استانادان باستالعان ۇلى دالا اسارى تۇركىستاندا جالعاسپاق. جاڭا وبلىس ورتالىعىنا كىم، نە سىيلايتىن بولدى؟

پرەزيدەنت نۇرسۇلتان نازارباەۆ قازاقستانداعى الىپ كومپانيالار مەن حولدينگ يەلەرىنە تۇركىستان قالاسىنا جاڭا عيماراتتار سالىپ بەرۋدى تاپسىردى. پرەزيدەنتتىڭ تاپسىرىسى بويىنشا، الەكساندر بەلوۆيچتىڭ باسقارۋىنداعى «بازيس-ا» كومپانياسى جاڭا وبلىس ورتالىعىنا تەاتر، ميللياردەر پاتوح شوديەۆتىڭ «ERG» كومپانياسى تۇركى حالىقتارىنىڭ مۇراجايىن، «قازمۇنايگاز» ۇلتتىق كومپانياسى زاماناۋي ستاديون، «BI Group» كومپانياسى قازاق حاندارى، بيلەرى جانە باتىرلارىنا ارنالعان ورتالىق، «قازاقستان تەمىر جولى» جاستار سارايىن، «KEGOC» اكتسيونەرلىك قوعامى قوجا احمەت ياسساۋيگە ارنالعان ميني مۋزەي، ستول تەننيسى فەدەراتسياسىنىڭ باشىسى دانيار ابىلعازين سۋ سپورتى كەشەنىن، Astana Group كومپانياسى اۆتوسالون سىيلايتىن بولدى. ءبىر سوزبەن ايتقاندا تۇركى دۇنيەسىنىڭ ورتالىعى سانالاتىن تۇركىستان قالاسىن قازاقستاندىق ميللياردەرلەر اسارلاتىپ ءجۇرىپ استانا دەڭگەيىنە جەتكىزبەسە دە، زاماناۋي قالا دارەجەسىنە جەتكىزبەك. استانا دەمەكشى، وسى تۇستا ەلوردامىزدىڭ 20 جىلدىق مەرەي تويىنا 14 وبلىستىڭ نە سىيلاعانىن ايتا كەتكەن ءجون شىعار.

ەستەرىڭىزدە بولسا، شىلدە ايىنىڭ 6 كۇنى نۇرسۇلتان نازارباەۆتىڭ تۋعان كۇنىمەن تۇسپا-تۇس كەلگەن استانا قالاسىنىڭ 20 جىلدىق مەرەي تويىنا قىزىلوردا وبلىسى عارىشتىق تەحنولوگيالار مۋزەيىن (1,5 ملرد تەڭگە), الماتى قالاسى 250 ورىندىق بالاباقشا (1,084 ملرد تەڭگە), شىعىس قازاقستان وبلىسى مۋزىكالىق فونتان (1,082 ملرد تەڭگە), اقتوبە وبلىسى «بەيبىتشىلىك قابىرعاسىن» (1 ملرد تەڭگە) سىيعا تارتقان. بۇل قۇنى 1 ميلليارد تەڭگەدەن استقان سىيلىقتاردىڭ ءبىر سىپىراسى عانا. نەگىزىندە استانانىڭ بۇل جولعى تۋعان كۇنىنە 14 وبلىس 6 ميلليارد تەڭگە قارجى جۇمساعان.

"The Qazaq Times"