فوتو: ازاتتىق راديوسى.

نۇرسۇلتان نازارباەۆ: «قىتايدىڭ ءوزىنىڭ ىشكى پروبلەمالارى جەتىپ ارتىلادى» - دەپ مالىمدەدى.

بۇگىن استانا قالاسىندا وتكەن «Astana Club» وتىرىسىندا ءسوز سويلەگەن نۇرسۇلتان نازارباەۆ قازاقستان مەن قىتاي قارىم-قاتىناسىنا قىسقاشا توقتالدى.

«بىرەۋلەر ايتادى قىتاي مەملەكەت بولىپ كورىنگىسى كەلەتىن قۇرلىق دەپ. قىتاي – بۇل حالىق رەتىندە ءوزىن تانىستىرعىسى كەلەتىن وركەنيەت. ءبىز قىتايدىڭ ەڭ جاقىن كورشىسىمىز. ءبىزدى 1700 شاقىرىمدىق شەكارا ءبولىپ تۇر. ءبىز ەشقانداي ەكسپانسيانى، ەشقانداي باسىپ الۋدى سەزىنىپ وتىرعان جوقپىز. مەن قىتاي توراعاسى شي جيڭپيڭمەن ءجيى كەزدەسەمىن جانە بۇل تاقىرىپتاردا اشىق اڭگىمەلەسەمىن. قىتايدىڭ وزگە ەلدەرگە ەكسپانسيا جاسايتىن ويى جوق. ولاردىڭ وزدەرىنىڭ ميگراتسيا، جۇمىسسىزدىق سياقتى ءىشى پروبلەمالارى جەتىپ ارتىلادى. كەرسىنشە، ولارعا دامۋ ءۇشىن تىنىشتىق كەرەك. «جىبەك جولى» جوباسىنا 60-تان استام مەملەكەت قاتىسۋدا. قىتايدا قاتىسۋشى مەملەكەتتەردىڭ دامۋىنا كومەكتەسەتىندەي قارجى بار. مەن بۇدان باسىپ الۋ قاۋىپىن كورىپ تۇرعان جوقپىن» - دەپ مالىمدەدى نازارباەۆ.

ەستەرىڭىزگە سالايىق، وسىدان ءبىراز ۋاقىت بۇرىن باق بەتتەرىندە «قازاقستان اۋماعىنا قىتايدىڭ 51 كاسىپورىنى سالىنادى» دەگەن اقپارات تاراعان جانە بۇل كەيىننەن حالىق تاراپىنان ۇلكەن سىنعا ۇشىراعان. ال 2016 جىلى بولعان جەر ميتينگىندە حالىق «قىتايعا جەرىمىزدى بەرمەيمىز!» دەگەن لوزۋنگپەن الاڭعا شىققان.

بۇدان بولەك سوڭعى جىلدارى حالىق اراسىندا قىتايداعى قازاق ماسەلەسى قىزىپ تۇر. سەبەبى جەرگىلىكتى بيلىك ارعى بەتتەگى ەتنيكالىق قازاقتاردى قۋدالاپ، ءماجبۇرلى تۇردە ساياسي ۇيرەنۋ لاگەرلەرىنە اتتاندىرۋدا. وسىعان بايلانىستى بىلتىر استانادا وتكەن دۇنيەجۇزى قازاقتارىنىڭ V قۇرىلتايىندا گەرمانيادان كەلگەن ەتنيكالىق قازاق ءومىرحان التىن نازارباەۆتىڭ الدىندا مالىمدەمە جاساعان. كەيىننەن مەملەكەت باسشىسى ءسىم مەن قۇزىرلى ورگاندارعا اتالمىش ماسەلەگە مەملەكەتتىك دەڭگەيدە ارالاسۋعا تاپسىرما بەرگەن. بىراق سول ۋاقىتتان بەرى قىتاي تاراپى قازاقستان ءسىم جىبەرگەن نوتالارعا ماردىمدى جاۋاپ قاتپاي كەلەدى.

"The Qazaq Times"