الماتى اۋەجايى ەكس-پرەزيدەنتىنىڭ ۇستىنەن قىلمىستىق ءىس قوزعالدى

الماتى اۋەجايىنىڭ ەكس-پرەزيدەنتى ايبول بەكمۇحامبەتوۆتىڭ ۇستىنەن قىلمىستىق ءىس قوزعالدى.

«الماتى اۋەجايىنىڭ ەكس-پرەزيدەنتى، بۇرىنعى ءماسليحات دەپۋتاتى ايبول بەكمۇحامبەتوۆتىڭ ۇستىنەن «سەنىپ تاپسىرعان مۇلىكتى زاڭسىز يەمدەندى، تالان-تاراجعا ءتۇسىردى» دەگەن ايىپپەن قىلمىستىق ءىس قوزعالدى» - دەلىنگەن الماتى قالالىق سوتىنىڭ ءباسپاسوز قىزمەتى تاراتقان مالىمدەمەدە.

بەكمۇحامبەتوۆ 2019 جىلدىڭ 6 ساۋىرىندە سوت شەشىمى بويىنشا ءۇي قاماعىنا الىنعان. بىراق ول ءساۋىر ايىنىڭ 15-ءى كۇنى الماتى قالالىق سوتىنا شاعىم ءتۇسىرىپ، كەپىلدىك ارقىلى بوساتىلعان. سوت شەشىمى بويىنشا كەپىلدىك كولەمى 3500 اەك (8 837 500 تەڭگەنى) قۇراعان. قازىرگى تاڭدا بەكمۇحامبەتوۆتىڭ ۇستىنەن قر قك 189 بابىنىڭ 4 تارماعى (سەنىپ تاپسىرعان مۇلىكتى يەمدەنۋ نەمەسە تالان-تاراجعا سالۋ) بويىنشا قىلىمستىق ءىس قوزعالعان.

2018 جىلدىڭ ماۋسىم ايىنىڭ 11-ءى كۇنى «الماتى حالىقارالىق اۋەجايىنىڭ» ديرەكتورلار كەڭەسى ايبول بەكمۇحامبەتوۆتى مەرزىمىنەن بۇرىن قىزمەتىنەن بوساتۋ جونىندە شەشىم قابىلداعان. تامىز ايىندا ونىڭ ءماسليحات دەپۋتاتتىعىنان ءوز ەركىمەن كەتكەندىگى بەلگىلى بولدى. كەيىننەن بەكمۇحامبەتوۆتىڭ بۇنداي شەشىم قابىلداۋىنا «وزگە قالاعا قونىس اۋدارۋى سەبەپ بولدى» دەگەن اقپارات تاراعان.

1962 جىلى اقتوبە قالاسىندا دۇنيەگە كەلگەن ايبول بەكمۇحامبەتوۆ «الماتى حالىقارالىق اۋەجايىن» 2009 جىلدان بەرى باسقارىپ كەلگەن. ول وعان دەيىن اقتوبە، اتىراۋ، استانا قالالارىنىڭ اۋەجايلارىن باسقارعان.

"The Qazaq Times"