۇل وتكەن جىلمەن سالىستىرعاندا 2,4 پايىزعا، بەس جىل بۇرىنعى كورسەتكىشپەن سالىستىرعاندا 17,3 پايىزعا جوعارى.

8 وبلىستا بالالار مەن جاسوسپىرىمدەر سانى جالپى حالىقتىڭ 30 پايىزىن قۇرايدى. رەسپۋبليكا بويىنشا ەڭ جاس وبلىستار كوشىن تۇركىستان جانە ماڭعىستاۋ وبلىستارى باستاپ تۇر. اتالمىش وبلىستاردا 15 جاسقا تولماعان جاسوسپىرىمدەر جەرگىلىكتى حالىقتىڭ 39,6 جانە 36,6 پايزىن قۇرايدى. جاسوسپىرىمدەر سانىنىڭ ارتۋى اۆتوماتتى تۇردە تۇرعىن ءۇي ماسەلەسىنە كەلىپ تىرەلەدى. تاۋەلسىزدىك العان 28 جىل ىشىندە قازاقستان حالقى تولىقتاي تۇرعىن ۇيمەن قامتىلدى دەپ ايتۋ قيىن. 2018 جىلدىڭ باسىنداعى ستاتيستيكالىق مالىمەتتەر بويىنشا، قازاقستاندىقتاردىڭ 25 پايىزى ءبىر پاتەردە بەس نەمەسە وداندا كوپ ادام بولىپ تۇرۋعا ءماجبۇر. ال ءبىر پاتەردە 4 ادام بولىپ تۇراتىندار سانى 19 پايىزدى قۇراعان.

جالپى، قازاقستاندا سوڭعى ۋاقىتتارى ءۇيسىز-كۇيسىز جۇرگەن كوپ بالالى انالار مەن جاستار پروبلەماسى وزەكتى بولىپ تۇر. جىل باسىنان بەرى ەلوردادان باستاپ، الماتى، شىمكەنت سياقتى مەگاپوليستەردە كوپ بالالى انالار بىرنەشە مارتە ميتينگكە شىعىپ، بيلىكتەن باسپانا مەن جاردەماقى ماسەلەسىن شەشۋدى تالاپ ەتكەن. نەگىزىندە بيلىك وكىلدەرى بيىلعى جىلدى جاستار جىلى دەپ جاريالاعان. بىراق ازىرگە جاستار ماسەلەسىن شەشۋگە بايلانىستى ناقتى قانداي باعدارلامالاردىڭ قابىلدانىپ جاتقاندىعى بەلگىسىز. جىل باسىندا ەلوردامىزدا تۇڭعىش پرەزيدەنت نۇرسۇلتان نازارباەۆتىڭ قاتىسۋىمەن جاستار جىلىنىڭ اشىلۋ سالتاناتتى وتكەن. وعان بيۋدجەتتەن 223 ميلليون تەڭگە جۇمسالىپ، شارا مەملەكەتتىك تەلەارنالاردان تىكەلەي ەفيردە كورسەتىلگەن.

"The Qazaq Times"