Aqorda hatşısı men äkim, basqarma basşısı siyaqtı aqjağalılar men öner jwldızdarınıñ basın qosqan «erejesiz keşte» 50 adam ğana bola qoymağanı anıq. Foto: QR Eñbek siñirgen qayratkeri Qaragöz Süleymenova Instagram-paraqşasındağı stroizinen skrin

Äleumettik jelilerde qazaqstandıq belgili öner adamdarı men sayasi qızmetkerler, şeneunikterdiñ toyda sayran salıp jürgen beynejazbalar jariyalanıp, qoldanuşılar arasında keñinen tarap sınğa ilikti. «Qızıl aymaqtan» aylap şığa almay otırğan Almatı qalası men astanada karantin kezindegi köpke ortaq tıyımğa qaramastan tanımal twlğalardıñ wyımdastıruımen ya qatısuımen ötetin jiındar azaymay twr, jauaptı mekemeler men bilik olarğa şara qoldanarda tartınıp qaladı.

Ötken aptada Almatıdağı Svetlana modern cuisine meyramhanasında belgili akter Doshan Joljaqsınovtıñ 70 jasqa toluına arnalğan mereytoy ötti. Almatı qalasınıñ sanitarlıq-epidemiologiyalıq baqılau departamenti jetekşisiniñ orınbasarı Säduaqas Bayğabılovtıñ aytuınşa, monitoring toptardan jiın kezinde karantin erejesi bwzılğanı jaylı material kelip tüsse, sanitarlıq-epidemiologiyalıq baqılau departamenti tiisti şaralar qoldanadı.

Malim.kz internet basılımı qoğam talqısına ilikken mereytoydağı karantin şaralarınıñ bwzılğan-bwzılmağanın qalalıq SES basşısı äri bas sanitar däriger Jandarbek Bekşinniñ özinen bilmek niette habarlasqan, jurnalist ekenin estigen boyda twtqanı birden qoya salğan, keyin telefonın mülde kötermegen.

Qazaqstannıñ bas memlekettik sanitarlıq därigeri Erlan Qiyasovtıñ 24 qırküyektegi № 44 qaulısı boyınşa, «qızıl aymaqtağı» öñirlerde eske alu, mereytoy, merekelik otbasılıq şaralarğa rwqsat etilgenin, alayda oğan Ashyq qosımşasında jasıl statusı bar 50 adam qatısa aladı. Degenmen videolardan atalğan keşte keminde jüz şaqtı qonaq bolğanı bayqaladı. Äleumettik araqaşıqtıq pen maska rejimi de saqtalmağan. Bwl videolardı aldımen mereytoy iesi Joljaqsınovtıñ äyeli telejürgizuşi, QR Eñbek siñirgen qayratkeri Qaragöz Süleymenova Instagram-paraqşasındagı storizge salğan bolatın.

Videoğa qarağanda, toyğa prezident Toqaevtıñ baspasöz hatşısı Berik Uäli, Öskemen qalasınıñ äkimi Jaqsılıq Omar, zeynetke şıqqan Qazaqstannıñ Reseydegi bwrınğı elşisi Imanğali Tasmağambetov, Almatı qalası urbanistika basqarmasınıñ basşısı Almashan Ahmedjanovtar qatısqan. Sonday-aq videolardan toyğa änşiler Maqpal Jünisova, Sayat Medeuov, Altınay Jorabaeva, Qayrat Nwrtas, fashion bloger Nwraş Jarmwhambetova, «Jigitter» kvarteti men olardıñ prodyuseri Erğali Äbdirayımov, tağı basqa änşiler men akterler barğanı körinedi.

«Eger audandıq monitoring toptarınan orın sanına baylanıstı şekteuler bwzılğanı jaylı materialar kelip tüsetin bolsa, onda wyımdastıruşılar men keluşilerdi äkimşilik jauapkerşilikke tartu qarastırıladı», – deydi Bayğabılov.

Almalı audanı äkiminiñ orınbasarı Erden Hayrullin Orda.kz basılımına bergen jauabında monitoring toptarına tiisti tapsırma berilgenin mälimdedi.

«Biz «Aşıq-maşıq» arqılı jasılmen kirgendi tekseremiz. «Aşıq» boyınşa barlıq qwjat pen bäriniñ qalay ötkeni turalı qwjattardı swrattıq. Qazir jauap kütip otırmız. Videonı (qanşa adam qatısqanın) äzirge körmedik. Äleumettik jelide jariyalanğan üzindilerdi ğana kördik. Onda eluden tömen, elu şaqtı adam. Al bizge jalpı videonı qarau kerek. Bwl mäsele baqılauda», – dedi Hayrullin orda.kz basılımına.

Bwğan deyin astanadağı şeneunikter men Almatıdağı bedeldi twlğalar ötkizgen birqatar jiın-otırıstar jöninde BAQ ökilderi men qoğam tarapınan tuğan swraqtar boyınşa sanitarlıq-epidemiologiyalıq baqılau qızmeti organdarı naqtı şeşim şığarmadı. Bar sebepti «monitoring toptardıñ fakti turalı materialdı joldamağanına» artadı.

Qalada pandemiya bastalğalı 180 mıñğa juıq adam auırğan, onıñ 2 mıñı ayğa almay qaytıs boldı. Qazaqstanda eñ wzaq uaqıt «qızıl aymaqta» qalıp otırğan eki qalanıñ biri de – Almatı. Dese de şeneunikter men jwldızdar karantin şekteuin toqtau körer emes. Sarapşılar mwnıñ qwqıqtıq twrğıda zañ üstemdigine salqının tigizip, azamattar arasında alalauşılıq pen jikti küşeytedi dep eskertedi.

Pandemiya bastalğalı Almatı qalasınıñ özinde karantin erejesin bwzdı degen ayıppen jeke twlğalar men şağın jäne orta käsipkerlerden jüzdegen million teñge ayıppwl öndirilgen.

The Qazaq Times