Nazarbaev: Qıtaydıñ öziniñ işki problemaları jetip artıladı

Nwrswltan Nazarbaev: «Qıtaydıñ öziniñ işki problemaları jetip artıladı» - dep mälimdedi.

Bügin Astana qalasında ötken «Astana Club» otırısında söz söylegen Nwrswltan Nazarbaev Qazaqstan men Qıtay qarım-qatınasına qısqaşa toqtaldı.

«Bireuler aytadı Qıtay memleket bolıp köringisi keletin qwrlıq dep. Qıtay – bwl halıq retinde özin tanıstırğısı keletin örkeniet. Biz Qıtaydıñ eñ jaqın körşisimiz. Bizdi 1700 şaqırımdıq şekara bölip twr. Biz eşqanday ekspansiyanı, eşqanday basıp aludı sezinip otırğan joqpız. Men Qıtay törağası Şi Jiñpiñmen jii kezdesemin jäne bwl taqırıptarda aşıq äñgimelesemin. Qıtaydıñ özge elderge ekspansiya jasaytın oyı joq. Olardıñ özderiniñ migraciya, jwmıssızdıq siyaqtı işi problemaları jetip artıladı. Kersinşe, olarğa damu üşin tınıştıq kerek. «Jibek jolı» jobasına 60-tan astam memleket qatısuda. Qıtayda qatısuşı memleketterdiñ damuına kömektesetindey qarjı bar. Men bwdan basıp alu qauipin körip twrğan joqpın» - dep mälimdedi Nazarbaev.

Esteriñizge salayıq, osıdan biraz uaqıt bwrın BAQ betterinde «Qazaqstan aumağına Qıtaydıñ 51 käsiporını salınadı» degen aqparat tarağan jäne bwl keyinnen halıq tarapınan ülken sınğa wşırağan. Al 2016 jılı bolğan jer mitinginde halıq «Qıtayğa jerimizdi bermeymiz!» degen lozungpen alañğa şıqqan.

Bwdan bölek soñğı jıldarı halıq arasında Qıtaydağı qazaq mäselesi qızıp twr. Sebebi jergilikti bilik arğı bettegi etnikalıq qazaqtardı qudalap, mäjbürli türde sayasi üyrenu lagerlerine attandıruda. Osığan baylanıstı bıltır Astanada ötken Düniejüzi qazaqtarınıñ V qwrıltayında Germaniyadan kelgen etnikalıq qazaq Ömirhan Altın Nazarbaevtıñ aldında mälimdeme jasağan. Keyinnen memleket basşısı SİM men qwzırlı organdarğa atalmış mäselege memlekettik deñgeyde aralasuğa tapsırma bergen. Biraq sol uaqıttan beri Qıtay tarapı Qazaqstan SİM jibergen notalarğa mardımdı jauap qatpay keledi.

"The Qazaq Times"