فوتو: top-news.kz

الماتى وبلىسىنىڭ كوشى-قون باسقارماسى 2 مىڭ ادامنىڭ ارىزىن نەگە قاراۋسىز قالدىردى?

قازان ايىنىڭ 1-ءى كۇنى «ادىرنا» قوعامدىق بىرلەستىگى الماتى قالاسى مەن وبلىسىنداعى قانداستارمەن كەزدەسۋ ۇيىمداستىرىپ، قۇجاتتىق قيىندىقتارعا تاپ بولعان ازاماتتاردىڭ ارىز-تىلەكتەرىن قابىلدادى. كەزدەسۋدەن كەيىن ءبىز قوعامدىق قابىلداۋدى ۇيىمداستىرعان «ادىرنا» بىرلەستىگىنىڭ مۇشەسى قۇرمەتوللا مۇحامەتحاندى سوزگە تارتتىق. ول ءوز سوزىندە ءدال قازىر بىرلەستىككە 2000-نان استام ادامنىڭ ارىزى كەلىپ تۇسكەندىگىن جانە سول ارىزداردى الىپ 2 قازان كۇنى تالدىقورعان قالاسىنداعى وبلىستىق كوشى-قون باسقارماسىنا باراتىندىعىن ايتتى. قالعان ماسەلەنى سول ساپاردەن كەلگەننەن كەيىن عانا ايتىپ بەرە الاتىنىن جەتكىزدى. بۇگىن اتالمىش ساپار جونىندە، قانداستاردىڭ قۇجاتتىق ماسەلەسىنىڭ شەشىلۋى جونىندە قۇرمەتوللا مىرزادان پىكىر الۋدىڭ ءساتى ءتۇستى.

فوتو: QT

"ادىرنا" قوعامدىق بىرلەستىگىنىڭ مۇشەسى، قۇرمەتوللا مۇحامەتحان.

«ادىرنا» قوعامدىق بىرلەستىگىنىڭ مۇشەسى، قۇرمەتوللا مۇحامەتحان: «وبلىستىق كوشى-قون باسشىلارى قانداستاردىڭ بۇگىنگى شيەلەنىستى ماسەلەسىنە ءبىر عانا جاۋاپ ايتادى. ء"بىز زاڭنان اسا المايمىز. زاڭ تەتىكتەرىن وزگەرتۋگە، اسىرا پايدالانۋعا ەشقانداي قۇقىعىمىز جوق. ءيا، ءبىز قانداستاردى قىتاي اسىرىپ، كەرى قايراتا المايمىز. دەگەنمەن قر زاڭناماسىن دا قۇرمەتتەۋىمىز كەرەك." - دەيدى. بۇل ورىندى ءسوز ارينە. راسىندا زاڭعا سالساق، قانداستار ماسەلەسىن زاڭ بويىنشا رەتتەسەك ءبىرتالايى قىتايعا شىعىپ كەتۋلەرى كەرەك. قالعان مىناۋ ورالمان مارتەبەسىنىڭ ۋاقىتى ءوتىپ كەتكەن 5000-نان استام قانداسىمىز قر ازاماتتىعىن ەشقاشان الماۋى كەرەك. بۇل دەگەنىڭىز كۇن وتكەن سايىن ولاردىڭ قازاقستاندا تۇرۋعا دەگەن ۋاقىتتارىنىڭ ازايىپ بارا جاتقانىنىن كورسەتەدى. ياعني، اي اۋناعان سايىن ولاردىڭ پاسپورتتارىنىڭ، قولدا بار قۇجاتتارىنىڭ ۋاقىتى ءوتىپ جاتىر. ۋاقىت كۇتىپ تۇرمايدى...».

ارينە الماتى وبلىستىق كوشى-قون باسقارماسىنىڭ ايتىپ وتىرعان «زاڭ اياسىندا عانا جۇمىس ىستەي الامىز» دەگەن جاۋابىنا قانداي دا ءبىر قارسى پىكىر ايتۋ مۇمكىن ەمەس. ويتكەنى قر زاڭى كەدەيگە دە، بايعا دا، قاراعا دا، حانعا دا زاڭ جۇزىندە بىردەي. باسا ايتامىز زاڭ جۇزىندە بىردەي. ال ول زاڭنىڭ ءبىزدىڭ ەلىمىزدە قانشالىقتى دارەجەدە ورىندالىپ جاتقانىن كۇندەلىكتى ومىردە كوزبەن كورىپ، قۇلاقپەن ەستىپ ءجۇرمىز. ءبىزدىڭ بيلىك باسىندا وتىرعان «جارتى قۇدايلاردىڭ» الدىنا ءىسىڭ ءتۇسىپ بارا قالساڭ، زاڭنان اتتاپ كەتە الماي قالاتىن ادەتتەرىنە تاۋەلسىزدىك العان 27 جىلدا ەتىمىز ۇيرەنىپ تە كەتتى عوي. ءجا، ونى قويىشى، وداندا سىزدەردىڭ نازارلارىڭىزعا اتالمىش ماسەلەگە تىكەلەي ارالاسىپ جۇرگەن بەلگىلى ادۆوكات ابزال قۇسپاننىڭ پىكىرىن ۇسىنايىق.

ادۆوكات، ابزال قۇسپان. فوتو: QT

تاۋەلسىز ادۆوكات، ابزال قۇسپان: «وبلىستا شارۋا شەشىلمەيدى. شەشىلسە تەك استانادا عانا شەشىلەدى. وبلىستاعىلار زاڭدى ورىنداۋشىلار عانا. 2000 ارىز دەگەن وتە ۇلكەن ماسەلە. ءبىز بۇل ارىزداردى ءىىم، كوشى-قون كوميتەتى جانە ءسىم ارناپ ەكىگە ءبولىپ جاتىرمىز. مەن بۇلاردى ءوزىمنىڭ اتىمنان مىندەتتى تۇردە مينيسترلىكتەرگە تاپسىرامىن. بۇل قالايدا بيىل جۇزەگە اسىراتىلاتىن شارۋا. بىراق كىم ارىز تاپسىردى سولاردىڭ ماسەلەسىن عانا شەشەمىز. قايتا-قايتا بۇل ماسەلەمەن اينالىسامىن دەپ مەن ويلامايمىن. ارىز تاپسىرۋ پروتسەدۋراسى ءبىر ايدىڭ كولەمىندە جۇزەگە اسىرىلادى دەپ ويلايمىن».

ابزال مىرزا ايتقانداي، وبلىستاعىلار زاڭدى تەك ورىنداۋشىلار عانا. بىراق سول ورىنداۋشىلار بار زاڭدى قانشالىقتى دارەجەدە ورىنداپ وتىر؟ ەكى مىڭ ادامنىڭ ارىزىن قاراۋدىڭ ورنىنا «زاڭنان اتتاپ كەتە المايمىز» دەگەن جاۋاپتىڭ ءوزى قانشالىقتى دۇرىس؟ قۇزىرلى ورگانداعىلار زاڭعا ەمەس حالىققا جۇمىس ىستەيتىندىكتەرىن قاي ۋاقىتتا تۇسىنەدى؟ سۇراق كوپ، جاۋاپ جوق...

«The Qazaq Times» پورتالى الداعى ۋاقىتتا دا اتالمىش ماسەلەنى نازاردا ۇستايدى جانە قۇجاتسىز قالعان قانداستار ماسەلەسىنە قاتىستى اقپاراتتاردى جاريالايتىن بولادى.

«The Qazaq Times»