الماتى پوليتسياسى 63 اتا-اناعا ايىپپۇل سالدى

ەسكە سالا كەتەيىك، جۋىردا الماتىدا جاسوسپىرىمدەر ورتاسىندا جەدەل جاعدايدى تۇراقتاندىرۋ، سونداي-اق قالالىق پروكۋراتۋرامەن بىرلەسىپ ازىرلەنگەن «كامەلەتكە تولماعاندار اراسىندا قۇقىق بۇزۋشىلىقتىڭ الدىن الۋ» جوباسىن جۇزەگە اسىرۋ ماقساتىندا «ءجاسوسپىرىم» جەدەل-الدىن الۋ ءىس-شاراسى باستالدى. «ءجاسوسپىرىم» ءىس-شاراسىنىڭ العاشقى كۇنىنىڭ قورىتىندىسى بويىنشا تومەندەگى جاعدايلار انىقتالىپ وتىر دەپ حابارلايدى ءىىد ءباسپاسوز قىزمەتى.

«ايتا كەتەيىن، شارانىڭ ماقساتى – قاراۋسىز قالعان كامەلەتكە تولماعاندار اراسىنداعى قۇقىقبۇزۋشىلىقتىڭ الدىن الۋ، ولاردىڭ تۇنگى ۋاقىتتا ۇيدەن تىسقارى نەمەسە كوڭىل كوتەرۋ ورىندارىندا زاڭدى وكىلدەرىنىڭ ەرتىپ ءجۇرۋىنسىز بارۋ دەرەكتەرىن انىقتاۋ، جاسوسپىرىمدەرگە الكوگولدى ىشىمدىكتەر مەن تەمەكى ونىمدەرىن ساتۋ، سونداي-اق كامەلەتكە تولماعانداردى قوعامعا قايشى ارەكەتتەرگە تارتاتىن ەرەسەكتەردى اشكەرەلەۋ بولىپ تابىلادى. شارانىڭ العاشقى كۇنىندە ىشكى ىستەر ورگاندارىنا ءارتۇرلى قۇقىقبۇزۋشىلىقتار جاساعان 156 ءجاسوسپىرىم جەتكىزىلدى، ونىڭ ىشىندە اكىمشىلىك قۇقىقبۇزۋشىلىقتار جاساعانى ءۇشىن – 143, قاراۋسىز جانە پاناسىز قالعان – 13, ولاردىڭ 8-ءى – تۇرعىلىقتى مەكەن-جايلارىن انىقتاپ، زاڭدى وكىلدەرىنە قايتارۋ ءۇشىن كامەلەتتىك جاسقا تولماعانداردى بەيىمدەۋ ورتالىعىنا جەتكىزىلدى. سونىمەن قاتار، وتكەن تاۋلىكتە پوليتسيا بولىمشەلەرىمەن 8 قۇقىقبۇزۋشى-ءجاسوسپىرىم مەن 9 ءال-اۋقاتى تومەن وتباسىلار انىقتالىپ، ىشكى ىستەر ورگاندارىنىڭ ەسەبىنە قويىلدى»،- دەپ مالىمدەدى الماتى قالاسىنىڭ ءىىد جەرگىلىكتى پوليتسيا قىزمەتى يۋۆەنالدى پوليتسيا ءبولىمىنىڭ باستىعى پوليتسيا پولكوۆنيگى لەيلا الىپباەۆا.

شارا بارىسىندا ۇساق قۇقىقبۇزۋشىلىققا «نولدىك توزبەۋشىلىك» ءپرينتسيپى بويىنشا ءتارتىپبۇزۋشىلاردى انىقتاۋعا ەرەكشە كوڭىل ءبولىندى. ماسەلەن، ۇساق بۇزاقىلىق جاساعانى ءۇشىن 6 ءجاسوسپىرىم ۇستالدى.

«بالالارى تۇنگى مەزگىلدە كوڭىل كوتەرۋ ورىندارى مەن ۇيدەن تىسقارى جەرلەردە جۇرگەنى ءۇشىن 63 اتا-انا اكىمشىلىك جاۋاپكەرشىلىككە تارتىلدى. زاڭدى وكىلدەرىنىڭ ەرتىپ ءجۇرۋىنسىز كامەلەتكە تولماعان بالالاردىڭ ءتۇن مەزگىلىندە جۇرۋىنە جول بەرگەن كومپيۋتەرلىك كلۋبتاردىڭ 3 باسشىسىنا قاتىستى ماتەريالدار اكىمشىلىك جاۋاپكەرشىلىككە تارتۋ ءۇشىن قالانىڭ مامانداندىرىلعان اۋدانارالىق اكىمشىلىك سوتىنا جىبەرىلەتىن بولادى. سونىمەن قاتار، بالا تاربيەلەۋ جونىندەگى مىندەتتەرىن ورىنداماعان 6 اتا-انانى قازاقستان رەسپۋبليكاسىنىڭ اكىمشىلىك قۇقىقبۇزۋشىلىق تۋرالى كودەكسىنىڭ 127-بابىندا قاراستىرىلعان اكىمشىلىك جاۋاپكەرشىلىككە تارتۋ ءۇشىن ماتەريالدار كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتىنا جىبەرىلدى»،- دەدى پولكوۆنيك الىپباەۆا.

سونداي-اق، قالانىڭ ساۋدا نۇكتەلەرىندە كامەلەتتىك جاسقا تولماعاندارعا الكوگولدى ىشىمدىكتەر مەن تەمەكى ونىمدەرىن ساتۋدىڭ 5 دەرەگى انىقتالدى. اتالمىش فاكتى بويىنشا ماتەريالدار دا ساۋدا قىزمەتكەرلەرىن اكىمشىلىك جاۋاپكەرشىلىككە تارتۋ ءۇشىن مامانداندىرىلعان اۋدانارالىق اكىمشىلىك سوتىنا جىبەرىلەتىن بولادى.

«سونداي-اق شارا اياسىندا قالالىق پروكۋراتۋرامەن بىرلەسە وتىرىپ وقۋ ورىندارىنىڭ وقۋشىلارى اراسىندا جانە اتا-انالاردىڭ بالا تاربيەلەۋدەگى جاۋاپكەرشىلىگىن ارتتىرۋ بارىسىندا قۇقىق بۇزۋشىلىقتاردىڭ الدىن الۋ مەن جولىن كەسۋگە باعىتتالعان قۇقىقتىق ءتۇسىندىرۋ جۇمىستارىن جۇرگىزدى. شارانىڭ ءبىرىنشى كۇنىندە 6 مىڭ 590 وقۋشىنى جانە 1 مىڭ 860 اتا-انانى قامتيتىن قالا اۋماعىنداعى 42 مەكتەپتە قۇقىقبۇزۋشىلىق پەن قىلمىستىلىقتىڭ الدىن الۋ باعىتىندا جۇمىستار جۇرگىزىلدى»،- دەپ حابارلادى قالالىق يۋۆەنالدى پوليتسياسىنان.

 «The Qazaq Times»