ميرزيەەۆ كارىموۆ «گۆاردياسىن» ءبىر-بىرىنە قارسى پايدالانۋدا

ءاندىجان وقيعاسىنا تىكەلەي قاتىسى بار «ەسكى گۆارديا» وكىلى زاكير الماتوۆتىڭ ىشكى ىستەر مينيسترلىگىنە قايتىپ ورالۋى شاۆكات ميرزيەەۆ بيلىگىنىڭ السىزدىگى مە، جوق الدە كەزەكتى ساياسي ويىن با؟

جاقىندا وزبەكستان ىشكى ىستەر مينيسترلىگىنە ءوز زامانىندا يسلام كارىموۆتىڭ سەنىمدى سەرىكتەرىنىڭ ءبىرى بولعان زاكير الماتوۆ ۆەدومستۆا باسشىسى پۋلات باباجانوۆتىڭ كەڭەسشىسى بولىپ تاعايىندالدى. ونىڭ ىشكى ىستەر مينيسترلىگىنە قايتىپ ورالۋى كۇتپەگەن جاڭالىق بولدى. سەبەبى بۇعان دەيىن شاۆكات ميرزيەەۆ ۇلتتىق قاۋىپسىزدىك كوميتەتىنەن باستاپ، ەلدەگى بارلىق كۇش قۇرىلىمداردى ءار مالىمدەمەسى سايىن قاتاڭ سىننىڭ استىنان الىپ، ءتىپتى ۇقك باسشىسى رۋستام ينوياتوۆتىڭ ءوزىن ورنىنان الىپ تاستاعان. كوپشىلىك جۇرت ينوياتوۆ قىزمەتىنەن كەتكەندە ميرزيەەۆ بيلىك تارماقتارىن يسلام كارىموۆ كومانداسىنان تولىقتاي تازارتۋعا كىرىستى دەگەن. بىراق شىن مانىندە ولاي بولماي شىقتى. وزبەكستاننىڭ بيزنەسىنەن باستاپ، كۇشتىك قۇرىلىمدارىنا دەيىن ءوز قاراماعىنا العان رۋستام ينوياتوۆ قىزمەتىنەن كەتكەنىمەن ميرزيەەۆتىڭ وعان قارسى تۇراتىن قاۋقارى جوق سياقتى. شەتەلدىك ساراپشىلاردىڭ سوزىنشە، ميرزيەەۆ زاكير الماتوۆتى ىشكى ىستەر مينيسترلىگىنە قايتا شاقىرتۋ ارقىلى ينوياتوۆ جۇيەسىنە قارسى تۇرماق. ساراپشىلاردىڭ بۇنداي بولجام جاساۋىنا سەبەپ تە جوق ەمەس.

زاكير الماتوۆ بۇعان دەيىن يسلام كارىموۆاتىڭ تۇسىندا ءىىم 1991 جىلدان باستاپ 2006 جىلعا دەيىن باسقارعان. باق بەتتەرىندە وسى ۋاقىتقا دەيىن جارىق كورگەن ماتەريالدارعا سۇيەنەتىن بولساق، زاكير الماتوۆ پەن جاقىندا عانا قىزمەتىنەن كەتكەن ۇقك باسشىسى رۋستام ينوياتوۆ ءوز زامانىندا يسلام كارىموۆاتىڭ سەنىمىنە كىرۋ ءۇشىن ۆەدومستۆا ارالىق كۇرەس جۇرگىزگەن. بىراق ءاندىجان وقيعاسى كەزىندە ىشكى ىستەر مينيسترلىگى ۇقك الدىندا تىزە بۇگىپ، الماتوۆ قىزمەتىنەن كەتۋگە ءماجبۇر بولعان. ونىڭ وتستاۆكاعا كەتۋىنە ۇقك قىزمەتكەرلەرىنىڭ ءاندىجان وقيعاسىنا قاتىستى قۇپيا قۇجاتتاردى جاريالاۋى سەبەپ بولعان. جالپى، زاكير الماتوۆ پەن رۋستام ينوياتوۆ اراسىنداعى تەكەتىرەس ءاندىجان وقيعاسىنا دەيىن باستالعان.اتاپ ايتقاندا ۇقك مەن ءىىم-ءنىڭ بيلىك ءۇشىن كۇرەستى 1999 جىلى تاشكەنت قالاسىندا بولعان تەررورلىق شابۋىل كەزىندە باستاعان. بەيرەسمي اقپارات كوزدەرىنىڭ بولجامى بويىنشا، تاشكەنتتە بولعان جارىلىستى ينوياتوۆتىڭ باسقارۋىنداعى ۇلتتىق قاۋىپسىزدىك كوميتەتىنىڭ قىزمەتكەرلەرى ۇيىمداستىرعان جانە ونى زاكير الماتوۆ بىلگەن. بىراق يسلام كارىموۆتىڭ الدىندا دالەلدەي الماعان.

جالپى، زاكير الماتوۆتىڭ قايتىپ ورالۋىنا ءار كىم ءار قالاي باعا بەرۋدە. ءبىرى شاۆكات ميرزيەەۆ الماتوۆتى ۇلكەن ساياساتقا قايتا شاقىرۋ ارقىلى ونى ينوياتوۆقا قارسى پايدالانباق دەسە، ەندى ءبىرى ميرزيەەۆ يسلام كارىموۆ كومانداسىنا قاتىسى بار «ەسكى گۆارديا» وكىلدەرىن جاڭا قىزمەتتەرگە تارتۋ ارقىلى ءوز باقىلاۋىندا ۇستاماق دەيدى. ءۇشىنشى بىرەۋلەر شاۆكات ميرزيەەۆ سىرتتاي مىقتى بولىپ كورىنگەنمەن ول قازىر كادر تاپشىلىعىنا تاپ بولىپ وتىرعان بولۋى مۇمكىن.

“The Qazaq Times”