Resey tauar baqılauğa jaña ereje şığarmaq. Foto: Rossiya Navsegda.

Resey ükimeti keler jıldan bastap arnayı marka japsırılatın tauarlardıñ tizimin şığarmaq. Arnayı marka negizinen kiimder, iissu, ärlik bwyımdarğa bağıttalğan. Arnayı marka japsıru degen ne nemese ol nege kerek boldı? BBC Resey ükimetiniñ bwl qadamdarına taldau jasap kördi.

Resey ükimeti bwl şaralardıñ kantrabandalıq jolmen kirgen tauarlarğa şekteu qoyu maqsatında jasalıp jatqanın aytadı. Qazirgi kezde Reseyde keybir tauarlarğa arnayı markalar japsırılıp, ondağı elektrondı orın belgileu qwrılğısı arqılı tauardıñ qozğalısın baqılap otırmaq. Aytalıq, tauardıñ öndiruşiden twtınuşığa deyingi aralıqtağı qozğalısın qarap otırmaq.

Aldağı uaqıtta bwl jüye däri-därmekter men temeki sekildi önimderge de qoldanu josparda twr. Däri-därmekke DataMatrix belgisiniñ kömegimen atalğan jüyeni engizu täjribeleri sınaqtan ötude. Däru turalı mälimetter «Markirovka» dep atalatın jüyede ornatıladı da, onı twtınuşı smartfon arqılı sapasın, şın-jalğanın anıqtay aladı. Resey ükimeti bwl täjribeni 2020 jılğa deyin tolıqtay iske qosıp bolmaq.

Tizimdegi tauarlar

Resey ükimetiniñ qararı boyınşa 2019 jıldan bastap mına tauarlarğa atalğan täjribe qoldanıla bastaydı: temeki önimderi, iissular, kölik döñgelekteri, kiimder, ärlik bwyımdar, fotokamera jäne t.b. tauarlar bar.

Resey ükimetiniñ jaña ekonomikalıq sayasatı qanday boluı mümkin?

Atalğan tauarlarğa marka qanday jolmen basılatını anıq emes. Bwl jüyeniñ payda-ziyanı turalı talas-tartıs köp. Keybir taraptar bwl öndiruşilerge qıruar artıq şığındardı alıp keledi, al ükimet öndiruşilerdi şığınğa batırıp, tauarlardı baqılauda wstaydı degen pikirler aytuda.

RBK basılımı British American Tobacco kompaniyasına silteme jasay otırıp, atalğan jüye iske qosılğannan keyin temeki öndiruşilerdiñ alğaşqı jıldağı şığını 185 mln AQŞ dolları bolatının alğa tarttı. Al bwğan şamamen 3 mlrd rubl' kölemindegi jabdıqtau şığını, 1,5 mlrd rubl' kölemindegi dokument almastıru şığındarın qosuğa boladı.

«Vedomosti» basılımınıñ aytuınşa tauarlarğa arnayı marka basu kez-kelgen tauardıñ bağasın 10 payızğa joğarılatuı mümkin. Atalğan basılımğa bwl esepti, ärlik bwyımdarı men iissu öndiruşi kompaniyalardıñ jetekşileri bergen. Twrmıstıq bwyımdar men ärlik bwyımdarın öndiruşi toptar Resey ükimetiniñ bwl sayasatına narazılıq tanıtuda. Olar marka basu qımbat bolmağanımen, arzan tauarlardıñ bağasın ırıqsız türde qımbattatıp twtınuşılarğa da salmaq tüsiredi dep qaraydı.

Ayta ketu kerek, Euraziyalıq ekonomikalıq odaq qwramında bolğandıqtan, Qazaqstandıq öndiruşilerge de Reseydiñ jaña erejesi özindik äserin tigizedi. Keybir sarapşılar, bwl sayasat jüzege assa ülken äleumettik, ekonomikalıq tolqulardı tudıruı da ğajap emes degen oydı aytadı.

“The Qazaq Times”