Foto: izvestia.ru

Eske sala keteyik, juırda Almatıda jasöspirimder ortasında jedel jağdaydı twraqtandıru, sonday-aq qalalıq prokuraturamen birlesip äzirlengen «Kämeletke tolmağandar arasında qwqıq bwzuşılıqtıñ aldın alu» Jobasın jüzege asıru maqsatında «Jasöspirim» jedel-aldın alu is-şarası bastaldı. «Jasöspirim» is-şarasınıñ alğaşqı küniniñ qorıtındısı boyınşa tömendegi jağdaylar anıqtalıp otır dep habarlaydı İİD baspasöz qızmeti.

«Ayta keteyin, şaranıñ maqsatı – qarausız qalğan kämeletke tolmağandar arasındağı qwqıqbwzuşılıqtıñ aldın alu, olardıñ tüngi uaqıtta üyden tısqarı nemese köñil köteru orındarında zañdı ökilderiniñ ertip jüruinsiz baru derekterin anıqtau, jasöspirimderge alkogol'di işimdikter men temeki önimderin satu, sonday-aq kämeletke tolmağandardı qoğamğa qayşı äreketterge tartatın eresekterdi äşkereleu bolıp tabıladı. Şaranıñ alğaşqı küninde işki ister organdarına ärtürli qwqıqbwzuşılıqtar jasağan 156 jasöspirim jetkizildi, onıñ işinde äkimşilik qwqıqbwzuşılıqtar jasağanı üşin – 143, qarausız jäne panasız qalğan – 13, olardıñ 8-i – twrğılıqtı meken-jayların anıqtap, zañdı ökilderine qaytaru üşin Kämelettik jasqa tolmağandardı beyimdeu ortalığına jetkizildi. Sonımen qatar, ötken täulikte policiya bölimşelerimen 8 qwqıqbwzuşı-jasöspirim men 9 äl-auqatı tömen otbasılar anıqtalıp, işki ister organdarınıñ esebine qoyıldı»,- dep mälimdedi Almatı qalasınıñ İİD Jergilikti policiya qızmeti yuvenal'dı policiya böliminiñ bastığı policiya polkovnigi Leyla Älipbaeva.

Şara barısında wsaq qwqıqbwzuşılıqqa «nöldik tözbeuşilik» principi boyınşa tärtipbwzuşılardı anıqtauğa erekşe köñil bölindi. Mäselen, wsaq bwzaqılıq jasağanı üşin 6 jasöspirim wstaldı.

«Balaları tüngi mezgilde köñil köteru orındarı men üyden tısqarı jerlerde jürgeni üşin 63 ata-ana äkimşilik jauapkerşilikke tartıldı. Zañdı ökilderiniñ ertip jüruinsiz kämeletke tolmağan balalardıñ tün mezgilinde jüruine jol bergen komp'yuterlik klubtardıñ 3 basşısına qatıstı materialdar äkimşilik jauapkerşilikke tartu üşin qalanıñ Mamandandırılğan audanaralıq äkimşilik sotına jiberiletin boladı. Sonımen qatar, bala tärbieleu jönindegi mindetterin orındamağan 6 ata-ananı Qazaqstan Respublikasınıñ äkimşilik qwqıqbwzuşılıq turalı Kodeksiniñ 127-babında qarastırılğan äkimşilik jauapkerşilikke tartu üşin materialdar Kämeletke tolmağandar isteri jönindegi mamandandırılğan audanaralıq sotına jiberildi»,- dedi polkovnik Älipbaeva.

Sonday-aq, qalanıñ sauda nüktelerinde kämelettik jasqa tolmağandarğa alkogol'di işimdikter men temeki önimderin satudıñ 5 deregi anıqtaldı. Atalmış fakti boyınşa materialdar da sauda qızmetkerlerin äkimşilik jauapkerşilikke tartu üşin Mamandandırılğan audanaralıq äkimşilik sotına jiberiletin boladı.

«Sonday-aq şara ayasında qalalıq prokuraturamen birlese otırıp oqu orındarınıñ oquşıları arasında jäne ata-analardıñ bala tärbieleudegi jauapkerşiligin arttıru barısında qwqıq bwzuşılıqtardıñ aldın alu men jolın kesuge bağıttalğan qwqıqtıq tüsindiru jwmıstarın jürgizdi. Şaranıñ birinşi küninde 6 mıñ 590 oquşını jäne 1 mıñ 860 ata-ananı qamtitın qala aumağındağı 42 mektepte qwqıqbwzuşılıq pen qılmıstılıqtıñ aldın alu bağıtında jwmıstar jürgizildi»,- dep habarladı qalalıq yuvenaldı policiyasınan.

 «The Qazaq Times»