Foto: Ak Jayık

Bügin Amnesty International wyımı 2017-2018 jılğa arnalğan "Jaña älemdegi adam qwqığı" atı bayandamasın jariyaladı. 

Bayandamada jazılğanday, Qazaqstanda käsipodaqtar men qoğamdıq wyımdar eş negizsiz şekteulerge tap bolğan. Wstalğan jäne türmede otırğan adamdar azaptalıp, olarmen qatal qarım-qatınas jasalğan. Jurnalister sayasi qudalauğa wşırap, olarğa şabuıl jasaldı. Äyelderdi jäne mügedekterdi kemsitu toqtağan joq.

"Bilik ökilderin sınap, olarğa şabuıl jasağan täuelsiz jurnalister qudalandı. Qırküyek ayında aqşa jılıstatu isi boyınşa, bilikti sınağan "Sayasi qalam. Tribuna" täuelsiz gazetiniñ redaktorı Janbolat Mamaydıñ üş jılğa bostandığı şekteldi. Onıñ aytuınşa, bwl sot isi sayasi twrğıda bolıp otır. Aqpan ayınan bastap Janbolat Mamay qamauda boldı. Jurnalist "Jurnalister qauip-qaterde" qorınıñ törağası Ramazan Esergepov 14 mamır küni Astanada Janbolat Mamay isin talqılau üşin şeteldik diplomattarmen jäne halıqaralıq sarapşılarmen kezdesuge bara jatqan kezde pışaqtaldı. Onıñ pikirinşe, bwl şabuıl Janbolat Mamay isimen jäne öziniñ sıni közqarastarımen baylanıstı", - delingen bayandamada.

Sonday-aq, bayandama jasağan wyımnıñ mälimetine qarağanda, bwrınğı KSRO qwramında bolğan elderde "dästürli qwndılıqtar" söz bolıp, kemsitu men quğın sürgin beleñ aldı. Mısalı Täjikstanda LGBT-ğa qarsı şaralar bastaldı jäne dini adamdardıñ qwqıqtarına qarsılıq tanılıp,  mwsılman äyelderge qoğamdıq orındarda hidjab kiyuge tıyım salındı.

Bwdan bölek bayandamada älem boyınşa jüzdegen belsendi öltirilgeni, Türkiya, Mısır, Qıtay jurnalister üşin eñ ülken "türmege" aynalğanı turalı aytılğan. Täjikstanda da bilikke sın aytqandardı qudalau äreketi jalğasqan. Alayda jahandıq deñgeyde repressiya sayasatın qatañdatu köptegen adamnıñ wzaq uaqıttan beri bolıp jatqan adam qwqığı üşin küreske qosıluına türtki bolğan.

“The Qazaq Times”