Almatı äuejayı eks-prezidentiniñ üstinen qılmıstıq is qozğaldı

Almatı äuejayınıñ eks-prezidenti Aybol Bekmwhambetovtıñ üstinen qılmıstıq is qozğaldı.

«Almatı äuejayınıñ eks-prezidenti, bwrınğı mäslihat deputatı Aybol Bekmwhambetovtıñ üstinen «senip tapsırğan mülikti zañsız iemdendi, talan-tarajğa tüsirdi» degen ayıppen qılmıstıq is qozğaldı» - delingen Almatı qalalıq sotınıñ baspasöz qızmeti taratqan mälimdemede.

Bekmwhambetov 2019 jıldıñ 6 säuirinde sot şeşimi boyınşa üy qamağına alınğan. Biraq ol säuir ayınıñ 15-i küni Almatı qalalıq sotına şağım tüsirip, kepildik arqılı bosatılğan. Sot şeşimi boyınşa kepildik kölemi 3500 AEK (8 837 500 teñgeni) qwrağan. Qazirgi tañda Bekmwhambetovtıñ üstinen QR QK 189 babınıñ 4 tarmağı (Senip tapsırğan mülikti iemdenu nemese talan-tarajğa salu) boyınşa qılımstıq is qozğalğan.

2018 jıldıñ mausım ayınıñ 11-i küni «Almatı halıqaralıq äuejayınıñ» direktorlar keñesi Aybol Bekmwhambetovtı merziminen bwrın qızmetinen bosatu jöninde şeşim qabıldağan. Tamız ayında onıñ mäslihat deputattığınan öz erkimen ketkendigi belgili boldı. Keyinnen Bekmwhambetovtıñ bwnday şeşim qabıldauına «özge qalağa qonıs audaruı sebep boldı» degen aqparat tarağan.

1962 jılı Aqtöbe qalasında düniege kelgen Aybol Bekmwhambetov «Almatı halıqaralıq äuejayın» 2009 jıldan beri basqarıp kelgen. Ol oğan deyin Aqtöbe, Atırau, Astana qalalarınıñ äuejayların basqarğan.

"The Qazaq Times"