"Qıtaydağı tuıstarına araşa izdeydi".  Bügin Almatıda tuıstarı Qıtayda qamauğa alınğan, jazıqsız sottalıp azaptauğa wşırağan qandastardıñ tuıstarı ortaq baspasöz jiının ötkizdi. Oğan birqatar ziyalı qauım ökilderi men jurnalister de qatıstı.

Qıtayda ömir boyı bas bostandığınan ayırılğan Nağız Mwhammedtiñ anası wlına araşa swradı.

Şarağa tuğan-tuıstarı Qıtayda negizsiz ayıptalıp, wzaq merzimge qamau jazasına kesilgen Ospan batırdıñ tike wrpaqtarı da boldı.  Olar ondağı tuıstarınıñ jäne Qıtay biligi jağınan qudalauğa wşırağan qandastardıñ jalpı jağdayı turalı mälimetter berdi. Ospan batırdıñ nemeresi Örken Ospan bıltır Qıtaydıñ jergilikti sotı jağınan ömir boyı qamauğa ükim etilgen tuğan ağası Nwrlan Näbiwlı jäne atalas jaqındarı Nağız Mwhammed, Tolqın Soğısaywlı qatarlı azamattardıñ jağdayı turalı ayta kelip, Qazaqstan biliginen olardıñ tağdırına araşa swrağan äreketterinen nätije bolmay otırğanın ayttı.

Jazuşı Smağwl Elubay öz pikin ayttı.

Şarada jazuşı, Qazaqstannıñ eñbek siñirgen qayratkeri Smağwl Elubay,  azamattıq belsendi,  oppoziya ökilderiniñ biri Jasaral Quanışälin,  belgili sayasattanuşı Äzimbay Ğali qatarlı qatısuşılar bolıp jatqan jağdayğa qatıstı öz oyların ortağa saldı.

"Qıtay Kommunistik Partiyasınıñ ondağı qazaqtarğa jasap  otırğan  äreketi  qatelik emes,  qılmıs",  – dep  bağalağan  Jasaral Quanışälin Qazaqstan  biliginiñ  Qıtaydağı  qazaqtardıñ  tağdırına araşa boluda  därmensizdik istep otırğanın,  tipti öz işimizde  de adam qwqıqtarınıñ bwzıluına narazılığın  jetkizdi.

Jaqının izdegen qandastar ükimetten bir qayır bolar ma dep ümittenedi.

Bwlardan soñ tuıstarı,  otbası  müşeleri Qıtayda qamalğan nemese türli qısımdarmen qudalauğa wşırağan  azamattardıñ ata jwrttağı tuıstarı öz jağdayların  ortağa salıstı. Olarldıñ arasında bir otbası adamdarınıñ eki elge bölinip qalğandarı da bar. Bwğan deyin olar tuıstarı men otbası müşelerin bosatudı  talap etip,  Almatıdağı  Qıtay konsuldığı  aldında narazılıq şaraların da ötkizgen.

Şıñjañ mäselesi köp jıldan beri qazaq qoğamına da türli ıqpalın tigizip  keledi. Qıtaydağı adam qwqığınıñ bwzıluı halıqaralıq qauımdastıqtı da alañdatıp otır. Osı arada  ayta ketui kerek, Şıñjañ mäselesi ğana emes, Gonkong, Tibet jäne Tayuan mäselesi, sonlay-aq adam qwqığı men demokratiya qwndılıqtarına qatıstı taqırıptar Qıtay men birqatar Batıs elderi arasındağı däuirlik qayşılıqtıñ  negizgi  tüyilisu  nüktelerine aynaldı. Bwl alıp elder arasındağı qayşılıqta elimiz ben wltımızdıñ müddesi saudağa tüsip  ketpeui  üşin Qazaq  biligi,  onıñ Sırtıq ister ministrligi men Wlttıq Qauipsizdik  komiteti öz tarabınan belsendilik tanıtuı,  bolğan situaciyalarğa bey-jay qaramauı tiis.

"The Qazaq Times"