Foto: top-news.kz

Almatı oblısınıñ köşi-qon basqarması 2 mıñ adamnıñ arızın nege qarausız qaldırdı?

Qazan ayınıñ 1-i küni «Adırna» qoğamdıq birlestigi Almatı qalası men oblısındağı qandastarmen kezdesu wyımdastırıp, qwjattıq qiındıqtarğa tap bolğan azamattardıñ arız-tilekterin qabıldadı. Kezdesuden keyin biz qoğamdıq qabıldaudı wyımdastırğan «Adırna» birlestiginiñ müşesi Qwrmetolla Mwhamethandı sözge tarttıq. Ol öz sözinde däl qazir birlestikke 2000-nan astam adamnıñ arızı kelip tüskendigin jäne sol arızdardı alıp 2 qazan küni Taldıqorğan qalasındağı oblıstıq köşi-qon basqarmasına baratındığın ayttı. Qalğan mäseleni sol saparden kelgennen keyin ğana aytıp bere alatının jetkizdi. Bügin atalmış sapar jöninde, qandastardıñ qwjattıq mäselesiniñ şeşilui jöninde Qwrmetolla mırzadan pikir aludıñ säti tüsti.

Foto: QT

"Adırna" qoğamdıq birlestiginiñ müşesi, Qwrmetolla Mwhamethan.

«Adırna» qoğamdıq birlestiginiñ müşesi, Qwrmetolla Mwhamethan: «Oblıstıq köşi-qon basşıları qandastardıñ bügingi şielenisti mäselesine bir ğana jauap aytadı. "Biz zañnan asa almaymız. Zañ tetikterin özgertuge, asıra paydalanuğa eşqanday qwqığımız joq. Iä, biz qandastardı Qıtay asırıp, keri qayrata almaymız. Degenmen QR zañnamasın da qwrmetteuimiz kerek." - deydi. Bwl orındı söz ärine. Rasında zañğa salsaq, qandastar mäselesin zañ boyınşa rettesek birtalayı Qıtayğa şığıp ketuleri kerek. Qalğan mınau oralman märtebesiniñ uaqıtı ötip ketken 5000-nan astam qandasımız QR azamattığın eşqaşan almauı kerek. Bwl degeniñiz kün ötken sayın olardıñ Qazaqstanda twruğa degen uaqıttarınıñ azayıp bara jatqanının körsetedi. YAğni, ay aunağan sayın olardıñ pasporttarınıñ, qolda bar qwjattarınıñ uaqıtı ötip jatır. Uaqıt kütip twrmaydı...».

Ärine Almatı oblıstıq köşi-qon basqarmasınıñ aytıp otırğan «zañ ayasında ğana jwmıs istey alamız» degen jauabına qanday da bir qarsı pikir aytu mümkin emes. Öytkeni QR zañı kedeyge de, bayğa da, qarağa da, hanğa da zañ jüzinde birdey. Basa aytamız zañ jüzinde birdey. Al ol zañnıñ bizdiñ elimizde qanşalıqtı därejede orındalıp jatqanın kündelikti ömirde közben körip, qwlaqpen estip jürmiz. Bizdiñ bilik basında otırğan «jartı qwdaylardıñ» aldına isiñ tüsip bara qalsañ, zañnan attap kete almay qalatın ädetterine Täuelsizdik alğan 27 jılda etimiz üyrenip te ketti ğoy. Jä, onı qoyışı, odanda sizderdiñ nazarlarıñızğa atalmış mäselege tikeley aralasıp jürgen belgili advokat Abzal Qwspannıñ pikirin wsınayıq.

Advokat, Abzal Qwspan. Foto: QT

Täuelsiz advokat, Abzal Qwspan: «Oblısta şarua şeşilmeydi. Şeşilse tek Astanada ğana şeşiledi. Oblıstağılar zañdı orındauşılar ğana. 2000 arız degen öte ülken mäsele. Biz bwl arızdardı İİM, Köşi-qon komiteti jäne SİM arnap ekige bölip jatırmız. Men bwlardı özimniñ atımnan mindetti türde ministrlikterge tapsıramın. Bwl qalayda biıl jüzege asıratılatın şarua. Biraq kim arız tapsırdı solardıñ mäselesin ğana şeşemiz. Qayta-qayta bwl mäselemen aynalısamın dep men oylamaymın. Arız tapsıru procedurası bir aydıñ köleminde jüzege asırıladı dep oylaymın».

Abzal mırza aytqanday, oblıstağılar zañdı tek orındauşılar ğana. Biraq sol orındauşılar bar zañdı qanşalıqtı därejede orındap otır? Eki mıñ adamnıñ arızın qaraudıñ ornına «zañnan attap kete almaymız» degen jauaptıñ özi qanşalıqtı dwrıs? Qwzırlı organdağılar zañğa emes halıqqa jwmıs isteytindikterin qay uaqıtta tüsinedi? Swraq köp, jauap joq...

«The Qazaq Times» portalı aldağı uaqıtta da atalmış mäseleni nazarda wstaydı jäne qwjatsız qalğan qandastar mäselesine qatıstı aqparattardı jariyalaytın boladı.

«The Qazaq Times»