ۇلتتىق قاۋىپسىزدىك كوميتەتىنىڭ قاماۋىندا وتىرعان سايراگۇل ساۋتبايدىڭ تۋىستارى مەن قوعام بەلسەندىلەرى ءباسپاسوز ءماسليحاتىن وتكىزدى.

ءباسپاسوز ءماسليحاتىنا سايراگۇل ساۋتبايدىڭ كۇيەۋى ءۋالي ءسلام قوعام بەلسەندىلەرى رىسبەك توقتاسىنۇلى، جۇمابەك ءالىمحان جانە جۋرناليست گۇلميرا تويبولدينا سىندى ازاماتتار قاتىستى. ءباسپاسوز ءماسليحاتىندا العاشقىلاردىڭ ءبىرى بولىپ ءسوز العان سايرانگۇل ساۋتبايدىڭ كۇيەۋى ءۋالي ءسلام بىلاي دەدى:

ءۋالي ءسلام. فوتو: QT

«ايەلىمدى ءتورت كۇننىڭ الدىندا ۇيگە قاراپايىم كيىنگەن باۋىرجان قۋانىش جانە بەرىك دەگەن ەكى جىگىت كەلىپ، سەنى قىتايعا دا بەرمەيمىز، پاسپورتىڭدى دا ءبىتىرىپ بەرەمىز دەپ الىپ كەتتى. مەن ەرتەڭىندە تاڭەرتەڭ قورعاسقا باردىم. وندا ولار ماعان سۇراقتار قويدى، توق تاياقپەن ۇردى، بۇيىرىمنەن ۇردى. سەن وتىرىك ايتتىڭ دەدى. دۋمان جانە ەكپىن دەگەن ەكى ادامدى تانيسىڭ. سەنىڭ تۋىستارىڭ ەكەن دەدى. بىراق مەن ولاردى تانىمايتىنىمدى ايتتىم. بىراق ولار سەن كۇيەۋىسىڭ، ايەلىڭنىڭ شەكارادان قالاي وتكەنىن، وعان كىم جول كورسەتكەنىن ءسوزسىز بىلەسىڭ دەدى. الايدا سايراگۇل ماعان ەشتەڭە ايتپادى. مەن ايەلىممەن ءۇش جىل بويى دۇرىس سويلەسە المادىم. ايەلىممەن بالالارىمدى ەرتىپ قورعاستا قاڭتار ايىنا دەيىن ءۇش-ءتورت رەت قانا كەزدەسكەم».

ءوز كەزەگىندە ءباسپاسوز ءماسليحاتىن ۇيىمداستىرۋشىلاردىڭ ءبىرى رىسبەك توقتاسىنۇلى اتالمىش ماسەلەگە بايلانىستى ءوز ويىن تومەندەگىدەي تارقاتتى:

رىسبەك توقتاسىنۇلى. فوتو: QT

«سايراگۇل ساۋتباي دەگەن كىسى قىتايعا كەتكەن. سول جاقتا قۇجاتتارى تارتىپ الىنعان جانە قازاقستانداعى وتباسىنا قايتۋ مۇمكىندىگىنەن ايىرىلعان. سايراگۇل قازاقستانداعى وتباسىن ساعىنىپ، شاراسىزدىقتان قىتاي شەكارا قىزمەتى وكىلدەرىنە جالعان قۇجات جاساتىپ، ءساۋىر ايىندا قازاقستان شەكاراسىنان وتكەن. وسىدان ءۇش كۇن بۇرىن قازاقستان ۇلتتىق قاۋىپسىزدىك كوميتەتى شەكارا قىزمەتى قىزمەتكەرلەرى ۇيىنەن الىپ كەتكەن. قازىرگى جاعدايدا ونىڭ قىتاي جاعىنا قايتا وتكىزىپ جىبەرۋ قاۋپى ءتونىپ تۇر. ەگەر ول قىتايعا ءوتىپ كەتەتىن بولسا، ول ادامنىڭ قايتىپ قازاقستان توپىراعىن باسا المايتىندىعى بەلگىلى. سەبەبى قىتاي زاڭى قاتال، ونى ءولىم جازاسىنا نەمەسە ومىرلىك تۇرمەگە كەسۋى مۇمكىن. ءبىزدى الاڭداتىپ وتىرعان نارسە وسى».

بۇدان بولەك ءباسپاسوز ءماسليحاتىندا سايراگۇل ساۋتبايدىڭ ءىسىن تانىمال قورعاۋشى، ابزال قۇسپاننىڭ ءوز قولىنا العاندىعى ءمالىم ەتىلدى. وسىدان كەيىن Qazaq Times ءتىلشىسى ابزال قۇسپانعا حابارلاسىپ، ماسەلەنىڭ ءمان-جايىن انىقتاعان. الايدا ول ازىرگە ىسپەن تولىقتاي تانىسىپ ۇلگەرمەگەندىگىن ايتىپ، قازىرگە سايراگۇل ساۋتبايعا «ساياسي باسپانا» سۇراۋ باستى ماسەلە ەكەندىگىن ايتقان.

بۇگىندە قىتايداعى ەتنيكالىق قازاقتاردىڭ باسىنداعى قيىن جاعداي الەمدىك باق بەتتەرىندە كوپتەپ كوتەرىلىپ ءجۇر. وسىنىڭ الدىندا عانا قر شەكارالىق باقىلاۋ قىزمەتى مىسىرعا قايتارىپ جىبەرگەن قانداسىمىزدىڭ جاعدايى وڭىنان شەشىم تاپقان ەدى. بۇل ىستىدە وڭ شەشىم تابادى دەگەن سەنىمدەمىز.

“The Qazaq Times”