I.Tasmağambetov. Foto: primeminister.kz

Bügin Qazaqstan Respublikası Prem'er-Ministriniñ orınbasarı Imanğali Tasmağambetovtiñ törağalığımen Alaşorda qozğalısınıñ qwrılğanına 100 jıl toluına oray Alaş ziyalılarınıñ şığarmaşılıq mwraların zerdeleu jäne onı jandandıru mäseleleri boyınşa keñes ötti. Bwl turalı ükimettiñ resmi saytı habarlaydı.

Bwl rette, Alaş qozğalısınıñ täuelsizdik mwrattarı üşin kürestegi röli men mañızın, onıñ köşbasşılarınıñ sayasi-qwqıqtıq, wlttıq qwndılıqtarğa qatıstı közqarastarın, twjırımdarın jaña zamannıñ talaptarına say zerdeleu öte mañızdı.

«HH ğasırdıñ basında wlttıñ ziyalıları azattıq üşin bolğan köp ğasırlıq küreste mañızdı röl atqardı. «Alaş» alğaşqı sayasi partiyası jäne Alaş Orda ükimetiniñ payda boluı azamattıq kemeldengen jäne halıqtıñ bolaşaq tağdırın şeşe alatın qazaqtıñ sayasi ziyalılarınıñ joğarğı äleuetin körsetti», - dep atap ötti I. Tasmağambetov.

Bwl orayda, vice-prem'er elimizdegi Alaştanuşı tarihşılar men ädebietşiler, otandıq kino jäne televiziya salasınıñ mamandarımen birlese otırıp, tıñ bastamalardı – kitap şığaru, kino tüsiru mäselesin qolğa alu qajettigine toqtaldı.

«Alaştıñ 100 jıldığına dwrıstap dayındaluımız kerek. Qazir eñ bastısı, jaqsı jospar qwruımız qajet. Oğan bir-eki aptaday uaqıt alıp, dwrıs jospar qwrıp, onı Elbasımen kelisip, uaqıtın belgilegen jön. Alaştıñ 100 jıldığı sol zamanmen qalıp qoymay, bügingi täuelsiz memleketpen baylanıstıru orındı boladı. Alaş ziyalılarınıñ armanı, onıñ orındalğanı, täuelsiz el bolğanımız, osınıñ barlığı wlttıq jäne tarihi sananı köteretin jaqsı dünie boluı kerek», - dedi vice-prem'er.

Sonımen qatar, keñes barısında Ahmet Baytwrsınwlı muzey-üyin memlekettik menşikke berip, onıñ märtebesin respublikalıq deñgeyge köteru, ğalımnıñ ğılımi eñbekteriniñ 10 tomdığın jarıqqa şığaru mäselesi qaraldı.

Keñes qorıtındısı boyınşa I. Tasmağambetov QR Mädeniet jäne sport ministrligine Alaş Orda ükimetiniñ qwrıluı men qalıptasuına atsalısqan wlt ziyalılarınıñ ömirbayanın zerttep, olar jöninde körkem ömirbayandıq kitap şığarudı jäne Ahmet Baytwrsınov ğılımi eñbekteriniñ 10 tomdığın basıp şığarudı tapsırdı.

Aldağı uaqıtta Ahmet Baytwrsınwlınıñ muzey üyiniñ ğimaratı respublikalıq mañızı bar Tarih jäne mädeniet eskertkişteriniñ memlekettik tizimine engiziletin boladı.

QR Bilim jäne ğılım ministrligine muzey-üydi memlekettik menşikke alu jäne onı A. Baytwrsınov atındağı Til bilimi institutı janınan A. Baytwrsınwlı muzey-üyi – ğılımi ortalığı retinde qwru tapsırıldı.

Eske sala keteyik, ötken aptada QR Prem'er-Ministriniñ orınbasarı I. Tasmağambetov Almatı qalasına is-sapar ayasında Ahmet Baytwrsınwlı mwrajay üyinde bolıp, onıñ jwmısımen tanısqan edi.

“The Qazaq Times”