Foto: Lenta.ru

Ändijan oqiğasına tikeley qatısı bar «eski gvardiya» ökili Zakir Almatovtıñ İşki ister ministrligine qaytıp oraluı Şavkat Mirzieev biliginiñ älsizdigi me, joq älde kezekti sayasi oyın ba?

Jaqında Özbekstan İşki ister ministrligine öz zamanında Islam Kärimovtıñ senimdi serikteriniñ biri bolğan Zakir Almatov vedomstva basşısı Pulat Babajanovtıñ keñesşisi bolıp tağayındaldı. Onıñ İşki ister ministrligine qaytıp oraluı kütpegen jañalıq boldı. Sebebi bwğan deyin Şavkat Mirzieev Wlttıq qauipsizdik komitetinen bastap, eldegi barlıq küş qwrılımdardı är mälimdemesi sayın qatañ sınnıñ astınan alıp, tipti WQK basşısı Rustam Inoyatovtıñ özin ornınan alıp tastağan. Köpşilik jwrt Inoyatov qızmetinen ketkende Mirzieev bilik tarmaqtarın Islam Kärimov komandasınan tolıqtay tazartuğa kiristi degen. Biraq şın mäninde olay bolmay şıqtı. Özbekstannıñ biznesinen bastap, küştik qwrılımdarına deyin öz qaramağına alğan Rustam Inoyatov qızmetinen ketkenimen Mirzieevtıñ oğan qarsı twratın qauqarı joq siyaqtı. Şeteldik sarapşılardıñ sözinşe, Mirzieev Zakir Almatovtı İşki ister ministrligine qayta şaqırtu arqılı Inoyatov jüyesine qarsı twrmaq. Sarapşılardıñ bwnday boljam jasauına sebep te joq emes.

Zakir Almatov bwğan deyin Islam Kärimovatıñ twsında İİM 1991 jıldan bastap 2006 jılğa deyin basqarğan. BAQ betterinde osı uaqıtqa deyin jarıq körgen materialdarğa süyenetin bolsaq, Zakir Almatov pen jaqında ğana qızmetinen ketken WQK basşısı Rustam Inoyatov öz zamanında Islam Kärimovatıñ senimine kiru üşin vedomstva aralıq küres jürgizgen. Biraq Ändijan oqiğası kezinde İşki ister ministrligi WQK aldında tize bügip, Almatov qızmetinen ketuge mäjbür bolğan. Onıñ otstavkağa ketuine WQK qızmetkerleriniñ Ändijan oqiğasına qatıstı qwpiya qwjattardı jariyalauı sebep bolğan. Jalpı, Zakir Almatov pen Rustam Inoyatov arasındağı teketires Ändijan oqiğasına deyin bastalğan.Atap aytqanda WQK men İİM-niñ bilik üşin küresti 1999 jılı Taşkent qalasında bolğan terrorlıq şabuıl kezinde bastağan. Beyresmi aqparat közderiniñ boljamı boyınşa, Taşkentte bolğan jarılıstı Inoyatovtıñ basqaruındağı Wlttıq Qauipsizdik komitetiniñ qızmetkerleri wyımdastırğan jäne onı Zakir Almatov bilgen. Biraq Islam Kärimovtıñ aldında däleldey almağan.

Jalpı, Zakir Almatovtıñ qaytıp oraluına är kim är qalay bağa berude. Biri Şavkat Mirzieev Almatovtı ülken sayasatqa qayta şaqıru arqılı onı Inoyatovqa qarsı paydalanbaq dese, endi biri Mirzieev Islam Kärimov komandasına qatısı bar «eski gvardiya» ökilderin jaña qızmetterge tartu arqılı öz baqılauında wstamaq deydi. Üşinşi bireuler Şavkat Mirzieev sırttay mıqtı bolıp köringenmen ol qazir kadr tapşılığına tap bolıp otırğan boluı mümkin.

“The Qazaq Times”