Wlttıq Qauipsizdik Komitetiniñ qamauında otırğan Sayragül Sautbaydıñ tuıstarı men qoğam belsendileri baspasöz mäslihatın ötkizdi.

Baspasöz mäslihatına Sayragül Sautbaydıñ küyeui Uäli Släm qoğam belsendileri Rısbek Toqtasınwlı, Jwmabek Älimhan jäne jurnalist Gülmira Toyboldina sındı azamattar qatıstı. Baspasöz mäslihatında alğaşqılardıñ biri bolıp söz alğan Sayrangül Sautbaydıñ küyeui Uäli Släm bılay dedi:

Uäli Släm. Foto: QT

«Äyelimdi tört künniñ aldında üyge qarapayım kiingen Bauırjan Quanış jäne Berik degen eki jigit kelip, seni qıtayğa da bermeymiz, pasportıñdı da bitirip beremiz dep alıp ketti. Men erteñinde tañerteñ Qorğasqa bardım. Onda olar mağan swraqtar qoydı, toq tayaqpen wrdı, büyirimnen wrdı. Sen ötirik ayttıñ dedi. Duman jäne Ekpin degen eki adamdı tanisıñ. Seniñ tuıstarıñ eken dedi. Biraq men olardı tanımaytınımdı ayttım. Biraq olar sen küyeuisiñ, äyeliñniñ şekaradan qalay ötkenin, oğan kim jol körsetkenin sözsiz bilesiñ dedi. Alayda Sayragül mağan eşteñe aytpadı. Men äyelimmen üş jıl boyı dwrıs söylese almadım. Äyelimmen balalarımdı ertip Qorğasta qañtar ayına deyin üş-tört ret qana kezdeskem».

Öz kezeginde baspasöz mäslihatın wyımdastıruşılardıñ biri Rısbek Toqtasınwlı atalmış mäselege baylanıstı öz oyın tömendegidey tarqattı:

Rısbek Toqtasınwlı. Foto: QT

«Sayragül Sautbay degen kisi Qıtayğa ketken. Sol jaqta qwjattarı tartıp alınğan jäne Qazaqstandağı otbasına qaytu mümkindiginen ayırılğan. Sayragül Qazaqstandağı otbasın sağınıp, şarasızdıqtan Qıtay şekara qızmeti ökilderine jalğan qwjat jasatıp, säuir ayında Qazaqstan şekarasınan ötken. Osıdan üş kün bwrın Qazaqstan Wlttıq Qauipsizdik komiteti şekara qızmeti qızmetkerleri üyinen alıp ketken. Qazirgi jağdayda onıñ Qıtay jağına qayta ötkizip jiberu qaupi tönip twr. Eger ol Qıtayğa ötip ketetin bolsa, ol adamnıñ qaytıp Qazaqstan topırağın basa almaytındığı belgili. Sebebi Qıtay zañı qatal, onı ölim jazasına nemese ömirlik türmege kesui mümkin. Bizdi alañdatıp otırğan närse osı».

Bwdan bölek baspasöz mäslihatında Sayragül Sautbaydıñ isin tanımal qorğauşı, Abzal Qwspannıñ öz qolına alğandığı mälim etildi. Osıdan keyin Qazaq Times tilşisi Abzal Qwspanğa habarlasıp, mäseleniñ män-jayın anıqtağan. Alayda ol äzirge ispen tolıqtay tanısıp ülgermegendigin aytıp, qazirge Sayragül Sautbayğa «sayasi baspana» swrau bastı mäsele ekendigin aytqan.

Büginde Qıtaydağı etnikalıq qazaqtardıñ basındağı qiın jağday älemdik BAQ betterinde köptep köterilip jür. Osınıñ aldında ğana QR Şekaralıq baqılau qızmeti Mısırğa qaytarıp jibergen qandasımızdıñ jağdayı oñınan şeşim tapqan edi. Bwl istide oñ şeşim tabadı degen senimdemiz.

“The Qazaq Times”