ي.تاسماعامبەتوۆ الاش ارىستارى تۋرالى كينو ءتۇسىرۋ جايىن ايتتى

بۇگىن قازاقستان رەسپۋبليكاسى پرەمەر-ءمينيسترىنىڭ ورىنباسارى يمانعالي تاسماعامبەتوۆتىڭ توراعالىعىمەن الاشوردا قوزعالىسىنىڭ قۇرىلعانىنا 100 جىل تولۋىنا وراي الاش زيالىلارىنىڭ شىعارماشىلىق مۇرالارىن زەردەلەۋ جانە ونى جانداندىرۋ ماسەلەلەرى بويىنشا كەڭەس ءوتتى. بۇل تۋرالى ۇكىمەتتىڭ رەسمي سايتى حابارلايدى.

بۇل رەتتە، الاش قوزعالىسىنىڭ تاۋەلسىزدىك مۇراتتارى ءۇشىن كۇرەستەگى ءرولى مەن ماڭىزىن، ونىڭ كوشباسشىلارىنىڭ ساياسي-قۇقىقتىق، ۇلتتىق قۇندىلىقتارعا قاتىستى كوزقاراستارىن، تۇجىرىمدارىن جاڭا زاماننىڭ تالاپتارىنا ساي زەردەلەۋ وتە ماڭىزدى.

«حح عاسىردىڭ باسىندا ۇلتتىڭ زيالىلارى ازاتتىق ءۇشىن بولعان كوپ عاسىرلىق كۇرەستە ماڭىزدى ءرول اتقاردى. «الاش» العاشقى ساياسي پارتياسى جانە الاش وردا ۇكىمەتىنىڭ پايدا بولۋى ازاماتتىق كەمەلدەنگەن جانە حالىقتىڭ بولاشاق تاعدىرىن شەشە الاتىن قازاقتىڭ ساياسي زيالىلارىنىڭ جوعارعى الەۋەتىن كورسەتتى»، - دەپ اتاپ ءوتتى ي. تاسماعامبەتوۆ.

بۇل ورايدا، ۆيتسە-پرەمەر ەلىمىزدەگى الاشتانۋشى تاريحشىلار مەن ادەبيەتشىلەر، وتاندىق كينو جانە تەلەۆيزيا سالاسىنىڭ ماماندارىمەن بىرلەسە وتىرىپ، تىڭ باستامالاردى – كىتاپ شىعارۋ، كينو ءتۇسىرۋ ماسەلەسىن قولعا الۋ قاجەتتىگىنە توقتالدى.

«الاشتىڭ 100 جىلدىعىنا دۇرىستاپ دايىندالۋىمىز كەرەك. قازىر ەڭ باستىسى، جاقسى جوسپار قۇرۋىمىز قاجەت. وعان ءبىر-ەكى اپتاداي ۋاقىت الىپ، دۇرىس جوسپار قۇرىپ، ونى ەلباسىمەن كەلىسىپ، ۋاقىتىن بەلگىلەگەن ءجون. الاشتىڭ 100 جىلدىعى سول زامانمەن قالىپ قويماي، بۇگىنگى تاۋەلسىز مەملەكەتپەن بايلانىستىرۋ ورىندى بولادى. الاش زيالىلارىنىڭ ارمانى، ونىڭ ورىندالعانى، تاۋەلسىز ەل بولعانىمىز، وسىنىڭ بارلىعى ۇلتتىق جانە تاريحي سانانى كوتەرەتىن جاقسى دۇنيە بولۋى كەرەك»، - دەدى ۆيتسە-پرەمەر.

سونىمەن قاتار، كەڭەس بارىسىندا احمەت بايتۇرسىنۇلى مۋزەي-ءۇيىن مەملەكەتتىك مەنشىككە بەرىپ، ونىڭ مارتەبەسىن رەسپۋبليكالىق دەڭگەيگە كوتەرۋ، عالىمنىڭ عىلىمي ەڭبەكتەرىنىڭ 10 تومدىعىن جارىققا شىعارۋ ماسەلەسى قارالدى.

كەڭەس قورىتىندىسى بويىنشا ي. تاسماعامبەتوۆ قر مادەنيەت جانە سپورت مينيسترلىگىنە الاش وردا ۇكىمەتىنىڭ قۇرىلۋى مەن قالىپتاسۋىنا اتسالىسقان ۇلت زيالىلارىنىڭ ءومىربايانىن زەرتتەپ، ولار جونىندە كوركەم ومىرباياندىق كىتاپ شىعارۋدى جانە احمەت بايتۇرسىنوۆ عىلىمي ەڭبەكتەرىنىڭ 10 تومدىعىن باسىپ شىعارۋدى تاپسىردى.

الداعى ۋاقىتتا احمەت بايتۇرسىنۇلىنىڭ مۋزەي ءۇيىنىڭ عيماراتى رەسپۋبليكالىق ماڭىزى بار تاريح جانە مادەنيەت ەسكەرتكىشتەرىنىڭ مەملەكەتتىك تىزىمىنە ەنگىزىلەتىن بولادى.

قر ءبىلىم جانە عىلىم مينيسترلىگىنە مۋزەي-ءۇيدى مەملەكەتتىك مەنشىككە الۋ جانە ونى ا. بايتۇرسىنوۆ اتىنداعى ءتىل ءبىلىمى ينستيتۋتى جانىنان ا. بايتۇرسىنۇلى مۋزەي-ءۇيى – عىلىمي ورتالىعى رەتىندە قۇرۋ تاپسىرىلدى.

ەسكە سالا كەتەيىك، وتكەن اپتادا قر پرەمەر-ءمينيسترىنىڭ ورىنباسارى ي. تاسماعامبەتوۆ الماتى قالاسىنا ءىس-ساپار اياسىندا احمەت بايتۇرسىنۇلى مۇراجاي ۇيىندە بولىپ، ونىڭ جۇمىسىمەن تانىسقان ەدى.

“The Qazaq Times”