Bügin Almatı qalasında «El amanatı» qoğamdıq birlestiginiñ wyımdastıruımen «Qwjatqa qwrıqtalğan qandastar» attı baspasöz mäslihatı ötti. Jiınğa azamattıq belsendi Erkin Raqışev, Sayahat Äsimhan, Rısbek Toqtasın jäne Gülnwr Tälim qatıstı.

Baspasöz mäslihatında birlestik müşeleri Qıtaydan kelgen qandastarımızdıñ qwjattıq mäselelerin köterip, oralman kuäligi, ıqtiyar hat, Qıtay pasportı siyaqtı qwjattardıñ uaqıtı ötip ketkendikten azamattıq ala almay jürgen qandastarımızdıñ janayqayın BAQ ökilderine ayttı.

Foto: QT

El amanatı» qoğamdıq birlestiginiñ törağası, Rısbek Toqtasın: «Büginde otandastarın eline şaqırıp jatqan älemdegi üş eldiñ birimiz dep börkimizdi aspanğa atıp, bükil älemge jar salıp jatqanımız. Biraq sol kelgen ağayındardıñ qanşalıqtı därejede jağdayın jasap berip jatırmız? - degen zañdı swraq tuadı. Şındığın aytqanda, şetten kelgen ağayındar bwl elden qanday da bir qarjılıq kömek dämetip otırğan joq bwl künde. Olarğa eñ bastı keregi osı eldiñ tolıqqandı azamatı atanu. Qağazbastılıqtıñ kesirinen älikünge deyin neşe mıñ qandasımız qwjattarın räsimdey almay äure-sarsañğa tüsip otır. Täuelsizdik jılında elimizge millionnan asa qandasımız keldi. Olardıñ wrpaqtarı bwl künde 1,5 - 2 millionğa jetti. Alayda osı bir oralman kuäligi degen kuäliktiñ kesirinen büginde qanşama adam azamattıq ala almay otır. Sebebi oralman kuäligi bir jıl ğana uaqıtqa berilgen. Qıtaydağı sayasi jağdaydı bilesizder. Sonıñ kesirinen köptegen azamattar Qıtayğa şaqırtu alıp, sol jaqqa barıp jäne uaqıtında kele almay oralman kuäliginiñ merzimi ötip ketken. Sonıñ kesirinen azamattıq aluğa qwjattarın ötkize almay otır. Qazir bizdiñ qolımızda 2800-den astam oralman kuäliginiñ uaqıtı ötip ketken azamattar men Qıtay pasportınıñ merzimi ötip ketken 93 adamnıñ mälimetteri bar. Osı mäsele boyınşa biz elbası men ükimet basşısınan araşa swraymız».

Bwdan bölek Rısbek mırza öz sözinde ükimet basşısınıñ atına qandastardıñ qwjattıq mäselesin tezdetip şeşu mäselesi köterilgen arnayı arız jazılğandığın jäne jiın soñında atalmış arızdıñ astına qol qoyılıp joldanatının ayttı.

Foto: QT

Azamattıq belsendi, Erkin Raqışev: «Bwl mäselege bir jaqtı qarauğa bolmaydı. Bwl öte auqımdı mäsele. Bwnı şeşu üşin memleket tarapınan komissiya qwrıluı kerek. Ol parlamentte qwrıla ma, ükimette qwrıla ma bäribir. Biraq memlekettik boluı tiis. Qazir bwnımen qoğamdıq wyımdar aynalısıp jür. Ol bolmaydı. Bwl memlekettik mäsele ğoy. Memlekettiñ aldında twrğan mäselelerdiñ biri Qıtaydağı qandastarımızdıñ auır jağdayı boluı kerek. Sol sebepti de memlekettik komissiya qwrılıp, Qıtaydağı äriptesterimen kelissözder jürgizilip, qazaqtardıñ mäselesi şeşilui tiis. Onsız mına mäsele wzaqqa keteyin dep twr. Sol üşin de biz komissiya qwrıluın memleketten talap etemiz».

Foto: QT

Bes jıl boyı azamattıq ala almay jürgen qandasımız, Tüsip Aynağwl: «Men Qazaqstanğa 2014 jıldıñ qaraşa ayınıñ 3-i küni keldim. Sodan beri bes jıl boldı. Osı bes jıl işinde biz azamattıq ala almay barmağan jerimiz, kirmegen esigimiz qalmadı. Eşqanday bir qayır bolmadı. Bwl turalı birneşe ret arızda jazdıq... Azamattıq ala almay jürgen sebebimiz. 2016 jılı berilgen oralman kuäliginiñ merzimi bir jıldıq eken. Biz bwnıñ jazuın tanımay, ıqtiyar hatpen wqsas dünie eken dep jüre berip, uaqıtın ötkizip alıppız. Bıltır  11-şi aydıñ 15-i küni joldasım Qıtayğa ketken. Sodan arızdıñ arqasında keşe ğana keldi. Olar jibererde oğan: «Sen üş aydıñ işinde qaytadan aynalıp kelesiñ. Kelmeseñ, Qıtaydağı tuıstarıñ sayasi üyrenuge ketetin boladı» - dep aytqan. Onıñ pasportı men ıqtiyar hatınıñ uaqıtı 3-şi aydıñ 15-i küni bitedi. Jaqın arada azamattıq almasa, Qıtayğa qaytu kerek boladı. Al, onda barsa, qaytıp kelu mümkin emes. Qamaladı, türmege tüsedi. Barmasa, sol jaqtağı tuıstarın türmege qamaydı. Osı jağdaylardı eskere otırıp, elbasımızdan, işki ister ministrliginen, sırtqı ister ministrliginen ümittenip kelip otırmın».

"The Qazaq Times"