QR Sırtqı ister ministri Qayrat Äbdirahmanov etnikalıq qazaqtardıñ mäselesi jaylı bayandadı.

Büginde 700 etnikalıq qazaqtıñ Qıtaydan keluine qwqığı joq.

«Qazir Şıñjañ Wyğır avtonomiyalıq audanınıñ biligi 675 etnikalıq qazaqtıñ Qazaqstanğa keluine rwqsat beru mäselesin qarap jatır. Bügin, 7 tamızda, qos azamattığı bar 19 azamattıñ 15-ine salınğan uaqıtşa tıyım alındı», – deydi Äbdirahmanov.

Ministrdiñ aytuınşa, mäsele tolıq şeşilgen joq. Alayda Qazaqstan tarapınan barlıq jağday jasalıp jatır.

«Beyjiñ men Ürimjide, Almatıdağı Qıtaydıñ bas elşiliginde resmi kezdesuler ötkizip jatırmız. Mäsele 24 sağat boyı qaralıp jatır. Memleket basşısı bwl mäseleni nazarda wstap qana qoymay, şeşimin tabu kerektigin tapsırğan bolatın», – dedi ministr.

Ministr Qazaqstan azamattığın alğan etnikalıq qazaqtardıñ Qıtayda jinağan zeynetaqısın ala almau mäselelesi de bar ekenin atadı. Bwl jöninde de jwmıs jürgizilip jatqanın jetkizdi.

Esteriñizge salayıq, tamız ayınıñ 1-i küni Panfilov audandıq sotı «Qazaqstan şekarasın zañsız kesip ötti» degen ayıp tağılğan Qıtay azamatı, etnikalıq qazaq Sayragül Sauıtbaydı sot zalınan bosatqan. Bwl qoğamda qızu talqılanıp, azamattıq belsendeler, jurnalister men sayasatkerler Qazaqstan sotınıñ bwl şeşimine oñ bağa bergen.

Qıtaydağı etnikalıq qazaqtardıñ qısım körip jatqandığı jöninde BAQ betterinde 2017 jıldıñ säuir ayınan bastap aytıla bastağan. Däl osı jılı Astana qalasında ötken Düniejüzi qazaqtarınıñ besinşi rettik qwrıltayında germaniyalıq qazaq Ömirhan Altın prezident Nwrswltan Nazarbaevqa Qıtaydağı etnikalıq qazaqtardıñ jergilikti bilik tarapınan qısım körip jatqandığı jöninde aytqan.

 “The Qazaq Times”